The Universal House of Justice
Ridván 2013
To the Bahá’ís of the World
Dearly loved Friends,
”Guutip Atuagaa mapperluinnarsimavoq, Oqaasiisalu inuiassuit Imminut aggersar-pai.” Oqaatsit taama qiimasunnarluinnartigisut atorlugit Allaatit Annersaasa ulloq kateriffik ataatsimoorfillu pitarutilertulersoq pillugu taamatut allaaserisaqarpoq. Bahá’u’lláh-lu nangippoq: ”Siutisi saangertissigit Guutip Ikinngutai-aa, nunarsuup ajortuliorfigisimasaata Nipaanut, sunalu Guutip Siunertaata qaffassarneqaatissaa sapanginnaveersiuk.” Nangillunilu Malinnitsini kajumissaarpai: ”Ikinngutinnerluinnassusermik ilumioqarlusi ataatsimoornermillu innarligassaanngitsumik peqarlusi peqatigiigitsi isumasioqatigiittarlusi, inuunissilu iluatinnartut ulluisa ingerlavianni nunarsuup ilorraap tungaanut aallartinnissaanut imminut tunniusimasunngortigitsi Naalakkap Qutsinnersaasup Qangasuaaniilli piusup Siunertaa siuarsarlugu.”
Suleqatit asasavut: Oqaatsit aalaternartut taakku ingerlaannaq eqqaasarpavut nunarsuarmi sumiluunniit Bahá’u’lláhp kajumissaarinera piviusunngortiniarlugu iliuutsisi illernartut malinnaaffigigaangatsigit. Aggersaaneranut qisuariaatit pitsaaqisut sumiluunniit takussaapput. Pilersaarutip Guuterpaluttup siaariartornera isumaliutiginiarlugu unikaallattup kialuunniit Guutip Oqaasiata pissaanerata arnat, angutit, meeqqat inuusuttullu uummataasa iluanni qanoq kimittulluinnartigisoq arajutsisimanngilaa, nunani paarlakaattuni sumiikkaluartuniluunniit, eqimattakkuutaarlutik katersuuttartut qanoq ikkaluartulluunniit akornanni.
Inooqatigiit nunarsuaq tamakkerlugu siassimasut pissutsit piviusunnguleratartut saanni takunnissinnaassusiat suli tappinneruleriartorpoq, periarfissanut qulaajaasinnaassusiat Ukiunullu Tallimanut Pilersaarusiap sakkussai periusissaallu pissusissamisoortumik atuutilernissaat sulissutigaat. Soorlu ilimagereeripput, eqimattakkuutaartuni ilinniarnissap killeqarfii allaat tikillugit peqqissaartumik siuarsaaffiusuni pilertoqisumik misilittagartussuseq annertusiartorpoq. Taamatut pisoqarfiusuni, inuit amerliartuinnartut kiffartuussinissamut piginnaaneqalersinnissaannik periarfissiinissaq qanoq aqqutissiorneqarsinnaanersoq paasisimaneqarluarpoq. Institutsi sungiusarfik uummaarissoq inooqatigiit Pilersaarusiap siuarsarneqarnissaanut ilungersuuteqarneranni sukaavoq tunngaviusoq, sapinngisamillu siusinaarlutik piginnaatsit periutsillu institutini pikkorissaasarnerit aqqutigalugit ineriartortitat ulluinnarni inuunermut akuusarnermi atugarilertarpaat. Ilaasa ulluinnarni inoqatiminnut akuusarnerminni tarningit anersaakkut tunngassutilinnut paasisaqarnerujumallutik misissueqataanissamut ammasuusut siumortarpaat assigiinngitsut aqqutigalugit; ilaasa nunaqarfimmi illoqarfiulluunniit immikkoortortaqarfiini anersaakkut qisuariartartunut piareersimasuulersarput, immaqa nunaqarfimmut najugaqarfimmulluunniit tassunga nuussimanermikkut. Amerliartuinnartut akisussaaffimmik tigusillutik nikuittalerput, taamaalillutik tutoritut (ilitsersuisutut), kimitsisuusartutut, meeqqanik ilinniartitsisutut; ataqatigiissaarisutut aqutsisuusartutullu; allatulluunniit suliassanik tapersersuillutik suliaqartuullutik kiffartuisartut amerlisangaatsiaqalugit. Ikinngutit ilinniarumallutik kajumissuseqarnerat namminneq nakimaallutik iliuuseqarniarneranni malunniuttarpoq, aamma allat nakimaallutik iliuuseqarniartut ingiaqatigiumallugit piumassuseqarnermikkut. Tamakkuttaaq saniatigut nunap immikkoortortaqarfiani pisussat ilimanaateqarluartut imminnut tasiortutullusooq ittut najugarisaminni iliuuseqarfissat ineriartortut aalajangiussisimallutik nakkutigiuarpaat: siulleq tassaavoq qaammatini pingasuni iliuuseqarfissat tulleriiaartarfii – ineriartornerup siunertarisaata tillernera aalajangersimasumik ingerlaneqartoq – aappaallu meeqqat, inuusuttuaqqat, inuusuttut inersimasullu ilinniartinneqarnerini tulleriiaarnerit ersarissut. Pisut pingasut taakkua imminnut ataqatigiissusiat paasilluareersimallugu, ikinngutit ilisimaarilluarpaat immikkoortut taakku tamarmik immikkut ingerlaarfeqartartut, immikkut piumasaqaateqartuusut tamarmillu iluminni iluanaarnartoqartuusut. Pingaarnerpaatulli arajutsisimanngilaat anersaakkut nukiit kimittuut tamakkunani ingerlaarmata, sunniutaallu inooqatigiit iluanni siumukariartornermi paasissutissat katersat annertussusianni takuneqarsinnaasut, angusallu pillugit nalunaarusiarpassuarni. Immikkut ilippanaateqartoq tassaavoq pisuni tamakkunani immikkooruteqartuni takulertornartunilu anguniagaqarfiit siuarsimanerusut tamakku inooqatigiinni aatsaat pileqqaartut akornanni allaat aamma takussaammata.
Ikinngutit misilittagaat annertusiartuinnartillugit, anguniagaqarfiit iluanni inooriaaseq pisorpassuaqarfiusussaq katiteriffiusorlu pilersissallugu piginnaaneqaleriartorput, allaat inuit untritilikkaat ilalumi tusindilikkaat akuuffigisinnaasaat pileriartorluni. Nunannaarutigingaaqaarput uppertut suliniutit aqqutigalugit annertusiartuinnartumik paasisimasaqaleriartornerat takusinnaagatsigu. Assersuutigalugu Pilersaarusiap siuariartornera ilutigalugu anguniagarfiit iluanni pissutsit nikeriallaqqissusiat paasisimammassuk, pisullu tamakku naammassiuminaassinnaasartuusut imaaliallaannagassaanngitsut paasisimammatigik. Takusinnaavaat pisoq tamanna siumut ingerlaartuusoq inuit piginnaanillit nassaariortorlugit namminneq piginnaaneqaleriartornermikkut, iliuuseqarniarlutillu nikuittartut iliuusissaat ataqatigiissaariffigalugit aaqqissuuttarnerisigut. Ikinngutit paasilersarpaat piginnaatsit taamaattut annertusiartuinnartillugit periarfissat amerlanerusut ilanngussuiffigissallugit annertusisartut. Taamatuttaaq paasilersimavaat periuseq nutaaq eqqunneqaraangat piffissap aalajangersimasup iluani tamanna immikkut sammineqaqqaartariaqartartoq, taamaattoq inooqatigiit iluanni suliniutaasa allat pingaaruteqassusianik annikillisaaneq ajortoq. Paasereersimavaammi ilinniarneq periuserissagunikku, Pilersaarusiap piffissami aalajangersimasumi tulluuttumik periarfissiisarnera eqeersimaariffigisariaqarlugu, pisariaqarfiusunilu ineriartoqqeqqullugu nukimmik annerusumik atuisariaqarlutik; taamaattoq imaanngilaq kikkut tamarmik Pilersaarusiap qulequtaannik aalajangersimasumik ataatsikkut sammisaqartuusassasut. Ikinngutittaaq ilikkarsimavaat ineriartornerup iluani tunaartarisassani annertusaavigineqarfiata nalaani iliuuseqarfissat tulleriiaartarfii ataasiinnarmik inerneqartussatut ittuusariaqanngitsut. Assersuutigalugu pissutsit apeqqutaatillugit iliuuseqarfissat tulleriiaarfiini pisariaqarsinnaavoq inuit Upperisamut ilannguteqqullugit qaaqqusiniarnermut piffissaq atorneqassasoq ilinniartitsinissamut ilungersuutit annertusarnerisigut, inuttut ataasiakkaatut inooqatigiittulluunniit ataatsimut; iliuuseqarfissat tulleriiaarfii allat immikkut sammisat tassaasinnaapput qitiusumik sammisaqartitsiviit immikkoorutillit allat aalajangersimasut annertu saavigineqarneri.
Aammattaaq ikinngutit nalunngilaat Siunertap ingerlaarnera piffinni assigiinngitsuni assigiinngitsumik sukkassuseqartartoq tamannalumi aamma pissuteqarluartarpoq – tassami tamakkiisumik isigissagaanni ingerlaarneq uumassuseqartumik ingerlaarnerugami – sunalu siumukarneq qanoq ikkaluartorluunniit takugaangamikku qiimasullutillu nuannartaraat. Tassami inuit ataasiakkaat ilungersuutigisartagaat kikkut tamat siumukarneqaatissaannik sunniuteqartuunerata pitsaassusia maluginngitsoorsimanngilaat, kiffartuussinerlu kimilluunniit aallunneqartoq, inuup nammineq atukkani aallaavigalugit suliarisaa tamanit tikilluaqquneqartarpoq. Eqqarsaqatigiinniarluni katersuuttarnerit annertunerujartuinnartumik periarfissatut inooqatigiit ataatsimoorlutik suliniutaasa asuliinnaanngitsumik pimoorussisumik nalilersorlugit tamanut qiimmaallaataasussamik oqalliffittut isigineqaleriartorput. Tassani peqataasartut sumiluunniit angusat pillugit, namminnerlu suliami tassani qanoq inissisimanerminnik ilisimatinneqartarput aammalu ineriartornerup iluani tunaartarisassat pillugit ilisimasaat annertusarneqartarlutik aqutsisoqarfinnit siunnersorneqarnermikkut uppertoqatillu allat misilittagaat paasisaqarfigisarnerisigut. Misilittakkanut tunngasut tamakku aamma assigiinngitsorpassuartigut ingerlateqqinneqartarput, soorlu ikinngutinit immikkut ilungersuuteqarlutik suliniuteqarlutik tiguartisimasunit nalinginnarmik anguniagaqartunit imalt. anguniagaqarfiit iluanni aalajangersimasumik sammisaqarlutik isumasioqatigiinnermut najuukkiartortartunit. Ilikkakkat tamakku tamarmik paasinninneq manna annertunerusoq aallaavigaat; sunaluunniit asanninnermik ilumikkerneqarsimatillugu siumukarneq qanoq ikkaluartorluunniit ajornannginnerusumik anguneqarsinnaasoq – tassani kukkuluttorsimanerit pingaarnerunatik akaarinninneq salliuvoq – aporfiusartut naammagittarneq sakkugalugu qaangerneqartarput periusiusarsimasullu misilittagaqarluarfiusut qiimasumik ilassilluarneqartarput. Taamaalilluni ikinngutit ilungersuutigisaat inuttut ataasiakkaatut qanorluunniit annikitsigigaluarpata, Upperisap aqutsiviisa ingerlatsiviisalu ilisimasumik sukkulluunniit siuttuusarnerisigut, ataatsimut iliuuseqarfinngortarput Kusanassutsip Pilluaqqusaasup qaaqqusineranut malussarissuseq sumiinnersoq pilertortumik siunersiniarlugu iliuuseqarfinngortussaq naggorissaaviusussarlu. Taamatut eqimattat anguniagaqarfiusut itsillugit nassuitsumik Pilersaarutip sukartai pingaarnerpaat pingasut tassaasut - inuit ataasiakkaat, aqutsiviit inooqatigiillu - akornanni ineriartorneq peqqissumik ingerlassapput.
Suliniutit taamatut naggorissumik ingerlasut iluanni immikkut taasarialimmik peqarpoq. Ukiut pingasut matuma siorna nalunaarutitsinni neriuutigalugu oqaatigaarput eqimattani anguniagaqarfiusuni ineriartornerup iluani tunaartarisassanik uummaarissumik aallussiffiusuni ikinngutit inuiaqatigiit iluanni piorsaanermik annertunerusumik ilinniassasut nunaqarfinni illoqarfiinilu eqqaamioqatigiit iluanni pimoorussisumik aallussivinnik pilersitsiortornikkut. Taamani neriuutigisatsitut eqqaasavut maanna sinningaaqalugit pisoqarsimavoq, allaat eqimattani anguniagaqarfiusuni ineriartornerup iluani tunaartarisassatut siunniussimasat pimoorullugit aallartinneqanngikkaluartulluunniit, inuit ataasiakkaat qitiusumik sammisaqartitsivinnik najugaqarfinni inuttoorsuunngikkaluani aallartitsisimapput, taakkulu kimeqarluartumik kinguneqartitsisarnertik utertuartumik takutittuinnartarpaat. Inuiaqatigiit iluanni Bahá’u’lláhp Saqqummernera ilinniutaalu aqqutigalugit anersaakkut nutaanngornissamut piareeqqasunut qisuariarnissaat aqqutissiorniarlugu suliniuteqarneq qitiusimavoq. Sungiusarluni institutip ilinniartitsinermik aallussinera aqqutigalugu inuiaqatigiit nalinginnaasut iluanni killissaanngissuseq soqutigisaqanngissuserlu atuutilersimaqisoq ajattussal lugu kiminneqartarsimapput, iliuutsillu inuunermik allanngortitsisartut qinissallugit aalaterneqartarlutik. Periuseq taamaattoq nunaqarfinni illoqarfinnilu eqqaamioqatigiinni ukiuni arlaqartuni siuariartuinnarsimatillugu, ikinngutillu eqeersimaartuaannarsimatillugit angusat malunniuteqarluinnartut arriikkaluamik qularisassaanngitsumillu ersarissiartuinnarsimapput. Inuusuttut imminnit nukanganerusunut ineriartornissaannut akisussaaffeqartutut misigisimatinneqartalersimapput. Utoqqaanerusut inuiaqatigiit iluannut tunngassuteqartunik isumalimmik oqallittoqartillugu inuusuttut ilapittuutaat qamanngavik tigullugit tikilluaqqusalersimavaat. Inuusuttut utooqqaanerusullu assigiillutik inuiaqatigiit iluanni periuseq perorsaasuusoq isumasioqatigiittarneq ineriartortippaat, tamatumalu nassataraa siunertaqartumik oqaloqatigiittarnerup pilernera. Taamaattorli, allanngoriartorneq Bahá’í-nuinnaq kisimi, qitiusumillu sammisaqartitsivinnut Pilersaarusiap kaammattuutigisaanut piffissap ingerlanerani nutaamik isumaliortaaseqalernissamik aqqutissiusussamut akuusunuinnaq atuutinngilaq. Anersaaruna najugarisami tassani pileriartortoq sunnerneqartartoq. Inuiaqatigiit nalinginnaat akornanni aamma isuma naalaarluartoq ilusinikkiartuaarpoq. Angutit arnallu naligiinnerat pillugu isuma ersarissiartuinnarpoq. Meeqqat, nukappiaqqat niviarsiaqqallu, atuartinneqartarnissaat eqqumaffigineqaleriartuinnarpoq. Ilaqutariit iluminni ataqatigeeriaasiat – ukiuni untritilikkaani isummiussanit ilusilersorneqarsimaqisoq – malunnartumik allanngoriartorpoq. Nunaqqqatit iluanni timikkullu avatangiisinut akisussaaffeqaqataasutut misigineq ersarissiartuinnarpoq. Allaat siumut paasiniaaqqaarani nalileereerluni isummiussiinnartarneq inuiaqatigiinni qanoq ikkaluartuniluunniit ajoqisumik kinguneqartitsisartoq, maanna utersaariartulerpoq ataasiussutsip nukinganik assortorneqarsinnaanngitsumik inangerneqariartorluni. Naatsumik oqaatigalugu inuiaqatigiit iluanni piorsaanermik suliaq ikinngutit aallulluagaat maanna kulturikkut pissutsinut sunniuteqalerpoq.
Ukiumi qaangiuttumi siammariartorneq isumannaallisaanerlu ataavartumik inerikkiartorsimapput, aamma sammisaqarfiit allat siumut ingerlapput, ilaannikkut qanilluinnartumik ingiaqatigiillutik. Assersuutissat pitsaanerpaattut taasinnaavarput nunaqarfinni illoqarfiillu immikkoortortaasa ilaasa iluanni kulturikkut siumukarneq malunniuttartoq annikigisassaanngitsumik Bahá’í-t inuiaqatigiit iluanni inooqatigiinnikkut siuarsaaniarlutik akuusarsimanerannit pissuteqarpoq. Qanittumi Inooqatigiinnikkut Aningaasarsiornikkullu Ineriartortitsinissaq pillugu Allattoqarfitta pappiara suliaraat, tassani ukiuni 30-ni kingullerni Nunarsuarmi Qitiusoqarfimmi allaffeqarfik pilersinneqarmalli sammisami tassani angusarisimasanik eqikkaavoq. Tassani maluginiarneqarsimasut ilagaat inuiaqatigiit iluanni inooqatigiinnermut tunngassutilinni pimoorussiniartut institutsi sungiusarfimmit kiminneqartartuusut. Tamannalu nukiit inuit pilersissinnaasaat kisiat aqqutiginagu pisartoq. Anersaakkut paasisimasat, piginnaatsit periutsillu institutsinit pisuttorsarneqartartut inuiaqatigiit iluanni siuarsaalluni akuunissamut ineriartornerup ingerlaaneratulli pingaaruteqarluinnartuusimasut aamma taakkartorneqarpoq. Tamatuma saniatigut nassuiarneqarpoq inooqatigiit Bahá'í-t immikkut iliuuseqarniarlutik aalluttagaat iluseq ataatsimoortoq, ineriartortitsisoq, isummersuisorlu aqqutigalugit aqunneqartartoq, illugiissitaarlutik kimitsisinnaassusilinnik katiterneqarsimasunit ilusilerneqarsimasunik, naak timitaliinikkut assigiinngitsunik malunniuteqartaraluarlutik. Allagaq taanna qanittumi Nunanut Anersaakkut Isumasioqatigiiffinnut siammartiterneqarpoq, taakkulu qinnuigaagut Siunnersortit isumasioqatigalugit isumaliutigeqqullugu isummat ujartugai qanoq inuiaqatigiit iluanni iliuuseqarnissamut periutsit pioreersut pitsanngorsaavigisinnaanerai qulaajarniaqqullugit Bahá’í-tullu suliniuteqarnermi sammisaq pingaaruteqaqisoq tamanna qaam marsaassutigeqqullugu. Tamanna ima paasineqassanngilaq kikkunut tamanut sammeqqullugu kaammattuutitut – inuiaqatigiit iluanni suliniuteqartarneq inuiaqatigiit nukissanikkiartuaarnerat ilutigalugu pissusissamisoortumik pileriartortarpoq – kisianni ikinngutinut piffissanngorpoq inuiaqatigiit iluanni nutarterinissaq pillugu suliniuteqarnermi sunniutaasa kinguneriumaagassaannik itinerusumik isumaliutigeqqusinermut. Ilikkakkat annertusiartuinnarlutik appakaakkiartortut suli annertunerusumik Inooqatigiinnikkut Aningaasarsiornikkullu Ineriartortitsinissaq pillugu Allattoqarfimmut pisussaaffiliipput, maannangaarlu ineriartornermut tamatumunnga alloriarnissamut naapertuunnerusumik qulakkeerinissaq tullinnguuppoq.
Qaammatini kingullerni aqqaneq marluusuni immikkut maluginiagassat ilagaat inoo-qatigiit Bahá’í-t assigiinngitsorpassuartigut inuiaqatigiinnik avatangiisiminni inuusunik pitsanngorsaaniartutut maluginiarneqartalermata taamatut suliniuteqartut suleqataasut allat akornanni. Nunat tamalaat akornanni sulialinniit nunaqarfinnilu inuinnaat sunniiniarlutik suliaqartut akornanni isumaliorumatuut siuttuusutut inissisimasut qanoq ikkaluartulluunniit taakkartortalerpaat inuiassuit pitsaanerusumik atugaqarnissaat Bahá’í-nit pingaartinneqaannarani aalajangiusimalluinnarlutik paasisimagaat pisariaqartitat suunersut, aammalu tamakku aaqqiivigissallugit kinguneqarluarsinnaasumik qanoq iliortoqarsinnaanersoq. Taamatut nersualaarinnittartut tapersersuinermillu takutitsisartut siusinnerusukkut ilimaginngisanit aamma tusarliunneqartalerput. Assersuutigalugu nunami Bahá’í-t Upperisaata aallartiffianit naqisimanninniartunit akornusersorneqaraluaqalutik, Bahá’í-t ilisarineqariartuinnalerput upperisamik nalunaarutaata nunagisaminni atukkanut itisuumik tupinnaannartumillu suniisinnaassusianik upperinninnermikkut, aammalu nunagisamik siuarsarneqarnissaanut nakimaatsumik aalajaalluinnarlutik ilanngussaqarusussusertik nunaqqatiminnit ataqqineqaatigilerpaat.
Naalliuutit Iranimi aalajaatsut atugaasa, ingammik ukiuni qulikkaartuni arlaqartuni malersuinerit kingulliit atuutilermatali, nunani allani qatanngutaasa illersuiniarlutik nikuinnerannik kinguneqarsimavoq. Aalajaalluinnassusermut taamaattumut qisuariaatitut nunat tamalaat akornanni inooqatigiit Bahá’í-t tunissutisiarisimasaat naliitsut ilaat tigusimasarput matumuuna eqqaarusupparput: nunat iluanni allaffeqarfiit immikkut misilittagaqartut malunniuteqartumik naalakkersuisoqarfinnik suliniuteqarfinnillu tulleriissaarisumik attaveqartalersimapput. Taakkununnga atatilluguttaaq pilersaarusiani taarseraattuni inooqatigiit oqallinnernut tamani tamaani akuutilersimavaat, inuttut oqaloqatigiittarnerit aqqutigalugit, aamma nunat tamalaat akornanni oqallittarfiit iluanni. Inuinnaat akornanni suliniuteqarnermi periuseq taamaattoq pissusissamisoortutut ingerlasimavoq, soorlu maanna inuiaqatigiit iluanni piorsaaniarluni pisoqartumut assingusumik pisoqartoq, immikkullu periuseq taanna iliuuseqarfigissallugu kaammattuutigisariaqarsimanngilaq. Nunagisap iluani aallussivinni aalajaatsuni maanna qulikkaartut arlaliulersuni sammisaq tamanna qaqittuarneqartalerpoq, siuariartorneqarporlu periutsit kinguneqarluartitsisartut aqqutigalugit, tassa iliuuseqarnikkut, isumaliutiginneqqissaarnikkut, isumasioqatigiinnikkut ilinniarnikkullu. Suliniutit taamaattut pitsanngorsaaviginiarlugit, tamakkunanilu ilinniarneq oqilisaavigineqarsinnaaqqullugu, alloriarnerillu inooqatigiit Bahá’í-t iluanni sammisani taamaattuni ingiaqatigiissooqqullugu qanittumi Nunarsuarmi Qitiusoqarfimmi Pisortatigoortumik Oqallittarnermut Allattoqarfik pilerseqqammerparput. Taakku kaammattussavagut Nunani Anersaakkut Isumasioqatigiiffiit sammisami tassani ikioqqullugit sammisaqartitsinerit ataqatigiissaaqqullugit siuarsaqqullugillu aammattaaq misilittakkat tulleriissaartumik katersoqqullugit.
Allatigut aamma neriulluarnartumik siumukartoqarpoq. Santiagomi Chuilemi nunagisami qitiusumik naalaffissuassaq pilertoqisumik sanaartorfiuvoq. Toqqavia betoniusoq, kiileria sulluliarlu naammassereersimalerput, taamatuttaaq sukat illorsuartassaanik napatitsisussat nappareerput. Suliamut isumalluarneq annertusiartorpoq, aammattaaq nunani arfineq marluusuni nuna tamakkerlugu nunallu immikoortortaani Mashriqu’l-Adhkár-iliorfissani isumalluarneq annertusiartorpoq. Tamarmik piareersarfiulereerput, naalaffissussamullu aningaasaateqarfinnut aningaasaliissutigineqartartut atorneqartalereerput; taamaattoq sumiiffissaq, ilusilersuinissaq atortussallu ikinngutinit suliarineqartut suliassami taakkuinnaanngillat. Suliaq tunngaviusumik anersaakkut sulineruvoq inooqatigiit tamarmik suleqataaffissaat. Naalakkap (’Abdu’l-Baháp) Mashriqu’l-Adhkár oqaatigaa tassaasoq ”Guuterpaluttumik uppernarsaavigineqarnerup kajumerisortaa”, ”Naalakkap toqqammavia naalannartoq” aamma ”Guutip upperisaani sukaq napasuliaq aalajaatsoq”.
Sumiluunniit pilersinneqarpat inuiaqatigiit avatangiisianiittussat aamma napparneqarfigisussaavaat. Piffinni naalaffissuup napparneqarfissaanni uppertut tamatumunnga isumaat annertunerulertarpoq, qularineqarnerlu ajorpoq peqatigiilluni qinuneq kiffartornerlu Mashriqu’l-Adhkár-ip pilersissagaa.
Taamaalilluta suni tamani takusinnaavarput inooqatigiit Bahá’í-t patajaatsumik siumut ingerlaartut, paasinninneq annertusiartorpoq, misilittakkanillu itinerusumik ilikkagaqarfiginissaannut kajumittuupput, atortussaqartillutillu nutaanik suliassanik tigooqqaasarput, pisariaqartunillu nutaassanik pilersoqartillugu qisuariapallattarput, sammisat akuuffigisatik assigiinngitsut iluanni ataqatigiissaarinissaq eqeersimaarfigaat, suliassamillu piviusunngortinnissaata piviusunngortinnissaa tunniusimalluinnarfigaat. Qaammatit arlaqanngitsut matuma siorna nunarsuaq tamakkerlugu inuusuttut ataatsimeersuarnissaat 95-it ingerlanneqassasut nalunaarutigineqarmat qiimmattangaarnerat soqutiginnilluinnarnerallu malunniuppoq. Inuusuttut qisuariarluarnerat kisiat qujamasuutiginngilarput, aamma uppeqataasa tapersiillutik nalunaartarnerat, tassami Bahá’u’lláh-p malinnittai inuusunnerusut Siunertap pingaaruteqarluinnartumik toqqammavigigai tassuuna oqaatigineqarmat.
Neriulluarnermik immerneqarpugut takussutissat tulleriiaattut Bahá’u’lláh-p nalunaarutaata siammarneqarnerata takutitai pillugit, aammattaaq sunniutaa annertooq, anguniagai pitsaasut amerlanerujartuinnartunit sianigineqaleriartormata. Maanna ulluni nalliuttorsiorfinnik taarseraattunik takusaqarfiusut nalaanni, eqqaamaqqusivugut ”Ullut pilluarnerup qutsinnerussaartup ullui” Ridvánimit matuminnga ukiut untritillit aappaat avillugit ’Abhá-p Kusanassusiata pernaataasumik Najíbíyyih-p Naatsiiviani ilagisaminut siunertani nalunaarutigimmagu. Naatsiivimmit illernartumit tassannga Guutip Oqaasia illoqarfimmiit illoqarfimmut, sineriammiit sineriammut siammarsimavoq, inuiassuarnut Naalakkaminik naapitseqqusilluni qaaqqusissutitut. Taamanili Guutimit sunnertingaarsimallutik asannittut katersuussimasut akornannit inooqatigiit angusaqarumatuut assigiinngiiaaqisut sikkertitersimapput, naasut qalipaatigissut naatisiivimmi Guutip naggorissagaanit. Ullut taarseraanneranni suli tarningit itersimallutik amerliartuinnartut qinullutik Ilerfata tungaanut saassimapput, taanna Ulloq pilluaqqusaasoq manna ataqqiniarlugu saammaannermullu suugaluartumut
Aqqit Annersaasa malinnittaasa pilluaqquneqarsimaffiinut qujamasulluta qinulluta Alloriusap Illernartup saavani niaqquvut sikitippavut.
- The Universal House of Justice