The Universal House of Justice

Ridván 2007

To the Bahá’ís of the World

Dearly loved Friends,

Ukiunut Tallimanut Pilersaarutip ukiuisa siullersaani pisimasut takutippaat Bahá’u’lláhp malinnittaasa decembarip 27- ani 2005- imi suleriaaseqarnissap sinaakkutassaa qanorlu isikkoqarnissaa pillugu taakkartukkagut pimoorussillutik malunnarluartumillu tunuaartarisimagaat amerlasoorsuakkuutaarlutillu isaasoqalernissaa pillugu tunniusimallutik suliniuteqarsimasut. Eqimattakkuutaartuni sinaakkutassiat taakku imarisaat tamakkerlugit ataqatigiissumik atuutilerneqarsimatillugit ingerlaavartumik siumukarneq siumugassaasarsimavoq, tamanna malunnarpoq nunaqqatigiit akornanni uppertut taakkulu ikinngutaasa peqatigiillutik peqataasarnerini, aammalu uppertut amerliartornerisigut, ilaat allaat nalunaartarput qaammatit amerlanngitsuinnaat ingerlanerini untritilikkuutaartunik ilannguttoqartaannartoq allallu nalunaartarlutik inuk naallugu amerlassusilinnik isaasoqartarlutik. Ineriartornermut tamatumunnga pingaaruteqarluinnartuusimavoq suliap tamatuma anersaakkut pingaaruteqassusia annertunerusumik amerlanerit akornanni paasiartorneqalermat, aammalu aalajangiisoqassatillugu periutsit Pilersaarutip qitiusumik tunngavigisai annertunerusumik paasisaqarfigineqaleriartornerisigut.

Nunarsuaq tamakkerlugu Pilersaarusiat taarseraallutik maanna atuutilersimasut ataasiinnarmillu siunertaqartuusut, tassa amerlasoorsuakkuutaarlutik isaasoqartalernissaa annertunersumik aqqutissiorneqassasoq, sioqqulluguli nunarsuatsinni tamani tamaani pilertoqisumik annertuumillu amerliartortoqarsimavoq – taamaattoq amerliartorneq tamanna attatiinnarneqarsimasinnaanngilaq. Tamanna pillugu unamminartua tassaasimanngilaq Siunertap malinnittaanik nutaanik ilaqalerluni amerliartornissaq – ingammik piffinni malussarillutik qisuariartarfioreersut eqqarsaatigalugit – kisianniuna nunaqqatigiit akornanni akuunerulersitsinissaq aammalu akuusut tamakku akornannit suli siammalertornissamut sullissiumallutik kajumittunik pilersitsiortornissaq unamminartuusoq. Tamanna Bahá’í-t silarsuaanni ima pisariaqarlunilu pingaaruteqarsimatigaaq allaat Ukiunut Sisamanut Pilersaarusiamut qitiusumik suliassatut taakkartorsimallutigu Nunagisanissaaq Anersaakkut Isumasioqatigiiffiit peqqusimavagut aqutsivittut nukissaqalernissamut annertusaanissamut nukitik atoqqullugit, sungiusarluni institut-inik pilersitsinikkut inuttullu piginnaaneqalersussanik sungiusaasaqqullugit. Nalilersuinerput naapertorlugu uppertut amerliartuinnartut pisortatigoortumik institutinik sungiusarfissanik pilersitsisoqassappat tamanna iluaqutigisussaassammassuk, annertunerusumik paasisaqalersillugit anersaakkullu ineriartortillugit, taamaalillutik amerlasoorsuakkuutaarlutik isaasoqalerpat tamatumalu malitsigisaanik uppertoqatigiit akornanni ataavartumik patajaallisaaqataanissamut suleqataanissamut kiffartuussinissamullu piginnaanerit pisinnaasallu ineriartortinneqarsinnaanngoqqullugit.

Maanna eqimattat tamakku patajaatsumik ineriartorlutik ingerlaarneranni maluginiarparput taakku tamarmik iluanni ikinngutit institut-it ineriartornerat nukittorsarneqarnerallu akuuffigilluaraat Upperisallu tapersersortaat eqeersimaartut amerliartuinnartut qanoq piareersarneqassanersut ilinniaraat, suliniutimik ataqatigiissaarnissaannut uummaarissumik atortussiornikkut, namminnerlu inuttut aallarnisarlugit suliniutitik peqatigisamik suliniutaannut ataatsimoorussillutik suleqatigiinnermut kinguneqarluartussamut ataqatigiisitsinermikkut, namminnerlu suliniutimik pilersaarusiutigineranni paasissutissat tulluuttut misissorluariarlugit atorluartarnerisigut. Malunnarpoq siammariartornermi patajaallisaanermilu suliniutit - ineriartornermut ataavartussamut qitiulluinnartuusut - ataatsimoorutsillugit suliniutigineranni aqqutissartik nassaarilluarsimagaat. Takussutissat tamakku qularnanngitsumik tunniusimalluni uppertumut kimulluunniit tulleriissaarluakkamik ilinniarnissap aqqutaanut siumut tikkuussutaareersumut patajaatsumik ingerlajuarnissamut kimitsisuusussaapput.

Ukiuni makkunani ilungersuuteqarluni annertungaartumik suliniuteqarfiusuni angusaasimasut eqimattani amerliartupiloorsimasuni patajaallisaaviusimasunilu taamaallaat siumugassaasimanngillat. Periuseq Ukiunut Sisamanut Pilersaarusiami aallunneqarsimasoq Qaammatinilu Aqqaneq Marlunni Pilersaarusiamik malitseqarsimasoq siusinnerusukkullu Ukiunut Tallimanut Pilersaarusiami ingerlanneqarsimasoq malunnartumik inunnut amerlanerusunut akuunerunissamut uppertunut periarfissiisimavoq, najukkaminnilu assigiinngitsutigut inuiaqatigiit iluanni akuunerulersimapput. Inuttut piginnaaneqalersitsinerulernissamik suliniuteqarnerup ukiuni qulini kingullerni aallunneqarsimasup, nunarsuarlu tamakkerlugu Pilersaarusiat taarseraattartut pingasut iluanni pingaartitaralugu suliniuteqarfiusimasup, maanna malunnarluartumik iluaqutaasimassusia takussaallualerpoq. Tamani tamaani sumiikkaluaniluunniit malunnartumik inuttut piginnaanerit ineriartortinneqarnissaata pingaassusiata paasineqarnissaa pisariaqartuusimavoq. Sumiluunniit ikinngutit ikkaluartut ataavartumik ineriartornissap piumasaqaatai suunersut ilinniaqqaartariaqarsimavaat – taamatuttaaq tulleriissaalluakkamik iliuuseqartarnissaq siuarsarneqassasoq, suullu puussaarutaasinnaasut uiarterneqartassasut. Peqatigiilluni aalajangiisoqassatillugu periutsit ataasiakkaat inuinnarnut sunniuteqarniartunut nittarsaattarlugit aammalu nunaqqatigiit siunertaqartutut misigisimaleqqasut pilersillugit, kikkut tamat minitaqaratik peqataasarnissaat kaammattuutigalugu aammalu sammisaqartitsinerminni inuiaqatigiit iluanni assigiinngiiaartumik inissisimaffeqartut inissaqartittarlugit, ingammik meeqqat inuusuttuaqqallu eqqarsaatigalugit, taakkumi tassaapput siunissami Guutip Siunertaata illersuisussai Taasumalu atugartuussusiata nappartiterisussaat.

Taama patajaatsigisumik toqqammaveqareerlutik uppertut kikkulluunniit isumaminni salliutittuaannagassaat tassaavoq ilinniartitsineq. Namminneq inuttut suliniuteqarnermikkut ikinngutiminnik aggersaallutik ilinniartitsinnikkut, aammalu qitiusumik sammisaqartarnerni akuutitsisarnermikkut, sammisaqartitsinerillu tamakku ilinniartitsiniarluni suliniarnermut qitiutittarnerisigut, nunaqqatigiittut meeqqat inuusuttuaqqallu - eqimattat aallarteqqaarfigiumaagassaat - sullikkunikkit utoqqaanerusullunniit salliutillugit suliniarunik, pilersaarusioqatigiissimaneq aallaavigalugu pimoorussisamik peqatigiillutik namminneq ilaqutariinnut pulaartarnermikkut, upperisamilluunniit annerusumik paasisaqarusuttunik piffissap ingerlanerani sukkut tamaana pulaartarunik – tamakku tamarmik taamaallaat ikinngutit qanoq periarfissaqartiginerat naapertorlugu qanorlu atugaqarnerat naapertorlugit, nunaqqatigisamillu akuuffigisamik qanoq ittuususii naapertorlugit aalajangiiffigineqarsinnaapput. Taamaattoq kikkut tamarmik qanorluunniit atugaqaraluarunik nassuerutigisariaqarpaat, ilungersungaartumik pisariaqartitsillutik inuiassuit anersaakkut inuussutissaqaratik isumatsannermut suli itinerujartuinnartumut kiviartuinnarmata, qanorlu Aqqit Annersaata peqatigiinnerannut ilaasuusugut tamatta ataasiakkaarluta ilinniartitsinissamut pissussaaffitta nukinginnarluinnartiginera.

Bahá’u’lláhp malinnitsini pisussaaffilersimavai Siunertani ilinniartitsissutigeqqullugu. Maannangaaq tusintillit arlalissuanngortut kajumilluarlutik Pilersaarusiap aalajangersagai piviusunngortinniarlugit sullipput tarningit Saqqummernerata Imarsuanut aqqutissiorniarlugit. Ulloq uppertup kialuunniit ullut tamaasa kajumissuseqangaarluni salliutittuarlugulu ilinniartitsiuannartalernissaa takussallutigu ilimasulluarluta takkussiivarput, aammalu Bahá’i´-t ataasioqatigiilernerat ima sakkortutigilissasoq allaat taamatut inissisimanerup qaammarsaanera kipisuitsumik kiffartuussinerup aqqutaanut malunniuttuinnartunngorluni. Tamanna tassa ilissinnut iluunngarluta neriuuterput, Alloriusallu Illernartup saavani ilorpiatsinnit pisumik qinulluta kiminneqangaartarfipput.

- The Universal House of Justice