The Universal House of Justice
Ridván 2019
To the Bahá’ís of the World
Dearly loved Friends,
Lebuh Pengerami ke Pemadu Besai nyau makin semak, kami udah diangkat enggau asai ati ti beterima kasih sereta enggau sadang--beterima kasih ke pemanah ketegal Bahá’u’lláh udah ngasuh bala penitih Iya bulih pemujur, penyadang ke utai ti dikandal ke pagila lusa.
Segang ti nyadi ketegal pengerami ke dua ratus taun Pengada Bahá’u’lláh ti diintu di serata dunya udah semina mansang kenyau ari maya nya. Peneras pemansang raban Bahá’í, penyungkak kapasiti, enggau pengulih ia narit pengering makin mayuh kaban ia nyengala dipeda ari simpul pemujur ia di serata dunya apin lama ke udah. Ari semua tu, aktiviti nirika raban ke nyengala agi udah mayuh bendar nambah. Pelen Lima Taun ke diatu ke nyambung pengawa dua puluh taun dikereja ulih dunya Bahá’í ti ngalus sereta nambahka aktiviti enggau lebih sistematik--tang nyata bendar, dalam dua taun setengah keterubah ba Pelen tu, penyampau aktiviti pugu aja udah betambah lebih ari setengah. Raban di serata dunya udah nunjukka kapasiti ulih mai, ba sebarang maya, lebih sejuta mensia dalam aktiviti ti baka nya, nulung sida matau sereta nyaut pemansang semengat ti bendar. Dalam maya ke enda lama nya, penyampau serumpu alai besambiang betambah nyau deka belipat kajang--utai ke chukup beguna dikena ngerapatka raban mensia ke makin beserara ari Pun pengandal enggau pengasih. Pemansang tu ngembuan danji ti spesial, laban serumpu sambiang ngisi semengat baru ngagai pengidup raban. Dianyam enggau pengawa pelajar ba semua tikas umur, ia nyungkakka peninggi tuju pengawa nya: alai ngemansangka raban ti dikelala ketegal sida nyembah Petara sereta gawaka bansa mensia. Nadai dibukai pekara tu lebih nyata kelimpah ari dalam klaster ke alai orang enggau dalam chukup pemayuh ba aktiviti Bahá’í seruran ditan lalu bala pangan udah ngelebus batu tanda ketiga dalam pemansang raban sida. Kami gaga bendar ati meda penyampau klaster alai proses pemansang udah naka kediatu betambah ngagai lebih belipat kajang kenyau ari Pelen berengkah lalu diatu bisi kira lima ratus iti.
Lansa pansik tu enda ulih nyerita enggau nenak tikas transformasyen ke benung nyadi. Rampa tinjau dua taun ke agi tinggal ba Pelen tu endang tampak. Mayuh udah dijapai ba taun tu tadi ari ti mayuh bekunsika pelajar ke diulih ari klaster ke ngembuan program pemansang ke lebih kering ianya, baka ke dikarap kami, udah nyadi lubuk penemu enggau sumber. Pusat Ngajar Antarabansa, bala Pengelalau, sereta penyanding sida ke nadai ngira pengelelak enda ngetu nentuka bala pangan ba sebarang endur di dunya tau bulih penguntung ari peneras pelajar lalu nguna seling penemu ke udah ulih ba realiti sida empu. Kami lantang ati meda makin mayuh klaster, enggau tempat ti besemak pendiau enggau tumpuk dalam nya, nukleus bala pangan udah ayan nengah gawa enggau ninjau udah tetemuka utai ke diguna, lalu ba siti siti maya, ke proses pemansang dikena ngemajuka endur sida. Sida nguna penguat pekakas institiut, nengah nya kapasiti ke meri ngagai pengaya pemansang semengat enggau pemansang material ba raban udah disungkak, lalu lebuh sida gawa, penyampau orang ke enggau sida pen betambah. Endang amat, gaya ba tempat siti enggau tempat siti sigi bebida, baka nya mega gaya pemansang. Tang nengah pengawa ti berurun, genap iku ulih ngenataika pemeri ti lebih semitan ngagai kereja ke benung dipejalai. Ba genap endur, sigi bisi pengaga ti tulin lebuh mai bala semengat bukai dalam randau ke bebatang sereta ngelantang ke nuju, sekalika jampat tauka beseranyat, ngagai pemudah nerima pemansang semengat. Makin tampak api ke ditungkun ba ati orang ke arap, makin kuat kuasa penarit ke diasai orang ti kena laban pengangat ia. Lalu ngagai ati ke ditunu enggau pengerindu ke Bahá’u’lláh, nama pengawa ke lebih ngakun agi ari ti ngiga semengat ke ngembuan peneka ti sama, meransang sida lebuh sida masuk ngagai menasan gawa, nyempulang sida lebuh sida makin bulih peneleba lalu--dipelaba pengaga ke pemadu tinggi ari semua—ia nya meda bala semengat tu nyadi tetap ba pengarap ati sida, angkat kediri, lalu mantu orang bukai nengah pejalai ke sama. Tu mih sekeda ari utai ke pemadu dikerindu ari semua maya ke ulih dikenatai ari pengidup ke sementara tu
Peluang ngemajuka enterprise kudus tu makin ngerinduka ati laban pengerami ke dua ratus taun Pengada Báb makin semak. Baka pengerami ke dua ratus taun ke dulu ari tu, pengerami tu endang maya ke pemadu berega enda ulih dikira. Ia nyendiaka peluang ke chukup manah ngagai semua Bahá’í endur ngenanika orang ngelingi sida tentang pemesai Hari Petara, ngagai pemayuh pengerarat pengasih serega ke dikelai enggau penatai dua iku Seruan Petara, Penampak ke betunda udi ke udah nerangka bingkai langit dunya. Singkang ke ulih dikereja dalam dua pusin ke deka datai endang ditemu semua ari peneleba ngintu pengerami ke dua ratus taun dua taun ke udah, lalu semua utai ke dipelajar maya nya mesti dipanchur ngagai langgur pengawa dikena ngintu Pengerami Hari Pengada Besapit ti Kudus ke taun tu. Lebuh pengerami dua ratus taun nyau makin semak, kami deka selalu besampi ngarika kita ba Sungkup Suchi, besambiang ngambika kereja kita ngakun bebasaka Báb deka mujur lebuh ti ngemajuka Pengawa Petara ti dipadah Iya.
Penutup ke abad keterubah Rambau Formatif semina agi tinggal dua taun setengah. Ia deka nyengkabung penerit pengawa seratus taun dalam ngenegap enggau ngerembaika pelasar ke udah diduduk enggau naka beberantu kandang Rambau Bujang Berani Pengarap. Nya mega maya alai raban Bahá’í nanda seratus taun Pengangkat ‘Abdu’l-Bahá , maya lebuh Tuai ke dikerindu dilepas ari kurung dunya tu lalu begulai baru enggau Apai Iya ba pengenduh pengelantang penampak serega. Pengawa nguburka Iya, ke diatur sehari pengudah nya, nyadi siti maya "ke nadai kala udah dipeda baka nya di Palestine". Ba pengujung nya, tubuh Iya ke udah nadai digali di dalam sungkup ba Mausoleum Báb. Taja pia, nitihka sadang Shoghi Effendi tu semina atur ke sementara. Siti Sungkup deka didiri, ngipakka peninggi penuduk ‘Abdu’l-Bahá ba maya ke patut.
Maya nya udah datai. Dunya Bahá’í diatu dikangau nirika edifis ke deka selama ia nyimpan rangkah suchi nya. Ia deka didiri dalam kandang Kebun Ridván, ba tanah ke diberekat ulih tujah tapa kaki Pemajik Beberekat; ari nya
Sungkup ‘Abdu’l-Bahá deka duduk ba selepak bengkung antara Sungkup Suchi di 'Akka enggau Haifa. Kereja bekaul enggau pelen arkitek benung digaga, lalu penerang ke mayuh agi deka dikunsi dalam beberapa bulan ke deka datai.
Asai ati ke naka pengaga diatu ngalun dalam kitai, lebuh kitai ngerundingka taun ke deka datai enggau semua ke didanji dalam ia. Kami ngadap ngagai genap iku kita--bala ke kiruh gawaka Bahá’u’lláh, ngereja pengawa ti pulaika pemaik ba tiap-tiap menua--ngamatka kangau ke tinggi nuju kita.
- The Universal House of Justice