The Universal House of Justice
Ridván 2006
To the Bahá’ís of the World
Dearly loved Friends,
Ridván 2006 tassaavoq piffissaq ilimasulluarnerup ajugaanerullu anersaavanik ulikkaartoq. Maanna Bahá’u’lláhp malinnittai sumiikkaluartulluulluunniit Ukiunut Tallimanut Pilersaarusiap naammassigaluttualersup nalaani angusamik annertussusii pillugit pissusissamisoortumik tulluusimaartussaapput. Siunissamullu alakkarsinnaanngorput tatiginnissusermik misilittagartuut aalajangersimassuseqarluarlutik kisimik pigisartagaannik peqarlutik. Ukiuni tulliuttuni tallimani suliassat aggersut annertussusiat, tunniusimassutsillu itisoorsuup piumasaqaatigineqarnera, angusassallu pinngitsoortussaanngitsumik anguneqarumaartut annertussusiat isumaliutigilerlugu maanna Bahá’í-t silarsuaat tamarmi aalaterneqangaarpoq. Inuiassuit pillugit siunertaata uleeriartuarneqaarnera immikkut pisussaasutut isigalusiuk qujamasungaarlusi Bahá’u’lláhmut qinunissinni qinnutivut aamma qinnutissinnut tapiliuppagut. katersuussimasunut nalunaarusiatsinni, ulloq taanna Nunanut Anersaakkut Isumasioqatigiiffinnut tamanut aamma nassiussorneqarsimasumut, Ukiunut Tallimanut Pilersaarusiap 2006- imiit 2011-mut ingerlasussap qulequtai pingaarnerit saqqummiuppavut. Tassani ikinngutit aqutsiviillu kaammattorneqarput nalunaarusiaq taanna sukumerlugu misissoqqullugu nalunaarusiallu imarisaa maanna qularnanngitsumik ilissinnut nutaajussanngilaq. Maanna tamassi ataasiakkaarlusi qinnuigissavatsigit nukisi tamaasa atoqqullugit, ukiuni tulliuttuni tallimani pimoorussisumik ineriartorniarluni suliaqarfissat nunarsuaq tamakkerlugu immikkoortortaqarfiit 1 ,500-inik ikinnerunngitsut pilersinneqarfissaat iluatsittumik angusaqarfioqqullugu ilungersuuteqaqqullusi. Nunarsuaq Tamakkerlugu Qitiusoqarfimmiit Siunnersortit aallareernerisa kingorna qaammatit arlaqanngitsut qaangiutiinnartut Pilersaarusiap aallarnisarneqarnissaata tunngavissai taama pilertortigisumik tulleriiaarluagaatigisumillu nunani taarseraattuni pilersitsiortorfigineqarsimanerat Inooqatigiit Bahá’í-t unamminartut imminnut tunniunneqarsimasut angusaqarfiginiarlugit kajumilluinnassusiannut takussutissaavoq. Maani Pilersaarusiap piumasaqaatai pillugit annerusumik itisiliinissamut uagutsinnut pisariaqanngikkaluartoq, misigisimavugut inuttut ataasiakkaatut peqatigiillusilu ilungersuutigiumaagassassi nunarsuaq tamakkerlugu qanoq sunniuteqarumaassanersut pillugit isumaliutersuutiminnnguit ilissinnut isumaliutissatut saqqummiutissallugit.
Ukiut 70-it sinnerlugit matuma siorna Shoghi Effendip Nunarsuaq Tamakkerlugu Aaqqissugaanissamut suliani qanoq ittuussanersoq allagarisartakkamini nittartarpaa, tassanilu nunarsuarmi nukiit ingerlaartut qanoq ittuunersut sukumerlugit qulaajarlugit. Oqallorissuseq nammineq pigisani allanit assissaqanngitsoq atorlugu, Bahá’u’lláhp Saqqummernerata malitsigisaanik nukissuit marlussuit aallartissimasut eqqartorpai, arlaa sequtserisulik arlaalu katiterisussaq, taakkulu katillutik inuiassuarnut Nunarsuarmi Aaqqissugaanermut nutaamut Nammineq pilersitaminut qanoq ingerlaartitsisuujumaartussaanersut. Sernissuisumit mianersoqquneqarpugut “atugartuussutsip uleeriartortup annernaannartumik arriissusianit tammartitaaqqunata” imalt. “atugarissaarnerit sivisungaartussaanngitsumik takkuteqqittartut ilaannikkut ukiut aseruuffiusut nalaanni aqutsisoqarfiit nappaataasa anigorneqarsinnaanngitsut sunniutaasa sequtserisuusut aaqqissutissaannik peqartungasut pilersuisarnerinit
salloqittagaaqqunata.” Ukiuni qulikkaartuni qaangiuteqqammersuni pisut pillugit nassuiaatit suulluunniit nukissuit taakku paarlangasut sunniutaasa sakkortusiartuinnarnerat taama ersaritsigisumik Shoghi Effendip taamanili qulaajarsimasai, kialuunniit nangartarasinnaanngilai.
Inuiassuit ileqqorlunnermut suli itinerujartuinnartumut pulajartuinnarsimasut kialuunniit nassuerutigisinnaavaa, sequtserinerup nukiisa taakku inuiaqatigiit aaqqissugaanerata iluanni qanoq annertutigisumik asissuillutik aserorteritiginerat nalilersussaguniuk.
Namminissarsiussutsip, pasillernerup, ersinerup peqquserlunnerullu takussutissartai Sernissuisup taama ersaritsigisumik isigisimasai ima siammarsimatiginnginnerpat, allaat nalinginnarmik malinnaasumut ersarilluinnartunngorsimallutik? Pinngitsunik saassussisarnerit ( terrorisme) qangali eqqartorsimasai, maanna nunat tamalaat akornanni ima siammarsimatiginnginnerput allaat sumiikkaluartunut inuusuttuugaluarunik utoqqaagaluartunulluunniit ernumatsatsitsiuartunngorsimallutik? Perruumaataarutissat nunamiorpaluttut, pigissaarniarusussuseqarnersuaq, nuannaarniusersorniarnersuaq aliikkutasserinersuarlu pissanngatigeqalugit unittussaanngitsumik qilalertutullusooq ujartortuarneqartuartut sunniutaat ima sakkortutigilersimannginnerpat, allaat inuttut naleqartitaasunut nuannaarnermut, aalajaassusermut asanninnermullu qulangiillutik naalaganngorsimallutik? Ilaqutariittut ataqatigiinnerup sanngiillisimanera, katissimasutut inuunerup akisussaaffeqanngitsumik pissusilersorfigineqalernera, tamakku ima annertutigilersimannginnerpat, allaat inuiaqatigiittut inuunerup toqqammaviusup tamatuma ataavarsinnaassusia ulorianartorsiortilerlugu? “Inuup suussusia kanngunartuliornermut saatinneqarsimasoq, inuttut pissuserlunneq, inuiaqatigiit aqutsiveqarfiisa ileqqorluttunngorsimasut suujunnaartitaasimasullu” Shoghi Effendip qangali mianersoqqussutigisimasai alianaraluaqisumik imminnut takutittalerput “ajornerpaasumik maajunnarnerpaasumillu kiinaqarlutik.”
Sernissuisup inuiassuit ileqqorlunnermut pulajartuinnarnerannut annertunerpaamik pissutaasutut tikkuartorpaa upperisarsiornerup inuiaqatigiit iluanni nukittut iluaqutaasussatut atorunnaarneqarsimanera. Bahá’u’lláhp oqaasii innersuussutigai “Upperisap qullia qallerneqassagaluarpat ... paatsiveerunneq uivernerlu piulissapput, naleqquttumik pissuseqarnerup, naapertuilluarnerup, toqqissisimanerup eqqissinerullu qaamarnga nungussaaq.” Allakkat tamakku allareernerisa kingorna ukiuni qulikkaartuni tullinnguuttuni upperisarsiornerup ileqqorissaarnissamut sunniutaata ingerlaavartumik nungujartuinnarneranut kisimi takutitsiviusimanngilaq, aamma upperisarsiornermi aqutsisoqarfinni ileqqorlunneq aqqutigalugu amerlasuukkaarpassuit pakatsisitaangaartarsimapput. Tamakku iluanni nutarsaaniartaraluarnerit ingasaassiniarnermik ima annertutigisumik pilersitsisarsimapput, allaat nakkutigineqanngikkunik inuit akornanni ileqqorissumik pissusilersornissaagaluap toqqammavia aserorsinnaallugu. Iranimi Bahá’í-t malersugaanerat qanittumi suli sakkortusineqartoq, imminermini naammattumik takussutissaavoq taartup nukiisa uppernerup innerata sumiluunniit qaammaarilluni ikumasup qaminniarneqarneranut. Naak Siunertap naggataatigut ajugaanissaa qularinngikkaluarlutigu, Sernissuisup mianersoqqussutaa isiginngitsuusaarsinnaanngilarput, tassa Upperisarput akeqqanit siornatigornit eqqorneqarsimasarnerminit sakkortunerullutillu peqquserlunnerusunit akiorneqarumaartoq.
Naalakkersuinermi ingerlatseriaatsip amigartassusia sukumiinerusumik eqqartussallugu pisariaqanngilaq naak tamanna kusanaqisumik Shoghi Effendimit Nunarsuaq Tamakkerlugu Aaqqissugaanissaq pillugu allakkamini ilanngussimagaluaraa. Pisuut piitsullu aningaasarsiorneq eqqarsaatigalugu avissaanganerujussuat, naalagaaffiit akornanni akaareqatigiinngittarnerit qangarsuaaniilli pisimasunit naggueqartut, najukkaminniit peersitaasimasut amerlerujussuarneri, aaqqissugaasumik pinerluttoqarnerup persuttaasarnerullu tupinnaannartumik annertusinera, toqqissisimanngitsutut misiginerup tamanit aqqutaluginninnera, nunat immikkoortortaani amerlaqisuni tunngaviusumik sullinneqartarnerup amigarluinnalersimanera, nunap pisuussutaanik killeqanngiusartumik atuipilulerneq – tamakku tamarmik nunarsuarmi naalakkersuinikkut siuttuusut inuiassuit akornanni ajornartorsiutit nappaatitut atuutilersimasut ataavartumik aaqqivigisinnaanissaannut sapiuttassusiannut takussutissaapput. Taamaattoq oqartoqassanngilaq pimoorussilluni aaqqiissutissanik suliniuteqartoqarsimanngitsoq ukiunilu qulikkaartuni taarseraattuni tamakku amerliartorsimanngitsut. Suliniutilli tamakku, qanorluunniit isumaliuutaalluarlutillu nutaaliortigigaluarpata “ajortup nalitsinni inuiaqatigiiaat oqimaaqatigiissuunerannik naakkittaaqisumik akornusiisimasup pissutaata sorlaqarfia” kaanngartissinnaassuseqarfiginngilaat. “Allaammi” Sernissuisoq nangippoq “nunarsuaq tamakkerlugu aningaasarsiornikkut politikkikkullu ataasioqatigiilernissamik sakkussaq pisariaqartoq aqqutissiorneqaraluarpalluunniit .... inuiaat nunallu aaqqissugaasut uummaarissusiannik toqunartup mangiartuilluni ataavartumik nungujartortitsisup katsorsaatissaanik tamatuma immini nakorsaasersinnaanngilaa.” “Suummi allap,” Shoghi Effendip qulakkeerutigaa
“taamaallaat Pilersaarusiap Guuterpaluttup” Bahá’u’lláhmit tusarliunneqarsimasup “qularinngilluinnarlugu akuerineqarsimasup ... ukiuni makkunani inuiassuit
ataasioqatigiilernissaannut aaqqissuussap tunngavimmigut Guutimit aalajangiiffigineqarsimasup, aalajangersagartaasalu tamarmiusut sunniuteqarluartussaanerinut aalajangiusimannilluinnassuseqarnerup .... nukiit ataqatigiit akornanni isasoortitsisut naggatissaq tikillugu taamaallaat akiorsinnaavai, taakkulumi nakkutigineqanngippata inuiaqatigiit aaqqissuussat naalliuuteqartut ilorpiaat mangiartortuartussaavaa.”
Nunarsuarmi avissaartuunnerit nungujartortitsisut pillugit Shoghi Effendip nassuiaanera ilumut itingaarpoq tamanillu pitarsisuulluni. Taamatuttaaq tupinnartuuvoq nukiit katiterisut pillugit ersarilluinnartumik qulaajaanera. Eqqartorpai “Nunarsuaq tamakkerlugu ataqatigiinnerup anersaavata inuiaqatigiit avissaangaqisut tukaqisullu akornanni takkuteriataartarnera “ Bahá’u’lláhp inuiassuit ataasiussusiannik aalajangiissutaanut toqqaannanngikkaluartumik tamakku akornanni saqqummeriasaartarnerarlugu. Ataqatigiinnerup anersaava tamanna ukiuni qulikkaartuni arlalinni suli siammariartuinnarsimavoq maannakkullu ineriartornera assigiinngitsutigut takussutissaqartitilerpoq, inuiaat ammimikkut qalipaataat pillugu tunngavissaqanngitsumik isummiussaannaat ajattorlugit nunarsuarmi innuttaaqataanermik isuma saqqummeriartuinnalerpoq, pinngortitaq avatangiiserlu pillugit annerusumik malussarinniartoqartalerpoq inuiaqatigiillu akornanni peqqissuunissaq pillugu suleqatigiissitaqartalerpoq, inuttut pisinnaatitaaffiit eqqumaariffigineqartalerput aammalu tulleriissaalluakkamik nunarsuaq tamakkerlugu ilinniartitaanissaq pingaartinneqalerluni, upperisat assigiinngitsut naapillutik suleqatigiittalerput aammalu tamani tamaani puttussulerput illoqarfinni, nuna tamakkerlugu nunallu tamalaat akornanni suleqatigiiffiit sunik inooqatigiinermut tunngassutilinnik assigiinngitsunik sammisaqartartut.
Taamaattoq Bahá’u’lláhp malinnittaannut nukiit katiterisut eqqarsaatigalugit tamatuma iluani ineriartornerit pingaaruteqarnersaat Upperisamut toqqaannartumik attuumassuteqarput, taakkunani amerlasuut Sernissuisumit aallarnisarneqarsimapput, naak aallarteqqaarnerat eqqarsaatigalugu annikiginarsimassaqqooraluartut maanna annertoorsuarmik siuariarsimalerput. Ilinniartitsinissamut pilersaarusiat uppertut ikittuinnaagallartillugit pilerseqqaarsimasaanniit maanna nunarsuaq tamakkerlugu inooqatigiit amerlasoorsuakkuutaanngorsimapput piffinni tusintilinni arlalissuarni inissisimaffeqalersimallutik, taakkulu tamarmik ataasiakkaarlutik tunngaveqarluarlutik suliniuteqartiterput Upperisap toqqammavii anguniagaalu aallaavigalugit. Aqutsisoqarfik Shoghi Effendip peqqissaaruteqalugu sulileqqaarnerminiilli ukiuni qulikkaani siullerni tunngavilersorsimasaani maanna Nunat Illoqarfiillu iluini Anersaakkut Isumasioqatigiiffiit amerlasuut qanittumillu suleqatigiissut pilersimapput uummaarissumik Siunertap suliassartaannik aallussisut nunani 180-it sinnerlugit inissisimaffillit. Upperisap Siammarterneqarnissaanut Sernissorneqarnissaanullu Siunnersortit Ikiortaat ikittunnguullutik aallartissimasai toqqammavigalugit maanna Nunarsuaq Tamakkerlugu Ilinniartitsinissamut Qitiusoqarfiup ataani Siunnersortit 81-iusut akornanni siunnersorneqarlutik nikuissimalerput pimoorussillutik sulisut tusintingajaat. Upperisap Nunarsuaq tamakkerlugu Aqutsinermut Qitiusoqarfiata Nunarsuaq tamakkerlugu Anersaakkut Qitiusoqarfiup iluaniittup ineriartornera Shoghi Effendip ineriartortinniarlugu ilungersuutigisimaqisaa, maanna alloriarnermut tullinnguuttumut pingaaruteqarluinnartumut isersimavoq, tassami Karmelip Qaqqaani maanna Silarsuarmi Naapertuilluarnerup Illua inissisimaffeqalersimavoq aammalu Nunarsuaq tamakkerlugu Ilinniartitsinissamut Qitiusoqarfiup illorsuartaa naammassineqarsimalerpoq taamatullu Allagaatit pillugit Misissuinermut Qitiusoqarfik. Huqúqu’lláh pillugu Aqutsivik Guutip Siunertaata Assaata ‘Alí-Muhammad Varqá-p, ukiut 50-it matuma siorna ingerlatsisussatut Shoghi Effendimit toqqarneqarsimasup, nakkutilliisuuneratigut ingerlaavartumik ineriartorsimavoq, inatsisip taassuma kimittoorsuup inuiassuarnut tamanut nalissaqanngitsumik pilluaqqusaaffiusup, suli siammasinnerusumik tunngavilersorneqarnissaa anguniarlugu nunat tamalaat akornanni 2005- imi siulersuisussanik pilersitsiviuvoq. Sernissuisup Upperisap nunat tamalaat akornanni isigineqarnerata annertusarneqarnissaa pillugu suliniuteqarsimanera maanna inerissimalerpoq avammut attaveqartarfimmik aaqqissugaasumik annertuumik peqalernikkut, taakku Upperisap soqutigisaanik illersuisinnaassuseqarluartuupput Upperisallu oqariartuutaanik nunarsuaq tamakkerlugu siammaasinnaassuseqarluarlutik. Upperisap sinniisui Upperisaq pillugu nunat tamalaat akornanni sammisaqartartunut saqqummiussigaangata Upperisap malunnartumik ataqqineqartarnera angusaavoq immikkut malugisarialik. Inooqatigiit taamaattut inuiassuit tamakkerlugit assigiinngiiaassusiat tunuliaqutaralugu ilaasortaqartitertut Bahá’u’lláhp Angerusianut aalajaassusiat tunniusimanerallu tassaavoq nukimmik aallerfissaq aaqqissugaallutik peqatigiit allat pigisutut oqaatigisinnaanngisaat.
Sernissuisup siumut takorlooreersimavaa Ukiut Ilusilersorfiusut nalaanni ukiuni ataqatigiissuni tulleriiaattuni Silarsuarmi Naapertuilluarnerup Illuata nunarsuaq tamakkerlugu suliat aallartisarumaaraat, Nunat Tamakkerlugit Anersaakkut Isumasioqatigiiffiit “ataasiussusiannut assersuutaasut sulianillu ataqatigiissaaralutillu kattutsitsisussat”. Maanna ukiut ataqatigiissut taamatut ittut pingasut ingerlareerneranni inooqatigiit Bahá’í-t pimoorussillutik nunarsuaq tamakkerlugu Pilersaarusiat Silarsuarmi Naapertuilluarnerup Illuata pilersissimasaasa iluanni sulisimalerput Bahá’í-tullu inooriaaseq inuup anersaakkut ineriartorfissaanik aqqutissiuisoq pilersissimavaat ilaasortaasalu peqatigiillutik nukiit aqqutissiorpaat inuiaqatigiit iluanni anersaakkut nutarterisussat. Tamatumunnga piumasaqaataasimapput nalunaarummik tarninut malussarissunut amerlasoorsuarnut siammaasinnaassuseqarneq, taakkulu toqqammaveqarluartumik aallartiffissaqarnissaannik qulakkeerisinnaaneq aammalu Upperisap nutaap iserfigisimasamik tunngavii pingaarnersat suunersut paasinninnerulernissaannut aqqutissiuisinnaaneq. Isumasioqatigiinnerup toqqammavia, Tunngaviliisumit saqqummiunneqarsimasoq, piviusunngortissinnaanngorsimavaat peqatigiillutik aalajangeeqatigiittarnissamut kinguneqarluartussamut sakkutut pitsaasutut atortuliullugu aammalu ilaasortaminut qanoq atorneqarnissaanik ilitsersuussutigalugu. Ilaasortaminnut inuusunnerusunut anersaakkut ileqqussakkullu ilinniartitaanissamut ingerlatsivissat pilersissimavaat aammalu meerartaminnuinnaq inuusuttuarartaminnuinnarlu atuinnarnagu nunaqqatiminnut allanut atortussatut siammarsimallugu. Piginnaaneqarluartunik akornaminni inuttaqartuunertik pissutigalugu atuagassianik amerlasoorsuarnik pilersitsisimapput oqaatsit assigiinngitsorpassuit atorlugit atuarneqarsinnaasunik, namminneq pisariaqartitaminnut aammalumi inuiaqatigiit avatangiisimik soqutigisaannut attuumassutilinnik. Annertunerujartuinnartumik inuiaqatigiinnut avatangiisiminnut akuunerujartuinnalersimapput, suliniuteqarfiillu inooqatigiinnermut aningaasarsiornikkullu ineriartortitsiviusut arlalissuit pilersitsiortorsimallugit. Ingammik 2001- imi ukiut ataqatigiissut tallimassaat ammarneqarmat pingaarutilimmik angusaqarfigisimavaat inuttut piginnaatsit amerlisaaffigalugit, sungiusaaneq inuiaqatigiit iluanni tamaginnut tulluuttoq pilersillugu ammalu ineriartorneq ataavartoq anguniarlugu sakkussat nutaat nassaariortorsimallugit.
Tassaaku nukiit maani eqqartorneqartut imminnut sunneqatigiittarnerat aqqutigalugu amerlasoorsuakkuutaarlutik isaalersussat qanoq siuarsarneqarsinnaanernissaat eqqartorneqartariaqartoq. Ukiunut Tallimanut Pilersaarusiap maanna ammarneqartup piumasaqaatigaa ilissi nukisi pisumut tamatumunnga atussagisi siumullu ingerlaarnerit taakku marloqiusaasut ilorpiamikkut imminnut ataqatigiissut suli pilertornerusumik ineriartornissaat qulakkiissagissi. Tamanna tassa suliassarsi pingaarnerpaaq. Ilungersuutisi kinguneqarlualeraangata aammalu ineriartorneq nutaamik killiffeqalertillugu Nunarsuarmi Qitiusoqarfimmut unamminartut periarfissallu nutaat ukiuni tallimani aggersuni saatassanngorumaarput, soorlu makkunani; avammut atassuteqartarnermi, inooqatigiinnikkut aningaasarsiornikkullu ineriartornermi, ingerlatsinermi aammalu Bahá’í-tut inatsimmik atuutilersitsisarnermi. Inooqatigiit ineriartornerat ilutigalugu nutaanik aaqqissuisoqartalereerpoq, soorlu ilerfiartut maanna oktober 2007 aallarnerfigalugu amerlassusiat marloriaatinngussaaq ataatsikkut najuuttartussani inuit 400-nngortinneqassallutik. Aammattaq allanik suliniuteqarpoq malersortariaqakkanik. Taakku ilagaat Bahá’u’lláhp Ilerfata eqqaani naatsiiviit ineriartorteqqinneqarnissaat, aammalu Ridvánip Naatsiiviani Mazra’ihmilu; Nunarsuaq Tamakkerlugu Toqqorsiviup Allagaateqarfiullu illorsuartaa nutarterneqassaaq; Bábip Ilerfata illorsuartaani iluarsaassisoqassaaq, tamatumalu qanoq annertutiginissaa suli ilisimaneqanngikkallarpoq; aammattaaq Chilemi Naalaffissuaq Sernissuisup takorlooreersimasaa sananeqassaaq, tassa Ma sh riqu’l-A dh kárit kingullersaat. Suliniutit tamakku suliarineqalertillugit, sukkut tamaana ikioqqulluta saaffigisarumaarpatisigit, ilaatigut aningaasatigut ikiorserneqarnissamut immikkullu piginnaaneqartunik sulisussarsiornermut tunngassutilinnik, isumatta saaniitittuassavarput Upperisap atortussai pisinnaasaq annertunerpaaq naapertorlugu Pilersaarusiap piumasaqaataannut naapertuuttumik qanoq ingerlanneqassasoq.
Asasavut ikinngutit: Avissaartuunnerup nukii suli annertussutsimikkut nukittussutsimikkullu annertusiartuinnartut isiginngitsuusaarneqarsinnaanngillat. Tamatuma assigisaanik aamma ersarippoq Aqqit Annersaata malinittai nukimmiit nukimmut siunnersorneqartuarsimasut Isumasiuinerup Assaanit, maannalu amerlassutsimikkut annertusisariaqarput piginnaatsitillu annertusartariaqarpaat. Ukiunut Tallimanut Pilersaarutip ingerlanissaa ersarippoq. Qanoq ililluta, inuiassuit naalliullutik atugaqarnerinik ilisimannittutut, aammalu oqaluttuarisaaneq sumut ingerlaarluni siaariartortoq ilisimallutigu, piginnaanerput tamaat atorlugu nikuinngitsoorsinnaanngilagut anguniagaanullu imminut tunniulluta. Sernissuisup Ukiunut Arfineq Marlunnut Pilersaarusiap siulliup aallartinneqarnerata nalaani oqaatsit allagai “Pisussat maanna piareerput” nalitsinnut aamma tulluuttuunnginnerpat? Oqaasii makku siutitsinni akisuatitsigit: “Piffisaq asuliinnartissinnaanngilarput.” “Nangaassutit inissaqanngillat.” “Periarfissaq manna uteqqittussaananilu taartissaqanngilaq.” “Misiliineq, ilungersorneq, tassa ajugaanermut naammattumut takkutinngitsoortussaanngitsumut qulakkiisoq.” Qularinngikkisiuk Alloriusap Illernartup saavani siunnersorneqaqqullusi sernissorneqaqqullusilu qinnuttuaritsigit.
- The Universal House of Justice