The Universal House of Justice

Ridván 2014

To the Bahá’ís of the World

Dearly loved Friends,

Ukiut pingasut qaangiussimalerput Pilersaarutip Guuterpaluttup ingerlaarnerani killiffiup maannamut atuuttup aallartisarneqarneraniilli, suliap tamatumap Bahá¶u¶lláhp malinnittai anersaakkut suliniuteqarneranni ataatsimoortippai. Maanna ukiut marluinnaat sinnerupput Guutip ikinngutaasa tamatuma naammassineqarnissaanik takunninnissaannut. Inerikkiartornerup aqqutaani kimitsisuujuartut pingaaruteqartut marlussuit ± tassaasut institutini kursusertarnerit aqqutigalugit kipisuitsumik peqataasartut isaajuarneri eqimattakkuutaartullu sinnerseraattumik ineriartortuarlutik ingerlaartarneri ± taakku tamarmik siorna inuusuttut ataatsimeersuartarnerisa pilersitaanik nukiit puilajuarsimasut kingunerannik annertungaaqisumik nukittorsarneqarsimapput. Bahá¶í-t silarsuaanni inuusuttorpassuit kiffartuussinerup aqqani nikuisinnissaannut annertunerusumik piginnaaneqalersimaneq maanna suli kinguneqartitsisinnaanngorpoq. Tassami piffissami sinneruttumi ineriartornissaq siunertaralugu aallussisoqarfiit pioreersut nukittorsarneqarnissaat pingaaruteqaqisoq nutaanillu aallartisaasoqartarnissaq pisariaqaqisumik noqqaavoq. Aqqit Annersaasa innuttaasa maanna killiffiat inissilluaqqavoq, tassami piffissaliussaasoq naatinnagu eqimattakkuutaanik ineriartornissaq siunertaralugu aallussiffioreersuni ilaartuisoqarsinnaammat anguniakkatut siunniussimasat 2.000-it sinneruttut angutserlugit.

Nunarsuatta isorartoqisup iluani suliniut tamanna siuarsarniarlugu eqinnaalluinnartumik piviusunngortitsiniartoqartoq isigalugu nuannaangaarpugut, uffa atugarisamikkut periarfissaqartitaanermikkullu assigiinngiiaaqisunik atugaqaraluarlutik, eqimattakkuutat maanna 3.000-nngoreersut iluanni. Eqimattakkuutaat arlallit maanna iliuusissatut tunaartarisassiat annikitsunnguit taamaallaat sakkugalugit siumut ingerlaarlualerfissaminnut killissimapput. Uffa eqimattakkuutaani allani suliniutit taarseraattut arlaqartut aqqusaareerlugit Pilersaarusiap iluani inuit ataasiakkaat iliuuseqartussat amerlisarneqarsimasut suliniuteqarnerlu suli annertusarneqarsimasoq; anersaakkut ilinniartitaanerup ingerlaavartup misilittakkat aqqutigalugit pitsanngorsarneqariartuinnarneratigut, tarningit piareersimallutik peqataarusulersut kajungilersarput. Ulloqartassaaq unikaallassimaarfiusartunik ingerlariaqqinnissamulluunniit akunnissimaffiusunik; unittoorfiusimasup sumik pissuteqarnera siunersiniarlugu isumasioqatigiittarnikkut, naammagittarnermik, sapiissusermik qasusuissusermillu akullugu siumut ingerlaarlualernissamut uteqqittoqartarpoq. Eqimattakkuutaani amerliartuinnartuni ineriartornissaq siunertaralugu aallussisoqarfik isorartussutsimigut katiterneqassutsimigullu annertusiartuinnarpoq, Pilersaarusiallu qitiusutut pingaartitai pingasut piginnaanngoriartuinnartut ± inuk, inooqatigiit Upperisallu aqutsisoqarfii ± ingiaqatigalugit avatangiiseq peqatigiilluni tapersersuillunilu kaammattuisoqarfiusoq pilersinneqarluni. Nuannaarutigeqaarpullu ilimagineqartutut eqimattakkuutaani amerliartuinnartuni untritilinnik amerlanernilluunniit inuttaqarfiusuni inuit tusintillit amerlanerilluunniit akornanni akuulersitsilluni inooriaatsip anersaakkut uummaarissup inuttullu nutaanngorfiusup atulerneqarnissaa kaammattuutigalugu suliniuteqalersimammata. Tamatuma soorunami aallaqqaataaniilli naqqaniit kimitsisoraa peqatigiilluni takorluuukkap Nunarsuarmi Inuunermik Tunisisup tikkuussissutigisimasaanut timikkut anersaakkullu atugartunngornermut ikaarsaariartorneq. Taamaattoq inuit taama amerlatigisut akuutinneqarpata, innuttaasut amerlasoorsuit nikisinneqarsinnaanerat siumut takorloorneqarsinnaanngorpoq.

Taamatut nikikkiartorneq ingammik malunniuteqarpoq eqimattakkuutaani Mashriqu-l-Adhkár-imik pilersitsiffiusussani. Assersuutissaqqissoq tassaavoq Vanuatu. Ikinngutit qeqertami Tanna-mi najugaqartut ilungersuuteqangaarnermikkut Naalaffissuassaq pilersaarutaasoq pillugu qaammarsaaniarsimapput, maannalu qeqertap innuttaasa 30.000-iusut pingajorarterutaat allaat annertunerujartuinnartumik oqaloqatigisalersimavaat assigiinngitsutigut tamatumap qanoq pingaaruteqassusianik. Inuit taama amerlatigisut akornanni oqaloqatigiinnerup qaffasissup taamaattup attatiinnarneqarsinnaasimanera pissuteqarpoq Bahá¶u¶lláhp ilinniutai pillugit paasissutissiisarnerup ukiuni arlaqartuni misilittagaqarluarfigineqarmat institutillu sungiusaaviup uummaarissup avammut sunniuteqarluarsimanera. Inuusuttuaqqat katerisimaartartut qeqertami tassani immikkut eqeersimaartuusimapput, nunaqarfinnilu ittuusunit tapersersorneqarluartarsimapput tassani peqataasartut anersaakkut piginnaaneqalersartut namminneerlutik takusinnaasarsimagamikkit. Ataasiussuseq tunniusimassuserlu akornaminniittoq kimitsisoralugu, inuusuttut taakku susassaaleqineq uninngaannalertuunerigaluarlu piujunnaarsiinnarnagit, aamma suliniutit tigussaasut arlallit aqqutigalugit najugarisaminni atukkanut pitsanngorsaaqataasimapput, tamatumalu kinguneranik qanorluunniit ukioqaraluartut akornanni, angajoqqaavilumi allaat ilanngullutik, tigussaasumik iliuuseqarratilersinnaalersimapput. Uppertut akornanni nunaqqatigiillumi avinngarusimanerusut akornanni, Illoqarfimmi Anersaakkut Isumasioqatigiiffimmut siunnersoqqulluni ajornartooqqasoqartilluguluunniit saassinnaanerup iluanaarnartua arajutsisimaneqanngilaq, tamannattaaq pissutigalugu Anersaakkut Isumasioqatigiiffiit aalajangertagaat annertunerujartuinnartumik malussarissuullutillu sianisuujupput. Tamakku ilippanaateqartippaat Pilersaarusiap iliuuseqarnissamut sinaakkusissiaasa imarisai paasinartumik tamarmiussuseqaraangata, tamanna inuiaqatigiinnut sunniutaa kimittuujusartoq. Ataavartumik siammariartuaarneq aalajaallisaanerlu tunuliaqutaralugu ± qanittumi 30ssaanik pimoorussisamik ineriartornissaq siunertaralugu aallussisoqarfiup inernilersimavaa ± ikinngutit qeqertap innuttarisai peqatigalugit Mashriqu¶l-Adhkár-ip ³inuit tarningisa ataatsimut eqiteruffiattut´ akornaminni ivertinneqartussap isumaa qanoq paasisariaqarnersoq uummaarissumik paasiniarlugu misissugarigaat. Qeqertami ileqqutoqqat naapertorlugit siuttuusut pimoorussillutik tapersersuineratigut, qeqertami Tannamiut naalaffissuup isikkussaanut siunnersuutit untritillit saqqummiussimavaat, tamatuma takutippaa Naalaffissuassaq qanoq innuttaasunit tiguartinneqarfiusimatigisoq, taassumalu ataani inuusunut sunniutaajumaartussat qanoq pissanganartiginersut.

Tusarliussaq tamanna qiimmaallannartoq aamma eqimattakkuutaani siuarsimasuni amerlaqi-suni allani Bahá-u-lláh p ilinniutaasa sunniutaasa eqqaamioriit nunaqarfiillu iluani inuunerannut apuussiffiusuni siumugassaavoq. Taakkunani inuit Bahá-u-lláhp Inuttut kinaassusianik annertunerujartuinnartumik paasisimasaqalersut akornanni, isumaliutiginninneq misilittakkallu, isumasioqatigiinneq ilinniarnerlu aqqutigalugit ilinniarpaat Saqqummernerata iluani ilumuussutsit suunersut, allaat anersaakkut sugisariilersut amerliartuinnartut akornanni peqatigiilluni qinoqatigiinneq kiffartuussinerlu katinngatigalugu imminnut qanilliartuinnarlutik.

Amerlasuutigut inooqatigiit ineriartorluarsimanerusut allanut kajumissaarisutut maligassiusuupput. Taamaattoq eqimattakkuutaani sammisaqaqatigiinneq sunaagaluarpalluunniit, najugarisami ikinngutit ataatsimoortumik sinaakkutissiaqarlutik ilinniarsinnaassusiat ineriartornerup aqqutaani siumukartitsisuuvoq. Suliniummi matumani kikkut tamarmik inissaqarput; kialuunniit tunniussinnaasai tamanut pisuunnguallatsitsisussaapput. Eqimattakkuutaat uummaarinnerusut tassaapput inooqatigiit iluanni atortussat qanoq ittuugaluarpataluunniit sammisaqartitsisarnerillu qanoq amerlatigigaluarpata, ikinngutit paasissagaat suliassaralugu suna siumukarnissamut piumasaqaataanersoq ± piginnaanerit pilerlaat naggorissagassat, piginnaatsit nutaat atuligassat, aallarniisut nutaqqat ingiaqatigisassat, isumaliutiginneqqissaarnissamut periarfissiinikkut inaarsagassat, peqatigiilluni suliniuteqarneq ataqatigiissaagassaq ± taavalu atortussat piffissarlu naapertuuttoq atorlugu aqqutissat nutaaliortussat atorlugit angusassaq angusaqarfigalugu. Atukkat suulluunniit namminneq imminni unamminartoqartarnerat inooqatigiinnut qanoq ikkaluartunulluunniit Bahá¶í-t silarsuaanni ilikkarsimasanit iluaqutissatut aallerfissaqarnissamik periarfissiisarput, taamaattoq aamma ilikkarsimasanut taakkununnga tapeeqataanissamut periarfissiisarlutik. Tamatuma paasisimalernerata iliuuseqarnissamut tunaartassanik ujaasilussinnarnissaraluaq pinngitsoortittarpaa, ineriartornerup ingerlaarnerata iluani assigiinngitsutigut misilittagaqarfigilersimasat qimerloorsinnaanngortillugit namminerlu najugarisami immikkut ilusinikkiartuaarnerinut nalimmassarlugit. Taamatut periuseqarnerup killeqaqisumik ³iluatsisinermik´ ³kukkunermillu´ isumaliortaatsip ingasaassiniarnermik piumassutsillu nukillaarneranik pilersitsisartup paarlattorluinnaraa. Kinaassusersiunnginneq pisariaqarpoq. Guuti kiserluinnaat pillugu iliuuseqartaraanni, taava pisut tamarmik Tassannga pigineqassapput ajugaanerillu suugaluartulluunniit Aqqa sinnerlugu angusaasut periarfissiisarput Tassunga nersorinninnissamut.

Upperisatsinni Allagaativut ilungersuuteqarnerup qilammiit ikiorneqarnermik akineqartarumaarneranik neriorsuutinik ulikkaarput: ³Ilungersuuteqarsinnaagussitoq,´ Naalagaq Allakkami ilaanni neriorsuivoq, ³qularnanngitsumik akisuanerit makku qinngorumaarput, saammaannerup nuiaasa sialuk tutsikkumaarpaat, anorit inuunermik tunisisut natsikkiartorlutik supiumaarput, tipigissuseq naajuminartoq tamanut tamaanga siammarumaarpoq.´ Ilerfinut Illernartunut akulikitsumik isertarnitsinni qamanngavik Ajugaqanngitsoq qinnuigisarparput sinnerlusi tapersersorlusilu nukittorsaqqullusi, ilinniutinik guuterpaluttunik suli tusarsimanngitsunut tusarliiniarlusi ilungersuutisi pillugit Siunertaani taakku uppernarsaqqinneqarumaartut pilluaqquneqangaarumaartullu, ilissilu killeqanngitsumik Ikiuineranut tatiginnittuarnersi aalajaattuujuaannaqqullugu. Qinnutitta qimanngisaannarpaasi aalajaallusilu iliuuseriuakkasi tunniusimasut qinnussinitsinni puiorneq ajorpagut. Ukiuni tulliuttuni marlussunni Kusanassutsip Pilluaqqusaasup malinnittaasa suliassaat pingaarutilissuit isumaliutiginerini, Naalakkap iliuuseqaqqusilluni kimigiisernera anersaamik kimitsisuuvoq: ³Assiaqutit alittorsigit, akornutit piiarsigit, erngit inuunermik imallit isaassigit, annannerullu aqqutaa tikuussissutigisiuk."

- The Universal House of Justice