The Universal House of Justice
Ridván 2020
To the Bahá’ís of the World
Dearly loved Friends,
Dua realiti ke ayan ngansak kami ngenataika lekajaku tu ngagai kita. Realiti keterubah ianya pengeleda ti mansang di selampur dunya pasal penusah ti regah-regah sereta ngenakut ketegal pengerekai koronavirus. Ba mayuh menua, taja gempung pengiruh ti berani sereta terit udah dipejalaika dikena nyeliahka rabat, gaya ke nyadi udah raya, ti mai trajedi ngagai mayuh orang diri sebilik enggau siku siku lalu nempalungka serata raban mensia ngagai krisis. Beberapa alun gelumbang pemedis enggau merampau nyau mangka ke tempat siti ngagai tempat siti, lalu deka ngelemika mayuh bengkah menua ti bebida, ba maya ti bebida, dalam jalai ti bebida.
Realiti ti kedua, siti ke makin nyata genap hari, ianya pengepuh sereta pengering ke enda langkang ba dunya Bahá’í dalam napi chabar ke nadai kala baka nya dalam pengingat pengidup. Saut ari kita chukup nyulut. Lebuh kami nulis ngagai kita sebulan ke udah maya Naw-Rúz, kami keran deka madah ngenang pemanah kualiti ti ditunjukka mayuh komuniti lebuh sidan aktiviti ti baka selama nyau tejanggal. Semua utai ke nyadi dalam beberapa minggu nangkan nya, alai mayuh bala pangan nyau diasuh nitihka atur sekat ti makin terit, udah nambahka puji ari ati kami. Belajar ari peneleba ke udah ulih ari tempat bukai di dunya, sekeda komuniti udah tetemuka jalai ti likun sereta kreatif dikena ngangkatka pemereti bekaul enggau guna nyaga pengerai bala mayuh ba raban mensia. Perati ti spesial patut diberi ngagai orang ke mudah kena rampit virus sereta penusah penatai pemisi ti nyadi ketegal pengerembai ia; pengawa ti dicherita dalam Bahá’í World News Service bekaul enggau tu nya semina segenggam ari pemayuh ke enda ulih dikira ti benung dipejalaika. Tu endang disaup enggau pengawa ti meresa, meransang, sereta nanam kualiti spiritual ke chukup diguna ba maya tu. Mayuh pengawa baka nya dipejalai ba unit diri sebilik tauka kediri, tang ba endur ti ngemendarka tauka perengka komunikasyen meri ia ulih dikereja, asai segempung ati ti naka peninggi endang terit dikemansang ulih bala semengat ti bekunsika gaya ti sebaka. Dinamik pengidup komuniti, ti chukup beguna dikena sama bela mansang, enda deka dikelemi.
Peransang ati kami ditegi laban ti meda baka ni pengulih Raban Gelumu Sambiang Bansa, bala jeneral Sedadu Penampak ti puh, udah ngiring komuniti sida lalu nempa saut sida napi krisis. Sida mega udah disukung kuat ulih bala Pengelalau sereta penyanding sida, baka selama seruran, negi tinggi enggau pemerani tikas servis ti bepengerindu. Laban seruran nemu pasal utai ke nyadi ke jampat berubah ba menua sida, Raban Gelumu mega ngaga atur ti diguna lalu ngatur pengawa Pengarap, lalu kelebih agi dalam ngatur bepilih, enti tu agi ulih dipejalaika. Nengah komunikasyen ti bejarit, bala institusyen enggau ajensi udah meri lalau ti landik, meri penetap ti ngelantang, sereta seruran meri peransang.
Ba mayuh maya, sida mega berengkah ngelala batang penemu ti ngemansang ke ayan ari randau ti tebuka ba raban sida. Sadang ti dikenatai kami dalam pesan
Naw-Rúz ianya penanggul tu ti nguji pengepuh bansa mensia deka meri ia seling penemu ke makin besai diatu udah nyata. Bala ketuai, bala pemikir ti tebilang, enggau bala komentator udah berengkah nyidi pugu konsep enggau niat ti berani, alai dalam maya ke empai bangat lama dulu suba, jarang bendar disebut dalam randau mensia mayuh. Kediatu tu semina cheli ti baru pansut, taja baka nya ia nunjukka bisi peluang maya gempung pengeleda tau ulih dipeda.
Penyamai ati kami meda pengeliat ati dunya Bahá’í dalam ngayanka diri ngereja pengawa lalu digulai enggau penusah ati kami meda empas pengerekai penyakit nuntung bansa mensia. Akai rai, kami nemu ianya bala orang ke arap enggau bala kaban sida sama bela ngasaika pemedis. Takah penyauh antara bala pangan enggau kaban belayan, ketegal nitihka atur pengelikun bala mayuh, ke disepi mayuh mensia di dunya lalu agi mengkang dipejalaika ba maya tu, ke sekeda orang, ngujungka beserara ti tetap. Ba tiap teberingkas tawas gaya nyau majak nyengala makin mayuh pemedis deka ditapi sebedau matahari padam. Arapka semaya betemu baru dalam dunya ti meruan deka mai pengaga ngagai sida ke udah lenyau orang ti dikesayau sida. Kami besambiangka pengelantang ati sida, lalu bantu pengasih Petara ngerayung sida ke alai pelajar sida, pengidup sida, rumah sida, nyentukka jalai pengidup sida pan dalam penusah. Ngagai kita, sereta orang ti diasi kita, enggau semua kaban kita, kami besampi ngagai Bahá’u’lláh lalu minta enggau pemaruh ati ke berekat enggau pengasih Iya.
Enda kira berapa pemanjai enggau pemedis jalai ti mesti ditujah, kami ngembuan pengandal ti tinggi dalam penegap kita enggau pemutus ati kita nembuka pejalai. Kita ngambi ari tibang pengandal, pengarap, sereta pengasih, ngengkahka guna orang bukai dulu ari enggi diri empu, ngasuh orang ti dikemelu bulih tupi pemansang semengat, sida ti makin aus ke saut tau tepantup ati, lalu sida ti ingin deka gawaka pemanah dunya tau diberi chara. Ari bala penitih ti angkun ke Pemetul Beberekat, baka ni kami tau nyadang kurang ari tu?
- The Universal House of Justice