Return   Facebook

The Universal House of Justice

Ridván 2019

To the Bahá’ís of the World

Dearly loved Friends,

Ikinngutit asangaakkat

Nalliuttorsiorfiit Annersaat qalliartuinnartillugu qujamasunnermik isumalluarnermillu

killinneqarsimalluta ingerlaarpugut – qujamasuppugut tupinnartulianut Bahá’u’lláh-p malinnitsiminut angusaqartitsisimaneri pillugit, isumalluarpugullu siunissami qaninnerpaami pisussat pillugit.

Bahá’u’lláh-p Inunngornerata ukiuisa 200-nngortorsiorneranut atatillugu nunarsuaq tamakkerlugu nalliuttorsiorsimanerit kimitsisoralugit siumukartuarneq pilersimasoq suli annertusiartuarsinnarpoq. Bahá’í-tut inooqatigiit ineriartornerat sukkatsikkiartuinnartoq, piginnaaneqaleriartuinnarnerat, ilaasortallu amerlanerit piginnaasaannik atuilluarsinnaalernerat, qanittumi nunarsuaq tamakkerlugu angusat pillugit eqikkarlugit nalunaarsukkani ersarilluartumik malunnaateqartuupput. Ingammillu immikkut malugisariaqartoq tassaavoq inooqatigiit akornanni annertunerusumik peqatigiisitsiniarluni siuarsaanerit annertusisimanerat. Ukiunut Tallimanut Pilersaarusiaq maannamut ingerlaartoq malittaqarpoq ukiuni kingullerni 20-ni Bahá’í-t silarsuaanni suliniutit taakkununnga tunngassutillit tulleriissaarisumik pitsanngorsarlugillu amerlisarnissaannik ilungersuuteqarsimanermik – pingaartumillu immikkut maluginiagassaq tassaavoq Pilersaarusiap ukiuini siullerni ukiut marluk affarlu ingerlariiginnartut qitiusumik sammisaqarfiusartut taakku affaanik sinnertumik amerlereersimammata. Nunarsuarlu tamakkerlugu inooqatigiissut qaqugukkulluunniit inuit millioninik sinnillit sammisaqartitsinernut taamaattunut akuulersissallugit sapernagu takutereerpaat, anersaakkullu piviussutsit suussusiinik misissuitillugit taakkununngalu qisuariartillugit. Piffissamissaaq sivikitsumi tassani qinoqatigiinniarlutik katersuuttartut marloriaatingajammik amerlisimapput – tamannalu inuiassuit neriunnerup tunissutillu Aallaaviannut ungasilliartuinnarsimanerannut qisuariarneruvoq pisariaqarluinnartoq. Ineriartorneq taanna immikkut neriulluarnartuuvoq, tassami qinoqatigiilluni katersuuttarnerit najugaqarfigisami inuunermut anersaamik nutaamik pinngortitsisarput. Qassinilluunniit ukioqaraluartunik ilinniartitsinissamut ilungersuuteqarnermik tapertaqarluarlutik,

taamatut sammisaqarnerit taakku qaffatsitaasumik siunertaqartut matuminnga ikorfartuisuussapput: inooqatigiit pilersillugit Guutimut pallorfiginninnermikkut, inuiassuarnullu kiffartuussinermikkut immikkooruteqartut. Tamanna malunnarnerpaavoq nunagisap immikkoortuini angusaqarfissatut siunniussimasaqarfiit iluanni Bahá’í-t sammisaqartitsigaangata peqataasorpassuaqarfiusartuni, ikinngutillu inooqatigiinni alloriarfiit pingajuat qaangerlugu ineriartorfioreersimasut akornanni. Nuannaarutigeqalugu maluginiarsimavarput nunagisap immikkoortuini angusaqarfissatut siunniussimasaqarfiit iluanni taama malunnartigisumik siuariartorfiusimasuni maanna Pilersaarut aallartimmalli marloriaataat sinnerlugu taakku amerlereersimammata, maannalu 500-t missaanniilereerput.

Taamatut nalunaarsukkat aallaavigalugit taakkartuinerup naakkaluartup allanngortussat aggersut annertussusissaat immini naammattumik qulaajarsinnaanngilaa. Pilersaarutip ukiui marluk sinneruttut neriunaateqarluarfiupput. Ukioq kingulleq qaangiuttoq annertuumik angusaqarfiusimavoq nunagisap immikkoortuini angusaqarfissatut siunniussimasaqarfiit iluanni nukittunerusumik siuariartorniarlutik pilersaarusiorfiusimasuni misilittakkat naapertorlugit ilikkarsimasat suusimaneri siammasissumik siaruarterneqarsimammata, neriuutigisatsitullumi taakku ilisimasat atortussallu eqqarsaatigalugit katersuuffinngorsimapput. Nunarsuaq Tamakkerlugu Ilinniartitsinissamut Qitiusoqarfiup, Siunnersortit, taakkulu ikiortaasa qasusuitsut pisinnaasatik tamaasa atorsimavaat ikinngutinut nunarsuarmi sumiikkaluartunulluunniit ilinniarnerup tamatuma annertusiartuinnartup iluaqutigineqarnissaata qulakkeerneqarnissaa anguniaqqullugu, ilikkarsimasaallu tamakku namminneq inuunerisaminnut tulluussaaqqullugit. Tipaatsuutigeqaarput takullugu nunagisap immikkoortuini angusaqarfissatut siunniussimasaqarfinni amerliartuinnartuni, taakkulu eqqaamiuini nunaqqataasalu akornanni, ikinngutit sunniutilittaasut appakaatilersimasut, iliuutsitillu aamma isumaliutiginneqqissaartarnertik aqqutigalugit, piffissami aalajangersimasumi avatangiisiminni siuariartornissap aqqutissaanut piumasaqaatit qanoq ittuunersut nassaariortulerlugit. Institut-i sakkussatut kimittuujusoq atorluagaraat, taassumalu imaqqortussusia iluaqutigalugu anersaakkut timikkullu inooqatigiit siuarsarneqarneqarput, iliuuseqartarnerisigullu amerliartuinnartunik nutaanik allanik akornannut ilannguttoqartaannalerpoq. Soorunami piffimmiit piffimmut pissutsit allanngorartorujussuusarput, soorluttaaq siuariartornerup ilisarnaatai aamma allanngorartuusartut. Kisianni tulleriissaakkamik iliorniarsari

neq aqqutigalugu, kinaluunniit suliassamut siunitsinniittumut kinguneqarluartussamik tunniussaqarsinnaavoq. Sumiikkaluaraanniluunniit nuannaarnartaqaaq tarningit allat isumalimmik oqiliallannartumillu oqaloqatigisaraangatsigit, tamakkulumi pilertornerusumik arriinnerusumilluunniit anersaakkut killinneqarnermik malitseqartarput. Uppertup uummataani ikualaneq qaammarissiartuinnartillugu, taassuma kissalaarneranit sunnerneqartut kajumilernerisa kimia assinganik alliartuinnartussaavoq. Uummammullu Bahá’u’lláhmut asanninnermik ilumiugineqartumut, allamik suliassamik kajuminnarnerusoqannginnerpa tarnikkut ilassaqqissunut qanillattornissaq, kiffartuinerullu aqqusinnersimaneranut iserlaanut kaammattuisuunissaq, misilittagaqaleriartorneranni ingiallortaanissaq – qiimasunnarnerpaanullu ilaagunarpoq – tarningit uppernermikkut qularunnaartut isigissallugit, namminneerlutik nikuittut, allallu aqqutissamut ingiallortaasut ikiorlugit aallartillugit. Tassa tamakkuupput inuunerup qarsupittup matuma tunniussinnaasaani iluatinnarnerpaasut ilaat.

Anersaakkut suliassap siuariartortinnissaanut neriunaatit suli pissanganarnerulerput Báb-ip Inunngornerata ukiunik 200-nngortorsiornissaa qalliartormat. Soorlu siuliani ukiut 200-nngortorsiorluni nalliuttorsiornernisulli, nalliuttorsiornissaq manna eriaginassutsimigut nalissaqanngilaq. Bahá’í-nut tamanut tupinnaannartumik periarfissiivoq avatangiisiminnut eqeersaatigissallugu ilumut Guutip Ullua angingaartorsuaq pitarussimasoq, Guutillu Pissusiata Saqqummernerisa marluusut Taakku appakaassimanerisa malitsigisaanik saammaanneq qilammiorpaluttoq immikkut qorlortorsuanngorsimasoq, Qaamarngullu Aallaaviisa tulleriissut Taakku nunarsuatta killingiusaa qaammarsarsimagaat. Ukiup kaaviiaarfiisa marlussuit aggersut iluanni periarfissanut uuttuutaasussat tamanit naluneqanngillat, ukiut marluk matuma siorna ukiunik 200-nngortorsiuilluni misigisimasat aallaavigalugit ilikkakkanit, ukiorlu manna Inuuissiorfissat Illernartut Marlussuit nalliuttorsiutiginiarlugit pilersaarusiorneqalerpata, ilikkarsimasat taakku nalliuttorsiornissamut atorluarneqassapput. Ukiunik 200-nngortorsiorfissaq qanilliartuinnartillugu, akulikitsumik ilissi sinnerlusi Ilerfit Illernartut iluanni qinnussisarumaarpugut tulluartumik Báb-i naalannartikkumaarissi Siunertallu Taassuma Siulittuutigisimasaata siuariartortinnissaanut ilungersornissinni iluatsitsiumaartusi.

Ukiut Ilusilersorfiusut ukiuisa untritilikkaartut siulliat ukiut marluk affarlu qaangiuppata naasussaavoq. Ukiut untritillit atorlugit ilungersuutit illernartut aqqutigalugit toqqammavigisap patajaallisarlugulu siammarterneqarfia, Upperisap Ukiuisa Sapiitsuliorfiusut nalaanni pilliuteqangaaqaluni toqqavilerneqarsimasoq matullugu naqissusertussaavaa. Piffissamissaaq tassani inooqatigiit Bahá’í-t ‘Abdu’l-Bahá-p Toqunerata ukiunik untritilinnik qaangiunnera nalliussissavaat, Naalakkap asasatta nunarsuup matuma killeqarfii akimorlugit aniguisitaaffia, Angummilu najugaanut qilammiorpaluttumut uteqqiffia. Taamani ilisaanera, aqaguani pisoq, pisimasuuvoq “Palæstinami siornatigut takusimasani asseqarsimanngitsoq”. Naammassilermat timaa Báb-ip Ilerfata iluani qilaanngusap iluanut ilineqarpoq. Taamaattoq Shoghi Effendimit takorloorneqarpoq tamanna utaqqiisaagallartumik aaqqissugaasoq. Iliverlu illernartuut piffissanngorpat napparneqarumaartoq ‘Abdu’l-Bahá-p immikkorluinnaq inissisimasuuneranut tulluuttoq.

Maanna tassa piffissanngorpoq. Nunarsuarmi Bahá’í-t maanna kajumissaarneqarput timip illernartup tamatuma naassaanngitsumik ilineqarfissaa nappaqqullugu. Ri ḍ ván-ip Naatsiiviata qanigisaani napparneqassaaq, nunami Kusanassutsip Pilluaqqusaasup illernartunngortillugu tummisarsimasaani; ‘Abdu’l-Bahá-p Ilerfa ‘Akka-p Haifa-llu akornanni Ilerfit Illernartut akornanni titarnertut malittarissagaanni qaarajuttumik iluseqartup akornanniissaaq. Ilusissaata pilersaarutigineqarnera ingerlaleruttorpoq, qaammatinilu aggersuni tamanna pillugu suli annertunerusumik paasissutissanik pilersuisoqarumaarpoq.

Ukiumut aggersumut pisussat neriulluarnartut isumaliutigileratsigit misigissutsit nuannaangaarnermik imaqartut maligaasartutut ilutsinnit qaffakaapput. Tamassi minitaqarasi qiviarpatsigit – Bahá’u’lláh-mut kiffartuiniarlusi sulissutiginnittuususi, nunanilu sumiluunniit eqqissinissaq pillugu suliniuteqartusi – suliassarsi qaffasingaartoq naammasseqqullugu.

 

Windows / Mac