The Universal House of Justice
Ridván 2010
To the Bahá’ís of the World
Dearly loved Friends,
Uummatitsinni Bahá’u’lláhp malinnitaannut nuannaartorinninnermik peqangaaqaluta maani Ridvánip qiimasungaarfiusup aallartinnerani nuannaarutigalugu nalunaarutigissavarput nunarsuaq tamakkerlugu nunavissuarni tamani pimoorussisamik ineriartornissaq anguniarlugu sammisaqartitsinerit nutaarpassuit aallartisarneqarsimalermata, maannalu nunarsuaq tamakkerlugu sammisaqarfiit tamakku 1.500-‐‑jut sinnerlugit amerlassuseqalersimasut, taamaalilluni Ukiunut Tallimanut Pilersaarutip anguniagassartaasa ilaat allaat ukioq ataaseq sioqqullugu
isumannaarneqareersimalerpoq. Angusaq tupinnartoq tamanna, ajugaassut immikkooruteqarluinnartoq pillugu Guutimut qujamasulluta niaqquvut sikitippavut. Kikkut tamat suliamut tamatumunnga peqataasimasut namminneq takusinnaavaat Upperisap siammartitissallugu suliniutigineqarnerata ingerlaartup, patajaallisaanerullu tamani tamaani pilersinneqareersimasup, suli isumannaallisarneqarnissaanut sulinissamut ukiumik ilivitsumik Naalakkatta saammaalluni malinnitsini periarfississimagai, nunarsuaq tamakkerlugu ingerlatsinerminni alloriarnissap tullinnguuttup suliassartaannut aallussinissamut kajumissaarneqarnissaminnut piareersaatitut – tassa Ukiunut Tallimanut Pilersaarusiassap nutaap eqqunneqarnissaanut. Pilersaarusiat taamaattut immikkoortunut tallimanut immikkoortiterneqarsimapput, tamarmillu ersarissumik siunertaraat amerlasoorsuakkuutaarlutik Upperisamut isaalersussat aqqutissiorneqarnissaat patajaallisassallugu.
Ulluni nalliuttorsiorfiusuni makkunani unikaallannitsinni qujamasungaarnerput tulluusimaarutiginninnerpullu qamannga pisoq angusassi kisitsisitigut amerlassusaannit isumaliornermit pingaarnertut aallaaveqanngimmata ersarissassallugu kiminneqarpugut, naak tamanna immikkut isiginiassallugu aamma pingaaruteqaraluartoq, kisianniuna ineriartornerit tapertariiaartut itisuumik periuseqarnerup iluanit aallaaveqartut pissutaallutik angusarissaarnermut tikkuussisuusimasut. Tamakku akornanni immikkut taasariaqarpoq ikinngutit anersaamut tunngassutilinnik allanik oqaloqarteqartarnerisa annertusisimanera maluginiarsimagatsigu, aammalu Bahá’u’lláhp Inuttaa Saqqummerneralu pillugu akornuteqaratik
oqalussinnaassuseqalersimanerat. Ilinniartitsineq tukkusuumik inuuneqarnerup tunngaverpiaasa ilagigaat paasilluarsimavaat.
Nalunaarusiarisartakkani ungasinngitsumi saqqummersartuni nunarsuaq tamakkerlugu ilinniartitsinerup sukkatsikkiartuinnarnera nuannaarutigalugu maluginiarsimallugu unnersiutigisarparput. Uppertumut anersaakkut pisussaaffiup tunngaviusup tamatuma piviusunngortinnissaa Bahá’í-‐tut inuunermut ilisarnaataavoq pinngitsoortussaanngitsoq pinngitsuugassaanngittuarsimasorlu. Pimoorussisamik ineriartornissaq anguniarlugu sammisaqartitsinerit 1.500-‐‑jut pilersinneqarnerisa takutippaat uppertut qanoq ilaquttamik qaninnerit ikinngutimillu akornanniiginnaratik sapiissuseqalersimallutik pimoorussilersimallutillu avammut sassariartuinnalersimatigisut, Tamanik Saammaasup Assaanik siulersorneqarlutik tarninut malussarissunut sumiluunniit najugaqartunut aqqutissiorneqarlutik. Nalilersuinerugallartulluunniit allaat takutippaat maanna 10.000-‐‑ilikkaat ilisarisimanngikkaluanik paaseqatigiilluni ikinngutitaartornissaq siunertaralugu aallusseqatigiittarnerni peqataasalersimasut.
Upperisap tunngavigisai pingaarnerit paasinartumik ersarissumillu saqqummiunnissaannut uppertut Ruhi Institutip atuagartaasa arfinilissaanni assersuutit ersarissut iluaqutigilluarsimavaat. Apeqqusernagu malitassaannartut isigiunnaaraanni tulleriissaartumillu eqqarsarluni saqqummiukkaanni, taava tarningit marluk akornanni oqaloqatigiinneqalersarpoq – oqaloqatigiinneq itisuumik paasinninnermik tatigeqatigiinnermillu imaqartoq. Naapeqqaarneq qaangerlugu oqaloqatigiinneq ingerlaqqikkaangat ikinngutigiinnerit ilumoortut pilersarput, taamatullu ilinniartitseriaaseqarneq anersaakkut nutarternermut ingerlaavartumut kimitsisuusinnaavoq. Nutaamik ikinnguteqalerneq taamaattoq upperisamut ilanngunnissamik qaaqqusinermik allatigulluunniit sammisaqarnermut peqataasalernissaa pingaarnerpaajunngilaq. Pingaarnerpaasoq tassaavoq tarneq kinaagaluartorluunniit inooqatigiinnut tikilluaqqusaasutut misigissasoq, inooqatigiit iluanni pitsanngorsaaqataanermut peqataasutut misigaluni inuiassuarnik kiffartuussinissamut aqqutissaq tummillugu, taava tamatuma aallartinnerani kingusinnerusukkulluunniit pisortatigoortumik ilaasortanngorsinnaalluni.
Ineriartornerup tamatuma pingaassusia annertoqaaq. Periuseq aalajangersimasoq pilersinneqareerpat, taava tamatigut suleqatigiinneq nutaanillu ilisarisimasaqalerneq aqqutigalugu siammariartornissaq eqeersimaarfigineqassaaq, inuiqatigiit iluanni ikittukkuutaarlutik eqitersimasut salliutillugit, taakkulu tamarmik tassaalissapput pimoorussisamik aallussiviusut. Illoqarfiit iluanni qitiusumik aallussiviusut tamakku imatut agguataarneqarsinnaapput, tassa illoqarfiup immikkoortortaani eqqaamioriikkaat killeqarfii killiliullugit; avinngarusimanerusuni nunaannarmiittut nunaqarfiit naapiffissatut qitiusinnaapput. Tamakkunani najugaqartut ilinniartitsiartorlutillu tikeraartut suliarisatik inuiaqatigiinnik kiffartuussinertut isigisassavaat. “Matumiit matumut” kasuttorluni ilinniartitsinermik taassallugu piukkunnanngilaq, naak immaqa ilaatigut siumut nalunaaqqaarani alakkaanermik suliniut tamanna
aallartinneqarsimagaluartoq, tassami suliniutip tamatuma siunertaraa inuiaqatigiit iluanni anersaakkut, inooqatigiinnikkut silassorissutsikkullu ineriartornissaq siunertaralugu nammineq akisussaassuseqarfigilernissaata inuiaqatigiit aalajangersimasut iluanni annertusarneqarnissaa. Sammisaqartitsinerit ingerlatsinermik taamaattumik kimitsisuusut, ikinngutitaanngortunullu akuuffigissallugit kaammattuutigisassat – ataatsimiinnerit inooqatigiit qinoqatigiittarnerinnik nukittorsaasussat; meeqqat uummataat isumaliortaasiallu malussarissoq naggorissarniarlugu ilinniartitsinermik imalik; inuusuttuaqqat nukingat pikialaartuartoq aqqutissiorniarlugu suleqatigiiffiusoq; ilinniaqatigiinniarluni katersuuttarnerit tamanut ammasut, inunnik
assigiinngitsunik tunuliaqutalinnut naligiissumik ineriartorfiusussat upperisamut ilinniutinik nammineq inuttut inooqatigiillu akornanni inuunerminnut qanoq tulluussarsinnaanerlugit misissuiffiusoq – tamakku tamarmik ingerlaannassagunik piffissami aalajangersimasumi avataaniit aggersunit ikiorteqarluni ingerlanneqarsinnaapput. Taamaattoq ilimagisariaqarpoq qitiusumik ingerlatsinerit tamakku amerliartuinnalerpata, inunnit nunaqarfinni illoqarfeeqqanilu najugaqavissunit namminernit isumagineqalissasut – arnanit angutinillu avatangiisiminni atukkamikkut timikkut anersaakkullu pitsanngorsaanissamik soqutigisalinnit. Taava taamatut inooqatigiit akornanni periuseq pileriartussaaq Bahá’u’lláhp nunarsuarmik aaqqissuusseriaatsimik nutaamik takorluugaanut piviusunngortitseqataassallutik pisussaaffilersimasunik amerliartortitsisussaq.
Pissutsit taakku eqqarsaatigalugit inuiaqatigiinnik kiffartuussinissamut kajumittuuneq qitiusumik sammisaqartitsinerit tamakku pilersitaat saqqummersarpoq ammasuuneq aqqutigalugu. Nunat immikkoortortaqarfiini taarseraattuni pimoorussisamik ineriartornissaq anguniarlugu
sammisaqartitsiviusuni, ukiumi tulliuttumi ikinngutinut suliassaq tassaavoq inuiaqatigiit iluanni immikkoortukkuutaat ammasumik isumaqareersut ataatsit arlaqartulluunniit ilinniartissallugit, Upperisap tunngaviusumik isumai suunersut toqqaannartumik saqqummiuttarnerisigut, tarningillu maleruutiinnalernermik inuiaqatigiinni pissutsit maanna atuuttut pissutigalugit atugarilersimasaminnik qilerussaarusussuseqartut nassaaralugit, sanileralugillu najugaqarfigisani pissutsinik kikkut tamat atugaannik nutarsaalernissamik suleqatigilerlugit. Ikinngutit taamatut najugarisami eqqaamiorisani inuiaqatigiinnik kiffartuussinissamut periusissanik ilikkarniarlutik kimigiiserpata, qularinngilarput qangali erinigisaq kikkut tamat Upperisap iluani sammisaqartitani peqataasalernissaat siumut aallarluni angusassatut qularnaarneqassaaq.
Unamminartoq tamanna naapinneqassappat, uppertut aqutsiviillu uppertunut kiffartuussisut najugarisaminni eqimattakkuutaani institutit ingerlaasiat nukittorsassavaat, najugarisallu iluani ilinniaqatigiittarnermi ilitsersuisutut (tutoritut) ingerlatsisinnaasut amerlisarujussuarlugit; tassami nassuerutigisariaqarpoq periarfissat ikinngutinut maanna ammasut nunaqarfinni eqqaamioriillu akornanni eqeersimaartumik pisoqarfiulluartumillu
pilersitsinissamut aqqutissiuisut, siunertaqarnermillu misiginermik ulikkaaqqasut, taamaallaat pilersinnaasimapput ukiuni qulikkaajusuni kingullerni ineriartornerit pingaaruteqarluinnartut ilaat Bahá’í-‐‑t kulturiannut ilaalluinnartoq pilersinneqarsimasoq pissutigalugu, tassa itinerusumik upperisamut tunngasunik paasiniaasarneq toqqammaveqarluartunngortinneqarsimammat.
Decembari qaammat 1995-‐‑imi nunarsuaq tamakkerlugu institutinik sungiusarfissanik pilersitsinissaq kaammattuutigigatsigu, periuseq taamani inooqatigiit Bahá’í-‐‑t akornanni nalinginnaanerusumik atuuttoq tassaasimavoq uppertoq Upperisamut tunngassutilinnik itinerusumik paasisaqaleqqullugu ikiorneqartassasoq, annerusumik kursusit ilinniaqatigiittarnerillu assigiinngitsunik sivisussuseqartartut assigiinngitsunillu qulequtaqartartut atorlugit. Taamani inooqatigiit Bahá’í-‐‑t nunarsuaq tamakkerlugu sassariartuaartut ikittunnguugaluanik ilaasortaqarlutik nunarsuarmi siammarnerunissaq annerusumik ulapputigaat. Taamaattoq taamanili ersarissarparput Upperisatta allagaataannik misissuisarneq allatut periuseqarluni aalluttariaqartoq, inuppassuarnik ataatsikkut iliuuseqarsinnaanissamik kimitsisinnaassuseqartumik amerlasuukkuutaarlutik Upperisamut isaalersussat amerliartorlutillu sukkatseriataassagaluarpata upalungaarsimaffigisinnaaqqullugit. Tassungalu atatillugu uppertut amerliartuinnartut Upperisamut ikiuussinnaalernissaat anguniarlugu institutinit sungiusarfissanik pilersitsisoqassasoq, tassanilu kursuseqartoqartassasoq ilisimasat, paasisat piginnaatsillu suli siammariartulernermut patajaallisaanermullu pisariaqartinneqartut ilinniarsinnaaqqullugit.
Allagaatit atuartarnissaat aammalu Bahá’u’lláhp saqqummernerata nalissaqanngitsup pingaaruteqassusiata pitsaanerusumik paasisaqarfiginissaa anguniarlugu ilungersuuteqarnissaq, tamakkuupput malinnittuisa tamarmik pisussaaffii. Kikkut tamarmik peqquneqarput Saqqummernerata imarsua aqqarfigalugu misissuiffigissagaat ilisimassutsillu sapangai tassani toqqorsimasut nassaaralugit, namminneq piginnaatsitik kajumigisakkatillu naapertorlugit. Taamaalilluni pissusissamisoortutut najugarisani itinerusumik paasisaqarniarlutik katersuuttartut pilerput, aamma vinter-‐‑ aamma sommerskolit aammattaaq pilerput immikkut naapeqatigiisitsisarnerit uppertut ataasiakkaat Allagaatinik ilisimasaqarluartut Bahá’í-‐‑tut inooriaaseqarnermi qulequttanik namminneq ilisimasaqarluarfigisaminnik saqqummiiffigisartagaat. Soorlu Bahá’í-‐‑p kinaassusianut ullut tamaasa Allagaatinik atuartarneq ilaalluinnartuujuassasoq, aamma taamatut paasiniaaqatigiittarnerit inooqatigiit akornanni inuunerannut ilaalluinnartuupput. Taamaattoq Saqqummernerup qanoq imaqassusia, ingammik inuttut ineriartornissaq taamatullu inooqatigiit akornanni siuariartornissaq eqqarsaatigalugu, aatsaat annertusisussaavoq paasiniaasarneq kiffartuussinerlu imminnut ataqatigiisinneqalerlutillu sanileriillutik piviusunngortinneqartalerpata. Tassami kiffartuussinerup aqqutaani ilisimasat misilerarneqartarput, misilittakkat tunuliaqutaralugit apeqqutit nutaat takkussortalissapput paasinneriaatsillu nutaat anguneqartalissallutik. Maanna nunani amerliartuinnartuni isorartuukkut avinngarusimasuniikkaluartulluunniit angusinnaalerlugit ilinniartitsisalerneq siammariartuinnartoq aqqutigalugu ilinniaqatigiittarneq, tutori Ruhi Institutillu ilinniarnissamut pilersaarusiai sakkugalugit nunarsuaq tamakkerlugu Bahá’í-‐eqatigiit piginnaaneqalersimapput tusintilikkuutaat allaallumi millionilikkaat eqimattannguakkuutaarlutik Allagaatinik paasiniaatittalersinnaalerlugit allamik siunertaqanngitsumik taamaallaat Bahá’í-‐‑t ilinniutaat timitalerneqarsinnaanngortillugu, taamalillugu Upperisap iluani suliassat alloriarnissamut tullinnguuttumut ikaarsaarsinnaanngortillugu, tassa ataavartumik siammasissorsuarmik siammalertornissamut patajaallisaanissamullu.
Taamaammat periarfissat tamakku pilersinneqarsimaneri kialuunniit arajutsinngikkiligit. Maleruutiinnalerneq nalitsinni nukiit inuiaqatigiit iluanniittut pilersitaraat. Aliikkusersorneqarnissamik kajumissaarneqarneq meeraanerulli nalaani pikkorilluinnartumik kaammattuutigineqartaannarpoq, taamaalillutik kinguaariit arlallit misigissutsinik ikkattunik pilersitsillaqqissunut kikkunnulluunniit aqunneqarnissaq tunniutiinnarfigisaannarpaat. Ilinniartitaanermissaaq periutsit amerlasuut aaqqissugaanermikkut ilinniartut paasissutissanik tigooraasussaannartut allaat isigisalersimavaat. Bahá’í-‐‑t silarsuaanni kulturimik pilersitsisoqarsimanera eqqarsartaatsikkut, ilinniarnikkut iliuuseqarnikkullu kikkut tamat peqatigiillutik kiffartuussinerup aqqutaatigut ingerlaaqatigiinnertalik – imminnut kaammattoqatigiinnertalik siumukaqatigiinnertalillu, sukkulluunniit allap ilisimasaanik ataqqinninnertalik, inunnik qaammassakitsunut qaammaassaqarnerusunullu immikkoortitsiniarnermik peqanngitsoq – angusaavoq tupinnaannartumik annertussuseqartoq. Tamatumalu iluaniippoq ingerlaarnerup unitsinneqarsinnaanngitsup sunniisinnaassusiata kimia.
Avaqqunneqarsinnaanngitsumik ilinniaqatigiilluni katersuuttarnerup iluani ingerlaatsip perorsaanertaqartup pitsaassusia ukiumi aggersumi suli malunniutilimmik qaffassartariaqarpoq, nunaqqatigiit eqqaamioriillu sunniisinnaassusiisa kimingat piviusunngortinneqarsinnaassappat. Tassani tutorit qitiulluinnartumik inissisimasuupput. Taakkununnga unamminartussaavoq avatangiiseq institutimi kursuseqartitsisarnermi takorluugaasoq pilersinniassallugu, tassa peqataasut anersaakkut nukittorsarneqarsimallutik misigisimalissapput, namminneq ilinniarnerminni eqeersimaartumik ingerlatseqqiisussatut imminnut isigilerlutik, ilisimalersimasatillu inuttut inuiaqatigiinnillu nutarterinissamut atornissaannut sorsuutiginnittuartutut. Tamanna pissanngippat nukik allanngortitsinissamut kimitsisuusussaq qatangiinnassaaq, qanorluunniit amerlatigisunik nunaqqatigiit iluanni ilinniaqatigiilluni katersuuttartunik pilersitsisoqassagaluarpat.
Tutorip suliassaa tassaassappat pitsaassuseqarluinnartumik annertusiartuinnartumik angusaqarnissaq, eqqaamasariaqarpoq nunagisap nunalluunniit immikkooortortaata iluani inuttut piginnaatsinik pilersitsiortornissamut akisussaassuseq annerpaaq institutimi sungiusaavimmiimmat. Peqataasussat amerlisarnissaata suliniutiginerata saniatigut instituti aaqqissugaanermigut – tassa siulersuisut, killiffinni assigiinngitsuni ataqatigiissaarisartut tutorillu inuinnaat akornanni sulisuusut – immikkut qulakkeertariaqarpaat periutsip sunniuteqarluarsinnaassusiata immikkut qulakkeerneqarnissaa, tassami inernissaa isigissagaanni suut angusassat kisitsisitigut piumaartussat qanoq pitsaatigisumik siumukarnerup ingerlaneranut attuumassuteqanngitsoortussaanngimmata. Eqimattakkuutaat eqqarsaatigalugit ataqatigiissaarisup nammineq misilittakkani sunniuteqarluarsinnaassutsillu piviusunngortissinnaanissaa isumagissavaa tutoritut kiffartorlutik suliaqartut suleqatiginerini. Akulikitsumik ataatsimeeqatigisassavai, namminneq suliniutitik isumaliutigilluarniartassammatigik. Institutimi atortussiani sammereersimasaagaluit ilaannikkut sammeqqittarlugit iluaqutaasinnaasarput, utertaarlugu sungiusaaginnarnermik kinguneqartitsinngippata. Tutorip piginnaasii annertusiartortarput iliuuseqarluni misiliisarluni ingerlatsinermini allanillu nunarsuaq tamakkerlugu pilersaarutaasunut tunniussaqaqqusilluni ikiuinermini, taamatuttaaq kursusit malinnaaffigeriarlugit timitalersuilluni iliuuseqarnissamut innersuutitaanik malittarinnitsilluni. Arnat angutillu qanorluunniit ukioqaraluartut tutorinik tapersersorneqarlutik kursusit naammassiortorpatigit, allat piareersimasariaqarput timitaliillutik namminneq piginnaatsitik soqutigisatillu aallaavigalugit kiffartuussiniarneranni ikiuuttussat – ingammik ataqatigiissaarisunut meeqqanik, inuusuttuaqqanik ilinniaqatigiillutillu katersuuttartussanut akisussaaffeqartunut timitaliilluni kiffartuussinerit periutsip ingerlaannarnissaanut pingaaruteqarpoq. Periutsit tamakku iluanni uummaarissuseq tulluuttoq piujuaannassappat, nunani tamani qaammatini aqqaneq marlunni tullinnguuttuni ilinniarneq pimoorussisoq aallunneqartariaqarpoq.
Meeqqat anersaakkut perorsarneqarnissaat pillugu ernumassuteqarneq Bahá’í-‐‑t inooqatigiittut kulturiannut ilaajuartuusimavoq, ernummateqarnerlu tamanna piviussutsinut marlussunnut imminnut atasunut avinneqarsimavoq. Siulleq Iranimi ikinngutit periusiannit tigusaasimavoq, tassanilu klassiniit klassinut tulleriissaaraluni Bahá’í-‐‑t meerartaannut atuartitsisoqartarsimavoq, annerusumik siunertaralugu Upperisap oqaluttuassartaa ilinniutillu suunersut kinguaariinnut tulliuttunut tunngaviusumik ilisimasaqarfiulissasoq. Nunarsuup sinnerani taamatut atuartitseriaaseq atorlugu ingerlatsineq iluatsippallaarsimanngilaq. Piviusut aappaat nunaannarmi illoqarfinnilu Upperisamut isaasoqarfiungaatsiartuni pisimavoq. Misilittakkap tamatuma isiginneriaaseq aalajangersimasoq tamakkiisuunerusoq aallaavigisimavaa. Naak meeqqat angerrlarsimaffinniit assigiinngiiaartunit ingerlaannaq meeqqat ilinniartitaanerannut ilaaqqusaallutik tikilluaqqusaagaluartut, assigiinngitsut pissutaallutik ingerlaavartumik ukiumiit ukiumut ingerlanneqarnissaa pisinnaasimanngilaq. Nuannaarutigaarput marloqiusaassuseq tamanna, oqaluttuarisaanerup nassataanik pilersimasoq maanna atorunnaalermat, ikinngutillu tamani tamaani najugallit institutit aqqutigalugit sungiusarneqarsimasut tamanut ammasumik tulleriissaarinerusumik periuseqarlutik ilinniartitsisalermata.
Aallartisarnerit neriulluarnartut tamakku eqeersimaartumik malersorneqartariaqarput. Piffinni eqimattakkuutaarfiusuni pimoorussisamik ineriartornissaq anguniarlugu sammisaqartitsinernik aallussiviusuni pisariaqartinneqarpoq meeqqat amerliartuinnartut ilaqutariinnit assigiinngiiaartunik tunuliaqutaqartut anersaakkut perorsarneqarnerisa aaqqissugaanerusumik periarfissinneqarnissaat – inooqatigiit eqqaamioriinni nunaqarfinnilu siuariartuinnarnerisa pisariaqartitsineq taamaattoq atorfissaqartilersimavaat. Suliassaq imaannaanngitsuussaaq angajoqqaat aqutsisoqarfiillu naammagittarlutik suleqatigiillutillu ingerlattariaqagaat. Ruhi Instituti peqquneqareersimavoq meeqqanik ilinniartitsisinnaasunik kursuseqartitsisarnissamut pilersaarusiatik sukkanerusumik naammassiniaqqullugit, taakkulu ukioqatigiinnut assigiinngitsunut avititersimassapput, meeqqat tallimat arfinillillu akornanni ukiulinniit qummut qulinut aqqanilinnullu ukiulinnut. Taamaalilluni maanna taamatut ukiullit inuusuttuaranngortullu akornanni ilinniusiat pilersinneqarsimasut soorlu makku: Spirit of the Faith (Upperisap anersaava) aamma Power of the Holy Spirit (Anersaap iluartup pissanera) eqqarsaatigalugit avissaanganeq matuneqarsinnaaqqullugu. Taakkua Bahá’í-‐‑ussuseq eqqarsaatigalugu taamatut ukiulinnut atortussiaapput ersarissut. Kursusit atuartitsinerillu taamaattut pilersiortorneqartillugit institutit nunani sumiikkaluartulluunniit ilinniartitsisussat ataqatigiissaarisartussallu piareersarsinnaalissavaat meeqqat anersaakkut perorsarneqarnerisa qitiusumik pilersaarusiat naapertorlugit klassikkuutaarlugit immikkoortitersinnaalernissaannut, taava taakku avataatigut sammisat allat tamatumunnga attuumassutillit aaqqissuunneqarsinnaapput. Tamakku saniatigut institutit pisinnaasannguartik tamaat isumaginiassavaat ilinniartitsisut meeqqanik assigiinngitsunik ukiulinnik ilinniartitsisussat pisariaqartitaat naapertorlugit atortussaannik tulluuttunik pilersussallugit, ilaannikkut atortooreersut toqqammavigisarlugit.
Nunarsuaq Tamakkerlugu Ilinniartitsinissamut Qitiusoqarfik Ukiunut Tallimanut Pilersaarusiap anguniagassartaannut taama pilertortigisumik angusaqartarnermut suliniutini pingaaruteqarluinnartuni sunneeqataalluarsimanera pillugu qujamasuffigiuarparput. Suliniut taamaattoq nunarsuaq tamakkerlugu aallussiviusoq pillugu nukimmik tunisiuarsimapput, tassami nikallujuillutik nunavissuarni tamani siumukarneq Nunavissuarni Siunnersortit suleqatigalugit malinnaaffigiuarsimavaat, tamannalu takullugu soorlu takuinnaripput Aqutsivittut Aaqqissuussap ilumini nukissuaq pigisaa innaallaannartartorlusooq. Maanna Ilinniartitsinermut Qitiusoqarfik sunneeqataasinnaassutsini taanna apeqqutinut eqimattakkuutaani suliniuteqarnermut tunngassutilinnut saatsikkuniuk, qularnanngitsumik Bahá’í-‐‑t meerartaasa ilinniartinneqartalernissaannut tunngasut aamma immikkut sammissavaat. Qularinngilarput eqimattakkuutaani ataasiakkaani immikkut qinikkani assigiinngitsunik tunuliaqutaqartuni misilittagaasimasut misissorsimasatik aallaavigalugit ukiumi aggersumi iliuuseqarfigisinnaasatut periarfissat suunersut qulaajarumaaraat klassinik ingerlaavartunik ingerlatsiviusinnaasut, qanorluunniit ukioqaraluarpata, eqqaamioriinni nunaqarfinnilu sumiikkaluarpata.
Asasavut ikinngutit. Qasseerpassuariarluni Naalakkatta asasatta (‘Abdu’l-‐‑Bahá-‐‑p) neriuutigingaakkani oqaatigisarsimannginnerpaa uppertut imminnut asaqatigiingaarlutik uummataat ulikkaaqqassasut nammineq takorloortarini, killeqarfiillu avissaartitsisimaneri soqutiginagit inuiassuit ilaqutariittut ataatsitut isigigaat. “Takornartatut naatsorsuussassanik isigisaqanngikkisi” taama oqaassivoq, nangillunilu: “paarlattuanik inuit tamaasa ikinngutitut isigisigit, asanninnermi ataasiussuserlu aqqutissaasuassapput assigiinngissuseq kisiat ukisiinnassagussiuk.” Quppernerit siuliini ineriartornerit sammisavut tassaaginnarput asanninnerup tamanik aqqusarinnittup Anersaap Iluartup pissaaneranit pilersimasup takussutissartai. Suummi allap taamaallaat Guutip asanninnerata takornartanngortutut misigisimanerup avissaartuunnerlu assiaqutai nungutissinnaavai, uummatillu kukkusussaanngitsumik ataasiussuseqalersillugit? Asanninnerata kimitsinerata kiffartuussinissap aqqutaanut ingerlatitarinnginnerpaasi, tarningillu tamat iluanni Guutimik ilisimannissinnaassuseq pallorfiginnittuunerlu takusinnaalersillugit? Saqqummernerata inuiassuarnut asanninnini pillugu kajumilluni naalliutsitaasumik inuunissani toqqarsimagaa ilissi ilisimatillugu eqeertutut kajumissuseqalinnginnerpisi? Akornassinniittut qiviarsigit qatanngutisi Bahá’í-‐‑t Iranimiittut. Guutimut asanninneqarluni kiffartorusullugulu piumassuseqarnermut nukimmik peqassuseqarnermut assersuutaannginnerpat? Malersorneqarneq naalliunnangaartoq ajungaartorlu atoraluarlugu illuanut saatillugu takussutissaannginnerpa nunarsuaq tamakkerlugu inuit naqisimaneqartut millionilikkuutaat arlariit piginnaasaannut Guutip Naalagaaffiata nunami maani pilersinneqarnissaanut malunniuttussamik pilersitsiniarlutik nikuittunut? Inuiaqatigiit iluanni inooriaseq pillugu avissaartuussinerit nikalluutiginagit ingerlaqqigitsi Bahá’u’lláh-‐‑llu oqariartuutaa tarninut eqqaamiorisassinniittunut, nunaqarfinniittunut, nunarsuullu teqeqquini sumiikkaluartunut apuullugu, inooqatigiittut Aaqqissuussagaanut Aqqit Annersaata malinnittaannut kajumilersunngortissigik. Isummatsigut qinnutitsigullu qimanngisaannarpatsigit, Ajugaqanngitsorlu qinnuigiuassavarput Saammaannini tupinnartoq aqqutigalugu nukittorsartuinnaqqullusi .
- The Universal House of Justice