Return   Facebook

The Universal House of Justice

Ridván 2011

To the Bahá’ís of the World

Dearly loved Friends,

Ukiup ingerlanerani pisussat nutaat aallartiffianni matumani, Báb-ip Ilerfata ataqqinartup napasuliartaata qaarajunnera kuultimik qalligaq kusanartorsuaq qanittumi uleerneqartoq isigalugu isivut takoranningaartumik takusassinneqarput. Maanna illorsuaq nutartemeqarsimalerpoq Shoghi Effendip siunertaa tunaartaralugu kusanassuseq qilammiorpaluttumik akisunnilik nunamut, immamut, qilammut ulloq unnuarlu tamanut seqersinnaanngoqqullugu, taassuma iluani ilineqarsimasup iluartup ataqqinangaassusianut illernangaassusianullu uppernarsaatissatut.

Pisup qiimasunnartup tamatuma Pilersaarutip Guuterpaluttup uleeriartornerani kapitalip ilimanaateqarluartup naggaserneqamerata ingiaqatigaa. Maanna Ukiuni Ilusilersorfiusuni ukiuni untritilinni ingerlasimasuni ukiut qulikkaartut nunngutaat naajartulerput, ukiut untritillit siulliit taakku 'Abdu'l-Baháp kingornussassiamisut allagaata avaaginnilluni tuniuisup ataani ingerlasussiaapput. Ukiunut Tallimanut Pilersaarusiap maanna naasup ukiumigut amerlaqateqartoq kingoraartigissavaa, taassumalu imassai Bahá'í-t silarsuaanni sukumiisumik qimerloorluameqalereersimapput. Ilumullumi Nunavissuarni Siunnersortit Ataatsimeersuarnerannut nalunaarusiarisimasatsinnut qaammatillu aqqaneq marluk matuma siorna Ridvánimi Nalunaarusiatsinnut qisuariaataasimasut qujamasuutigingaarpavut. Imarisaat pillugit ilaannakortumik paasisaqarumanatik ikinngutit nalunaarutit taakku misissorlugit uteqqiaffigiuarpaat, inuttut ataasiakkaatut allanillu peqateqartarlutik, ataatsimiinnerni pisortatigoorpalaarnerusuni aammalu pilersaarutaanngikkaluamik naapittarnerminni, eqimattakkuutaatut eqqaamioriiffimminni ineriartornissaq anguniarlugu sammisassiat siumut ilisimatinneqareersimallutik eqeersimaartumik peqataaffiginerisigut taakkununnga tunngassutilinni paasinninnerat annertusarneqartuarpoq. Taamaalillutik nunarsuaq tamakkerlugu inooqatigiit Bahá'ít qaammatit arlaqanngitsunnguit atorlugit ukiunut qulikkaartunut tullinnguuttunut aallartilluarnissamut pisariaqartitatik pinasaaratik upalungaarsarfigisimavaat.

Piffissamissaaq tassani nunavissuarni assigiinngitsuni naalakkersuisut inuiaallu politikkikkut aalassassimanerit aningaasarsiornikkullu paatsiveerussimanerit qalleriiaattut isukkaassimapput. Inuiaat ilaat mumisitsinerup alloriusaanut apuussorsimapput, ilaalumi malunnartumik killissaa akimorlugu iserfigereerlugu. Nunani siuttuusut paasilerpaat sakkut pisuussutsillu isumannaatsuunissaq anguniarlugu sakkuusinnaanngitsut. Inuiaat pingaartitaat piviusunngortinneqarsimanngikkaangata, uumisunneq puttallartaraaq. Bahá'u'lláhp nunarsuarmi siuttunut qanoq ersaritsigisumik oqaaqqissaarinerata ersarissusia tassani siunitsinniisipparput: "Innuttasi tassaapput erlinnartuutisi. Naalakkersuinersitoq Guutip peqqusaannut killuussisuunngikkili, ilissilu oqartussaanersi tillittup assaanut tunniullugu." Oqaatsit mianersoqqussutit makku oqaatigissavagut: Inuiaat allanngornissamut kajumissuseqarlutik iliuuseqarlutik takutittagaat qanorluunniit tiguartinnartigigaluarpata, eqqaamasariaqarpoq pisut tulleriiaamissaannut pututitsiniaasunik siunertaqartoqartarmat. Taamaammat Nakorsap Guuterpaluttup katsorsaatissaatut atoqqusaa atorneqanngippat, ukiuni makkunani atugarliuutit atuuttuassapput annertusiartuinnarlutillu. Nalitsinni malinnaalluartup kialuunniit ingerlaannaq maluginngitsoorunnanngilaa suujunnaariartorneq annertusiartuinnartoq unittussaanngitsumik tikilajuartuusoq nunarsuup aaqqissugaanera naakkinaannartumik amigaateqaqisoq tamanut nittarlugu.

Taamaattoq paarlattua aamma appakaakkiartortoq malunnarsiartorpoq, pisartunut kinguneqarluartussanut Sernissuisup "Bahá'u'lláhp Upperisaanut sikkeriartortumut" tunngatitaa, aamma "Nunarsuarmi Aaqqissugaanerup Nutaap nalunaariartortua Upperisap ungasinngitsumi pilersikkumaagassaa"-tut eqqartugaa. Sunniutai toqqaannanngikkaluartut inuiaqatigiit iluanni ineriartornissamut peqataanissamut erinisunnermit aallaaveqartut, ingammik inuusuttut akornanni puilasutullusooq malunnarsiartuinnarput. Tamanna tunissutaavoq Kusanassutsip Qangarsuaaneersup malinnittaannut pissarititaasoq, nunami sumiluunniit kipisuitsumik inuup anersaanit aallaaveqarluni puttallarsimasoq, pissutsinullu ersersitsilluarluni malunniuttaraaq nunarsuarmi innuttaasut assigiinngiiaartut akornanni iliuuseqarsinnaanermut kinguneqarluartussamut piginnaanngorsaalluni inooqatigiit Bahá'í-t suliniuteqarneranni. Pisinnaatitaaneq taamaattoq allamik assissaqarnerpa?

Suliamut taamaattumut itinerusumik paasisaqarusuttoq uppertoq kinaluunniit 'Abdu'lBahámut saalli, taassumami Egyptenimut Nunanullu Killernut "angalanera ukiunut nutaanut kinguneqangaartitsisussaq" ulluni makkunani hunnorujunngortorsiorfiuvoq. Ilinniutit pillugit qasusuilluni sumiluunniit inuit katersuuffiini nassuiaajuarpoq: angerlarsimaffinni, ajoqersuisoqarfinni, oqaluffinni synagogenilu, naatsiiviliarsuarni illoqannginnersanilu, qimuttuitsut qamutaasa iluini, umiarsuarnilu imavissuakkut ikaartaatini, peqatigiiffinni kattuffinnilu, atuarfinni ilisimatusarfinnilu. Ilumuussuseq illersorniarlugu killissaanani, taamaattoq pissusimigut saamalluinnarluni, tunaartarisassat guuterpaluttut nunarsuarmut tamarmut atuuttussat nalimini pisariaqartitanut naleqquttunngorlugit apuussortuarpai. Tamanut assigiimmik — pisortat atorfilittaannut, ilisimatuunut, sulisartunut, meeqqanut, angajoqqaanut, nunaminniit qimaatitanut, isummanik siaruarterinianut, palasinut, qulartunut — asanninneq, ilisimassuseq, toqqissisimaneq, pisariaqartitarlu sunaluunniit tunniussuuttuarsinnarpaa. Tarningi pisuttorsartuarlugit isummiussimasaat unammillertarai, siunniussimasaat ilorraap tungaanut saatillugit, tarnimikkut nalunngissusiat eqeertillugu allisarlugulu, nukissaasigullu tappinnerussuseqalersillugit. Oqaatsini iliuutsinilu atorlugit misigeqatiginninneq tukkussuserlu ima annertutigisoq takutippaa, allaat uummatit allanngortilluinnartarlugit. Kinaluunniit tununneqanngiIaq. Ilorpiatsinnit neriuutigingaarparput angalasimaneranit ukiuni untritilinnik qaangiuttorsiorfiusuni Naalakkap oqaluttuassartaa assissaqanngitsoq utertuarneqartarumaartoq, nuannaartorinnittaannullu ilumoortunut qanortoq nukittorsaallunilu isumataarnartuugili. Maligassiuinera isissi saaniitikkisiuk kiinarsilu tassunga sammitittuinnarlugu; Pilersaarutillu anguniagaanut angusaqarniarlusi sulissutiginninnissinni kimitsisorigisiuk.

Inooqatigiit Bahá'í-t akornanni nunarsuaq tamakkerlugu Pilersaarusiaq siulleq aallartisarneqarmat, Shoghi Effendip oqaatsit tiguartinnartut atorlugit tulleriissaarlugu eqqartorpaa qaamaneq guuterpaluttoq qanoq Siyáh-Chál-imi ikinneqarsimasoq, saqqummernerullu qullianit poorneqarsimalluni Baghdádimiinnera, qanorlu Asiamut Afrikamullu siammarnersoq suli naarallannerusutut Adrianopelimi kingusinnerusukkullu 'Akkámi qaammariartortilluni, taavalu qanoq imavissuit ikaarlugit nunavissuarnut apuunnersoq, annertusiartuinnartumillu nunarsuup naalagaaffiinut naalakkersugaqarfinnullu allanut siammariartornersoq. Taamatut ingerlaarnerup naggatissaa tassamerarpaa "qaamarngup taassuma ... nunarsuarmi nunat sinnerinut seqerfissaa"-tut, eqqaallugulu "tassa Guutip Upperisaata ajugaagajuttup qaamanerata qaammarinnerpaalluni akisunnerpaallunilu nunarsuassaaq tamaat poorlugulu siammarfissaa." Naak anguniagaq tamanna suli eqquuteqqajanngikkaluartoq, qaamaneq taanna maanna ikummareqaluni nunani tamani tamaani naarallattalereerpoq. Nunat ilaanni eqqaamioriit katersuuttarfianni tamani qaammarippoq. Qaamarngup qaminneqartussaanngitsup taassuma ikinneqaqqaarfiani qaammaareqaluni ikualavoq, naak qamitsinianit qaminniarneqarusukkaluarluni. Nunani assigiinngiiaani qaammaarissiartuinnarpoq nunaqarfiit eqqaamioriillu tamakkertarlugit, naneruutit tulleriiaat uummammiit uummammut Isumassuisup Assaanit ikinneqaraangata; inuit qanorluunniit naaperarfianni isumatuumik oqaloqatigiittarneq qaammarsartuarpaa; suliniutillu ujameriattut inuit atugarissaamissaat siunertaralugu pilersinneqarsimasut qinngortarai. Sukkulluunniillu uppertup aalajaatsup kiinaani qillaarpalukkaangami, inooqatigiit eqeersimaartut akornanni qaamaguni, Anersaakkut Isumasioqatigiit asaqatigiittut qeqqanni qinngoruni — taakku tamarmik tassaapput qaamarngup qinnguai taarsiornermut ungoorisut.

Iluunngarluta Alloriusap Illernartup saavani qinuvugut, tamassi minitaqarasi innermik nunguttussaanngitsumik tigumiartusi, uppernerup innaallattarnera allanut ingerlateqqikkaangassiuk Bahá'u'lláhp uppernarsaqqiineranik kimittuumik

 

Windows / Mac