Return   Facebook

The Universal House of Justice

Ridván 2022

To the Bahá’ís of the World

Dearly loved Friends,

Setaun endur besedia sereta beperagam, pia mega bebendar gawa, udah apus, dikelala enggau pengiruh bala pangan di serata dunya ngintu pengerami seratus taun Peniki ‘Abdu’l-Bahá, nyengkaum ngenataika bala pengari ngulu siti pengerami special dikena meri basa ngagai Iya di Tanah Kudus. Nengah semua pengiruh tu, peransang ti datai ari pengidup ‘Abdu’l-Bahá udah diasaika ulih mayuh semengat lalu ukai semina bala Bahá’í aja. Pengibuh Iya ke tiap iku kaban bansa mensia diri sebilik, pengawa Iya ngajar, pengawa Iya ngemansangka pelajar enggau pengelantang sosial, pengawa Iya ti nyengala dalam mayuh wachana di Timur enggau di Barat, peransang ti chukup dalam ari ati Iya ngagai semua projek nirika Rumah Sembah, pengawa Iya nempa tukuh terubah-rubah ia administrasyen Bahá’í, pengawa Iya ngeraduka mayuh bengkah aspek pengidup komuniti—semua pengawa ti begembar tu dalam pengidup Iya nyereminka pengangkun Iya ti seruran sereta tunggang ati gawaka Petara enggau gawaka bansa mensia. Kelimpah ari bediri ba legit autoriti moral Iya ngembuan seling penemu spiritual ti nadai tanding, ‘Abdu’l-Bahá sigi nyadika panchur tulin ke ditengah semua daya ti dilepaska Revelasyen Bahá’u’lláh ulih meri empas kereja ba dunya. Meretika society-building power ti dikembuan Pengarap, siku-siku enda ibuh merening jauh kelimpah ari meda semua pemujur ti ulih ‘Abdu’l-Bahá sekumbang ministri Iya enggau empas transformatif lalau ti datai enda ngetu-ngetu ari pen Iya. Chukup mayuh meh pemujur ti naka pemadas ke bisi ba komuniti Bahá’í maya hari tu— ke dikenang kami dalam pesan Riḍván nuju kita taun nyin kemari—endang bepun ari pengawa, pemutus penemu, enggau jaku perintah ‘Abdu’l-Bahá.

Nya alai, sigi patut meh, komuniti Bahá’í meri basa kolektif ngagai pemetul Teladan ia nyadika pantar dikena ngepunka pengawa besai ti befokus ba mansutka society-building power Pengarap dalam tatak ti makin mayuh. Bidang kereja ti diserangkung dalam Pelen Sembilan Taun, enggau dalam ripih pelen ke diatu, endang dituju kena ngulihka juluk ati ti besai tu. Nya mega nyadika fokus lebih 10,000 iti aum besai ti diatur di serata dunya dikena nandaka pengelanchar ke spiritual enterprise ti besai tu. Semua aum besai tu, disadang deka ngelaluka naka pemayuh orang ti ngulu ia, ngempuruka ukai semina bala Bahá’í tang mega mayuh orang bukai ti dekaka pengelantang bansa mensia ti bekunsi pengeran enggau sida ti deka nanggam penyerakup enggau ngemanahka dunya. Pemutus ati enggau pengering pengasai tuju sida udah dipanchar dalam semangat ti dipansutka ba semua gempuru ke udah bisi dipejalaika, ke alai bala orang ti ngulu udah ditanggam enggau mayuh jurai dinamik ke alai sida udah ngenataika pemeri ngagai visyen kolektif ke dipejurai maya pengerami ti ngelantangka ati tu. Kami nganti enggau pengeran sadang ke utai ti deka nyadi ba beberapa bulan enggau taun-taun ti deka datai.

Kenyau ari maya kami ngenataika pesan kena 30 December 2021 nuju Aum Besai bala Counsellor, semua Raban Gelumu Sambiang Bansa enggau Regional Bahá’í Council udah bebendar nentuka pengulih dalam neritka proses pemansang ba semua klaster ti dipegai sida kandang Pelen Sembilan Taun. Kami ngasaika bisi ulih mantu, dikena nentuka tatak pemansang ti deka nyadi ba maya ti deka datai, patut meda Pelen tu deka ngerembai dalam dua renggat ba pengelama empat taun enggau lima taun, lalu semua Raban Gelumu Sambiang Bansa dipinta ngira pemansang ti disadang ba komuniti diri empu ba Riḍván 2026 enggau ba Riḍván 2031. Pengawa tu nyengkaum beratika baru garis antara klaster, lalu asil ari ubah garis tu dia penyampau klaster di dunya udah niki sesuku lalu penyampau diatu bisi lebih 22,000. Diperati ari jangka ti diterima, dianggarka, ba ujung Pelen, program pemansang ba sekeda tikas deka bisi nyadi ba kira-kira 14,000 ari semua klaster tu. Ari penyampau tu, pemayuh klaster ke dikira manggai ba program pemansang dedat dijangka niki ngagai 11,000 dalam kandang maya nya. Lalu ari semua tu, disadang penyampau klaster ke udah ngelimpas batu tanda ketiga deka niki ngagai lebih 5,000 ba taun 2031. Enda ibuh ditanya, ngelajakka pemujur baka nya sigi begunaka pengeran ti tinggi ngereja pengawa dalam sepemanjai Pelen. Taja pia kami ngasaika tu siti niat ti lumau dikereja, laban ia nyadika juluk ati ti besai tang dikemeratka laban nya sigi ulih japai.

Tu nyemetak. Semua juluk ati ti baka nya sigi enda ulih dipikirka enti semua institusyen administratif enggau agensi enda nyata berubah, nyikap sida enggau kapasiti ti chukup tinggi dalam ngatur semua pengawa komuniti ke alai aktiviti ia udah mayuh betambah enggau jampat, nyerangkung mayuh semengat pupu bansa ti betambah. Sigi enda ulih diniatka pemansang ti baka nya enti pengingin deka belajar—gawa, ninjau, nangkap seling penemu, lalu nyerapka semua seling penemu ti ayan ba tempat bukai—enda diraduka ba semua tikas, ngerembai ngagai perayat ba komuniti. Lalu semua kereja ti bekaul enggau projeksyen baka nya sigi enda mujur enti langkah-rapat sistematik ba pengawa ngajar enggau ba ngemansangka human resource enda betambah ayan ba dunya Bahá’í. Semua tu udah mai pemujur pemereti komuniti Bahá’í ngagai identiti sereta tuju ia empu. Mutus ati deka merening ke luar dalam proses nirika komuniti udah nyadi sidan ti ditumbuhka ba daya idup mayuh, mayuh tempat; diatu ia ngerembai, ba makin mayuh komuniti, nyadi asai tanggung jawap ti amat dalam ngulihka pemansang spiritual enggau pemansang material ngagai makin mayuh semayuh raban dalam society, ngilah jauh ari bala kaban komuniti Bahá’í empu. Semua kereja bala pangan dalam nirika komuniti, enggau dalam social action, lalu ngenataika pemeri ngagai wachana ti bisi nyadi ba society udah bejantil nyadi siti enterprise global, ditanggam enggau siti langkar-kereja kena gawa ti sama, dituju ngagai nulung bansa mensia numbuhka semua pengawa ia bepugu ba batang ajar spiritual. Pemesai guna semua pemansang ti udah dikenang kami, manggai ba titik tu pengudah seratus taun Atur Administratif berengkah didudukka, enda ulih dikelaung. Kapasiti ti balat betambah ke udah nyadi dalam kandang dua puluh taun ti lalu— enggau ke ulih ngasuh dunya Bahá’í meda semua kereja dalam reti mansutka society-building power Pengarap—kami meda kelai ti enda ulih disakal ianya Pengawa Petara udah masuk ngagai renggat ke enam dalam Rambau Formatif. Kami bisi ngerah maya Riḍván ke udah ianya fenomena pemayuh orang ti enggau dalam aktiviti Bahá’í, ke ditungkun enggau pengarap ati, lalu bulih pengelandik enggau pengulih gawaka komuniti sida nya nandaka renggat ketiga dalam Pelen Pengudus ari Master udah berengkah; nya alai, Pelen Satu Taun, maya ia berengkah suba lalu diatu ia udah tutup, udah ngaga kelai ke sebagi ari pemujur historik ti udah dikemajuka raban ti taluk. Lalu ba pemetung pengawa ti baru, ti besai, raban orang ti arap ti beserakup tu bediri sedia deka ngerampas semua peluang ti tebuka besai ba mua sida.

Siti penteba ti nyengala ba renggat ke diatu udah tutup ianya udah nirika Rumah Sembah kontinental ti penudi lalu ngepunka mayuh projek numbuhka Rumah Sembah ba tikas nasional enggau lokal. Mayuh udah dipelajarka, bala Bahá’í di serata dunya, bekaul enggau konsep Mashriqu’l-Adhkár sereta gempung nyembah enggau servis ti diserangkung ia. Kandang renggat ke enam ba Rambau Formatif, makin mayuh deka dipelajar bekaul enggau menasan ti ngiring ari pemansang dalam komuniti ti ngembuan pengidup devotional ti galak—enggau servis ti diperansang ia—nuju ngagai pengayan

Mashriqu’l-Adhkár. Mayuh jurai udah berengkah enggau beberapa iti Raban Gelumu Sambiang Bansa, lalu lebuh tu bejalai, kami deka ngerah ba maya ti patut bekaul enggau dini Rumah Sembah Bahá’í deka didirika dalam taun-taun ti deka datai.

Kami gaga meda komuniti Nama Pemadu Tebangkar udah mansang kering sekering disakum enggau pengudu penyinu ati kami meda gaya enggau penyarut ti majak nyadi di dunya ti mai penusah enggau pemedis ti balat—ke lebih agi, meda penyadi pemayuh daya pengerusak ti nyarutka hal antarabansa lalu ngenataika penakut ngagai raban mensia. Kami sigi nemu sereta ngembuan pengandal ianya, baka ti suah ditunjukka komuniti Bahá’í ba mayuh bengkah konteks, bala penitih Bahá’u’lláh endang komited deka ngenataika tulung enggau bantu ngagai orang ti ngelingi sida, nadai ngira penyuntuk sida empu. Tang semadi meh semua raban mensia deka ngatur semua hal ia bepelasar ba pengelurus enggau pengamat, akai rai, nasib ia sigi betegiu ari krisis siti ngagai krisis siti. Kami besampi ianya, enti perang ti baru nyadi empai lama di Europe deka meri ajar ngagai mensia jemah ila, ia deka nyadika tangkan ti dipeguai pasal pejalai ti mesti dititihka dunya enti ia deka bulih pemaik ti amat sereta teguh. Batang ajar ti dikenataika Bahá’u’lláh ngagai bala raja enggau bala presiden ba maya Iya suba, enggau tanggung jawab ti berat ke dipanggai Iya ngagai bala pemerintah ke dulu enggau ke diatu, nyangka lebih ngengkang sereta beguna agi diatu enti dibanding enggau maya lebuh Pen Iya nulis nya suba. Ngagai bala Bahá’í, pengelajak Pelen Besai Petara ti enda ulih ditagang—ti diserumba enggau mayuh pemerinsa ti balat enggau tebunsa, tang pengujung ia deka nganjakka raban mensia nuju pengelurus, pemaik, enggau penyerakup—nya endang dalam konteks Pelen Mit Petara, ti benung kiruh dikereja bala orang ti arap, tebantai. Gaya atur society ke maya hari tu ti enda befungsi nunjukka guna mansutka society-building power Pengarap nyata beguna amat sereta diperumban. Kami sigi nyadang, ke diatu, pengerabat enggau pengachau sigi deka terus ngemediska dunya; ari nya, kita tentu deka gaga nemu, nama kebuah tiap-tiap pengeran sampi kami minta semua nembiak Petara dilepaska ari semua pemedis enggau penusah ti pait digembar enggau sambiang ti dalam minta pemujur ke semua servis kita ti amat diguna ti dikenataika kita ngagai Pengawa Anak Raja Pemaik.

Ba tiap-klaster ke alai mayuh aktiviti Pelen bulih momentum ti betambah, kami meda pemansang mayuh komuniti ngembuan penteba mulia baka ti dikenang dalam pesan 30 December 2021. Lebuh mayuh society ngasaika mayuh macham stres, bala penitih Pemajik Abhá mesti makin bediri tebilang ketegal kualiti sida ti puh sereta rasionaliti, ketegal standard perangai sida enggau sida ngasika batang ajar, enggau pengasih, pengelengka, sereta penyabar ti dipandangka sida lebuh sida gawa ke penyerakup. Suah amat, semua penteba ti nyulut enggau perangai ti dipandangka bala orang ti arap ba kandang maya penusah ti balat ngansak orang nunga bala Bahá’í minta penerang, lalau, enggau sukung, ke lebih agi lebuh pengidup society udah tejanggal ketegal penusah enggau penyarut ti enda disadang. Lebuh bekunsika semua pemerati tu, kami nemu ianya komuniti Bahá’í empu mega ngasaika empas daya-daya pengeruntuh ti benung mangka ba dunya. Tambah mega, kami nemu ianya makin tinggi pengiruh bala pangan dalam ngerembaika Lekajaku Petara, makin kuat daya ti nyakal ke nyatup sida, lama laun, ari mayuh piak. Sida mesti ngenegapka runding enggau semangat sida ngelaban mayuh penguji ti tetap deka datai, enggai ke semua tu nimpangka integriti semua kereja sida. Tang orang ti arap nemu enda kira pemalat biau balai ba mua sida, bandung Pengawa Petara sigi ulih nipak semua nya. Tikas pejalai ia ti betunda udi ngelama tu udah meda ia mujur napi panas enggau ujan sereta belayar di atas alun gelombang. Diatu ia bekejang nuju bingkai langit ti baru. Pengentap ari Iya ti Pemadu Tegap meh kesuh ribut ti niupka layar ia lalu ngenyungka nuju penyangkai ia. Lalu Sempekat meh nyadika bintang pemalin i a , lalu nentuka bangkung suchi ia bejalai nengah arus ia ti tetap sereta betul. Ngajihka raban malikat di serega nurunka berekat ngagai semua ti belayar dalam nya.

 

Windows / Mac