Return   Facebook

The Universal House of Justice

Ridván 2021

To the Bahá’ís of the World

Dearly loved Friends,

Lekajaku ke penudi dalam chapter ti pemadu dikingat dalam sejarah Pengawa Petara diatu udah ditulis, lalu lambar dibuka. Riḍván tu nanda penutup ke taun ti ngelui ari selama, siti Pelen Lima Taun, ba siti ripih semua Pelen ti berengkah dalam taun 1996. Siti ripih Pelen ti baru ngangau, enggau mayuh semaya ti beguna ba duabelas bulan nyadika pemantar ngagai pengawa sembilan taun ke deka berengkah ba Riḍván ke deka datai. Kami meda ba mua kami siti komuniti ti jampat udah bulih pengering lalu besedia deka ngambi singkang besai ke mua. Tang patut nadai igau bekaul enggau pemayuh pengiruh dikena ngenataika diri ba penuduk tu lalu naka pemedis meh alai nyapai mayuh seling penemu ti diulih sepemanjai jalai: mayuh pelajar ti dipelajar deka nukuh komuniti ke jemah ila, lalu cherita bakani nya dipelajar deka meri penerang ngagai ia ti deka datai.

Beberapa puluh taun nuju ngagai taun 1996, kaya dalam pemansang sereta mayuh seling penemu sida empu, udah nunjuk nadai pengakang ianya mensia dalam penyampau ti besai ba mayuh society besedia deka masuk di baruh menira Pengarap. Taja, peluang endur masuk beraban endang bisi, tang nadai proses ti ulih nipak dikena ngetanka pemansang dalam ngeraduka ia ba mayuh bengkah gaya setting. Mayuh tanya ti nyemetak nuntung komuniti alai, ba maya nya, ia enda chukup peneleba dikena meri saut ti engkeman. Bakani pengawa ti ngembuan tuju deka ngerembai bejalai segembar enggau proses ngenegap lalu mutarka chabar ti mar, ti lama udah bisi, dipeda nekul pengenan pemansang? Bakani siku siku, institusyen enggau komuniti tau didiri sereta ulih nyalin ajar Bahá’u’lláh nyadi kereja? Lalu bakani bala ti tetarit ngagai ajar tau nyadi protagonis dalam enterprise spiritual global?

Baka nya meh utai ti nyadi, sesuku abad ti lalu, komuniti Bahá’í agi bisi tiga iku Jari Pengawa Petara ti ngulu sida maya berengkah ngereja Pelen Empat Taun, tebilang ari ia ti dulu ari nya ke ngembuan fokus ba siti tuju: pengangkat signifikan dalam proses masuk beraban. Tuju tu udah nukuh ripih semua Pelen ke entudi nya. Komuniti nyau mereti ianya proses tu ukai semina masuk ngagai Pengarap dalam mayuh raban ti besai, tauka ia deka ayan ngenyit; ia ngembuan empas pengerembai enggau penegap ti bisi tuju, sistematik sereta dikenyampat. Kereja tu begunaka naka pemayuh bala semengat ti udah dipadah sama gawa, lalu dalam taun 1996, dunya Bahá’í dikangau napi chabar pelajar ti besai ti diguna. Ia dipinta numbuhka sangitkaul institut pematih ti ngembuan fokus deka nambahka penatai makin mayuh orang siku siku ke disikap enggau kapasiti ti diguna kena ngenanka proses pemansang.

Bala pangan ti enggau ngintu kereja tu nemu ianya, nadai ngira pemenang sida ke dulu suba dalam pengawa ngajar, nyata bendar sida mayuh utai ti deka dipelajar pasal ni bagi kapasiti ke patut diulih lalu, beguna amat, bakani ngulihka nya. Dalam mayuh chara, komuniti belajar ari ti ngereja, lalu semua pelajar ti udah dipelajar, udah ia ditapis sereta dialuska lalu diguna ba mayuh bengkah gaya setting ba maya ti lama, nya baru dipasuk dalam perengka pelajar. Endang dikelala ianya sekeda aktiviti sigi saut asal ngagai guna spiritual raban mensia. Study circle, kelas anakmit, serumpu sambiang, lalu udah nya grup nembiak lanjau nyulut dipeda nyadi pugu ti beguna dalam pekara tu, lalu dianyam begulai enggau semua aktiviti bukai ti bisi kaul, dinamik ti nyadi tau mansutka sidan pengeregas pengidup komuniti. Lalu lebuh makin mayuh orang enggau dalam aktiviti pugu tu, dimensyen ti baru mega ditambah ngagai tuju asal ia. Sida gawa nyadika penama ke ditengah bala nembiak, orang besai tuai sereta serampur diri sebilik ari society luas tau betunga enggau Revelasyen Bahá’u’lláh. Nyau lebih nyata agi ulih dikereja lebuh ngerundingka strategi dikena gawa nirika komuniti dalam konteks “klaster”: siti sitak geographik ti ulih diintu ke ngembuan penteba rama enggau ekonomi ti nyemetak dipeda. Kapasiti nyendiaka pelen ti mudah ba tikas klaster berengkah diradu, lalu pansut ari pelen ti baka nya, progrem pemansang ba Pengarap mega ayan, diatur dalam pusin aktiviti tiga bulan. Siti pekara ti terang beguna mesti ayan dulu: pejalai siku siku nengah ripih kos meri peransang ke, lalu diteruska enggau, pejalai klaster niti arus pemansang. Kaul ti begembar mantu bala pangan ba tiap endur nyidi dinamik pemansang ba endur ngelingi sida empu lalu ngerintis menasan nuju penambah pengering. Nyau kelama, ditemu bisi asil lebuh meda utai ti nyadi dalam klaster nengah kedua dua perspektif ianya perspektif tiga imperatif pelajar—ti dikenatai ngagai bala anakmit, nembiak lanjau, sereta bala nembiak enggau orang besai tuai—lalu pia mega perspektif pusin aktiviti ti beguna ngagai rentak pemansang. Separuh jalai ngagai pengawa ti dikereja kandang duapuluh lima taun, mayuh ari nya nyadi penteba ti nyengala dipeda dalam proses pemansang kediatu nyau majak entap.

Lebuh pengawa bala pangan nyau dedat, mayuh batang ajar, konsep enggau strategi ke selampur relevan ngagai proses pemansang mupuk nyadi ke perambu kereja ti tau mansang deka nerima mayuh elemen baru. Perambu kereja tu nyata beguna dikena mansutka pengeregas penguat pengidup. Ia mantu bala pangan manchurka tenaga sida dalam mayuh chara, baka ti ditunjuk ari peneleba, ti pulaika pemanah pemansang komuniti ti gerai. Tang perambu kereja tu ukai siti formula.

Lebuh ngambi kira mayuh bengkah elemen perambu kereja dalam nyidi realiti siti klaster, siti lokaliti, tauka semina siti genturung pendiau, dia sidan aktiviti tau dikemansang nitihka utai ti udah dipelajar dunya Bahá’í ba tempat bukai dalam nyaut utai ti diguna ba tempat nya. Siti dikotomi antara guna ti terit ba sepiak enggau peneka siku siku ti nadai tatak ba sepiak meri jalai ngagai pemereti ti lebih manah agi ba mayuh bengkah chara bakani siku siku tau nyukung proses nya, nyadi kah ianya, ia bekaul-kait sereta seruran dialuska lebuh peneleba udah dikukun. Awakka nadai pengakang dalam pemansang ti ditunjuk nengah pemansut perambu kereja tu: empas pengawa begempung enggau beserakup ba serata dunya Bahá’í lalu ngenyungka penerus pejalai ia endang bisi empas penyadi ti besai.

Lebuh siti Pelen betunda udi enggau ke siti, lalu enggau dalam pengawa nirika komuniti makin lebih luas, pemansang ba tikas daya idup mega makin nyata. Ambika banding, pemesai guna meri pelajar ngagai sida rebak ke agi biak nyau makin diterima, baka nya mega pengulih ti ngelui ari selama ke lebih agi diayan bala nembiak lanjau. Bala semengat nyukung sereta nyempulang pangan diri nengah menasan ti dikunsi, seruran ngemesaika agi sengkaum betulung pangan diri, nyadi sidan alai semua pengawa ke dituju ngagai ngemansangka kapasiti ti nyadika niat servis. Nyentukka kaul antara bala pangan empu sereta kaul sida enggau orang ngelingi sida mega bisi ubah, lebuh pengeleda kuasa randau bebatang diangkatka dia penerima spiritual ditungkun sereta ditiup. Lalu chukup beguna, mayuh komuniti Bahá’í ngembuan orientasyen perening ke luar ti makin betambah. Sebarang semengat ke deka nerima visyen Pengarap tau nyadi orang ke enggau ti regas— nyentukka nyadi promoter enggau fasilitator—mayuh aktiviti pelajar, aum endur besambiang enggau mayuh elemen bukai dalam pengawa nirika komuniti; ari bala semengat ke baka nya, mayuh mega sida madahka pengarap diri ba Bahá’u’lláh.

Nya alai, penemu pasal proses masuk beraban mayuh ayan kurang bepanggai ba teori enggau pelaba tang lebih ba peneleba ti amat bakani mayuh orang tau tetemuka Pengarap, makin beteleba enggau nya, dikelala enggau tuju ia, enggau dalam mayuh aktiviti sereta randau ia, lalu mayuh mega nerima nya. Kebendar, lebuh proses institut dikeringka ba bengkah menua siti ngagai bengkah menua siti, pemayuh orang siku siku ti sama bela bekunsi dalam pengawa Pelen, dikemanjai sampai ke ngagai orang ti baru bekelala enggau Pengarap, udah ngerembai belipat lipat. Tang tu ukai dikereja ketegal deka ngulih ke pemayuh tubuh. Siti visyen transformasyen ba siku siku enggau beraban bela benung nyadi, bepun ari ti belajarka Lekajaku Petara lalu nerima kapasiti tiap iku endang tau nyadi protagonis dalam drama spiritual ti nyengala, udah ngadaka pengasai ati deka ngereja pengawa ti sama.

Siti ari penteba ti chukup nyulut sereta meransang ati dalam kandang pengelama duapuluh lima taun tu ianya servis ti dikenataika bala nembiak Bahá’í, ke ngembuan pengarap enggau pemerani udah ngengkahka sida ba pematut tempat sida ba luan pengawa komuniti. Nyadi bala pengajar ba Pengawa Petara enggau pengajar ke sida ti biak, nyadi bala mobile tutor enggau homefront pioneer, nyadi klaster koordinator enggau nyadi kaban ba mayuh bengkah agensi Bahá’í, bala nembiak ba lima kontinen udah angkat gawaka komuniti sida enggau pengangkun sereta bekorban. Maturiti ke udah ditunjuk sida, dalam bejalaika ungkup kereja sida dalam ngemansangka Pelen Petara, mandangka penguat pengidup spiritual sida enggau pengeran sida deka nyaga pemanah pengidup mensia jemah ila. Ngelala tanda pengamat ti makin nyata bekaul enggau maturiti tu, kami ngaga pemutus ianya, tekala nya pengudah Riḍván tu, taja umur orang ti arap ke tau gawa ba Raban Gelumu Sambiang agi terus ba umur duapuluh satu, umur orang ti arap ke tau ngundi dalam bepilih Bahá’í deka diturun ngagai lapanbelas taun. Kami nadai kakang ianya bala nembiak Bahá’í ba semua tempat ke udah chukup umur deka nyukung pengandal kami dalam pengulih sida alai tiap iku ngamatka pinta nyadi pengundi Bahá’í ti

“silik sereta rajin” bejalaika “ungkup-kereja suchi”.

Kami nemu ianya, sigi ke gaya ia, realiti komuniti sigi jauh bebida. Komuniti bansa ti bebida, tempat ti bebida dalam komuniti nya, berengkah enggau riris Pelen ba tikas pemansang ke bebida: kenyau ari nya, sida mega udah mansang ba pengelaju ti bebida lalu udah datai ba tikas pemansang ke bebida. Tu, dalam gaya ia empu, ukai utai ke baru. Endang seruran ke baka nya ianya gaya ba mayuh tempat enda sebaka, lalu bakanya mega gaya penerima ba tempat nya.Tang kami ngasaika, mega, lenggang pasang, ke alai kapasiti, pengandal enggau kukun peneleba ba nyau deka semua komuniti diatu udah angkat, dikelapungka enggau pemujur komuniti ti sama ke bukai baika semak tauka jauh. Nyadika siti chunto, lebuh bala semengat angkat muka lokaliti menua ke baru dalam taun 1996 endang nadai pengurang ba pemerani, pengarap enggau pengangkun, diatu bala ke ngereja pengawa ke sama di sebarang endur mega nambahka qualiti ti sama nya enggau penemu, pengelansik ti dalam sereta pengelandik ti udah dikukun dalam pengelama dua puluh lima taun ba pengawa ti dikereja di selampur dunya Bahá’í ngerurun sereta ngaluska pengawa ngerembai enggau ngenegap.

Enda ngira tikas endur komuniti berengkah, ia endang udah ngangkatka proses pemansang lebuh ia udah begulaika kualiti pengarap, pengepuh sereta mekuh enggau besedia deka belajar. Ke bendar, legasi ti amat diasika dalam ripih semua Pelen ianya penyauh pengerembai penerima ke alai kereja dikena ngangkat berengkah enggau orientasyen deka belajar. Pemudah batang penemu tu enda ngipakka pemesai empas ia ti deka pegari ari nya. Kami endang nadai pengirau ianya tetiap klaster, nyau kelama ila, deka maju niti arus pemansang: komuniti ti balat udah angkat enggau jampat agi, bebanding enggau tempat ke ngembuan gaya enggau peluang ti sama, udah mandangka pengulih ngeringka penyerakup runding lalu belajarka pasal kereja ti semitan. Lalu sida ngereja nya enggau nadai pengakang gawa.

Mekuh pengawa belajar tu mega enda takutka bisi penyilap - lalu kekadang, sigi amat, penyilap bisi ngasuh enda lantang. Endang disadang, chara ke baru enggau langkah-rapat sigi terubah dipelajaika enggau nadai pengelandik laban ke kurang peneleba: kekadang, pengulih ke baru udah dipelajar ngena siti gaya temu lenyau lebuh maya siti komuniti kiruh ngemansangka chara ke siti agi. Ngembuan tuju ke pemadu manah nya ukai nyamin nadai salah singkang, lalu maju ninggalka nya begunaka pemaruh ati enggau pengelengka. Lebuh siti komuniti meruan keran deka mandangka pengeliat lalu belajar ari penyilap ti sigi selalu nyadi, pemaju endang enda kala enda ulih dijapai.

Ba tengan ripih semua Pelen, nya baru pengawa raban ba pengidup society deka terus lebih diberi perati. Bala pangan deka diperansang berundingka tu dalam dua bengkah pengawa ti bekaulkait - kereja sosial enggau dalam randau rama ke benung nyadi ba society. Semua tu, endang sigi, ukai ke ganti pengawa ngerembai enggau ngenegap, lebih agi ukai ngelimpangka nya: semua tu endang di dalam pengawa dua iti nya. Lebih mayuh agi sumber mensia ti ulih dikangau siti-siti komuniti, lebih kuat agi mega pengulih sida mansutka pemintar ti disimpan dalam

Revelasyen Bahá’u’lláh dikena napi chabar pengawa besari-sari - nyalin ajar Iya ngagai realiti. Lalu pekara mensia ke nyau kachau-bilau ba maya ke diatu udah baka ke ngayanka pemesai guna begigaka penawar ke diberi ulih Lutur Kudus. Reti dalam semua tu ianya pemereti pasal agama jauh bebida ari pemereti sida ke lebih agi megai kuasa ba dunya; pemereti ti ngelala agama nya kuasa ti bisa dikena ngenyungka temadun ti majak mansang belama. Endang sigi udah ditemu ianya temadun ke bakanya nadai mega deka ayan enggau ngenyit, nitihka peneka ia empu - ianya endang misyen penitih Bahá’u’lláh bebendar gawa ngambika ia ulih pegari. Misyen ti baka nya minta bejalaika proses belajar ti berurun ti sama dalam kereja sosial enggau dalam randau rama mensia mayuh

Dipeda ari perspektif sekumbang dua puluh lima taun ke udah, pengulih kereja sosial udah jauh bendar niki, ti ngujungka aktiviti udah mansang ngelui ari selama. Bebanding enggau taun 1996, ke alai semina 250 iti kereja sosial enggau pemansang projek ekonomi bisi dipejalai ari taun siti ngagai taun siti, lalu diatu bisi 1,500, lalu pia mega pemayuh gerempung ke diperansang ajar Bahá’í diatu udah bisi betambah empat kali lipat ngelui ari 160 iti. Lebih ari 70,000 inisiatif kereja sosial perayat ti serekat bisi ditumbuhka tiap-tiap taun, udah nambah lima puluh kali lipat. Kami keran deka meda semua pengawa tu majak nambah ti nyadi ketegal ari sukung penuh enggau peransang diatu diberi ulih Bahá’í International Development Organization. Bakanya mega, bala Bahá’í ke enggau dalam randau rama ke benung nyadi dalam society udah mega balat majak nambah. Kelimpah ari mayuh peluang lebuh bala pangan ulih meri penemu ari perspektif Bahá’í ti nyadi enggau lebuh bekereja tauka randau enggau orang siku siku, diatu nyau majak nyengala mayuh agi randau formal diatur. Endang bisi dalam runding kami ukai semina pengawa ti balat ngerembai enggau pemeri ti lebih sofistikated ari Komuniti Bahá’í Antara Bansa, ia ke diatu udah nambahka Opis sida di Africa, Asia enggau di Europe - tang pia mega sangitkaul pengawa Offices of External Affairs bansa, udah balat ditambah sereta ditegapka, lalu enggi sida meh bidang kereja tu endang udah nyadika batang pengawa; nambahka nya, bisi sekeda orang udah meri penemu tinjau ti jauh sereta nyengala ba mayuh bidang spesifik. Semua tu endang bisi bendar nunjukka basa, puji enggau pengerindu ti diberi bala ketuai orang ti landik bepikir enggau orang ti tebilang ba semua tikas society udah bekali-kali diberi ngagai Pengarap, bala penitih ia enggau aktiviti ti dikereja sida.

Lebuh ke berati baru dua puluh lima taun ke udah, kami temegah bendar ba mayuh pemansang ke sama sama bela udah nyadi ba dunya Bahá’í. Pengidup intelektual ia udah galak bendar, baka ke udah dipandangka ukai semina ba pengangkat ia dalam semua bidang pengawa ti udah dipejuraika, tang mega ba pemayuh litericha ti bekualiti tinggi ke udah ditulis ulih penulis-penulis Bahá’í, ba pemayuh ruang endur matau sekeda batang penemu nitihka ajar, enggau empas seminar undergraduate enggau graduate ti enggau berurun diatur Institute for Studies in Global Prosperity, ti, besaum kereja enggau Institusyen Pengawa Petara, diatu dipasuk bala anembiak Bahá’í ari lebih 100 buah menua. Pengawa ti bebendar deka nirika Rumah Sembah udah nyengala jampat amat. Indu Rumah Sembah ti penudi udah didirika ba Santiago, Chile, lalu projek deka nirika dua Mashriqu’l-Adhkár tikas bansa enggau lima tikas menua udah berengkah; Rumah Sembah ba Batambang, Cambodia, enggau ba Norte del Cauca, Colombia, udah muka pintu sida. Rumah

Sembah Bahá’í, baika nya ia ke baru bendar udah dipenyadi tauka ia ke dulu didirika, nyau mupuk majak ngambi tempat ia ba ati pengidup komuniti. Sukung material ke diberi semua peringkat bala ke arap ngagai mayuh macham pengawa ti dipejalaika ulih bala pangan Petara udah enda ulih disekat. Semina dipeda baka sukat gempung penguat pengidup spiritual, pementas enggau bekorban ti dikena, ba maya penanggul ekonomi ti balat, penatai duit fund ke pemadu diguna udah meruan belama- ukai semina nya, tang dikuatka agi - endang nyengala. Dalam dunya Administrasyen Bahá’í, pengulih Raban Gelumu Sambiang Bansa ngatur mayuh pekara dalam komuniti sida dalam gaya pemansang ti kompleks udah balat bendar disungkakka. Sida bisi bendar bulih penguntung ke lebih agi ari kaul enggau bala Pengelalau ba tikas baru ke tinggi agi, lalu ketegal sida ti ngatur gelumu ti berurun endur ngumpul seling penemu ari semua rayat diselampur dunya lalu nentuka seling penemu nya dikerembaika enggau naka pengeluas.Tu mega maya endur Regional Bahá’í Council udah nyadi siti institusyen penuh Pengawa Petara, lalu diatu bisi dalam 230 sitak menua, Council enggau institut pematih ti dijaga sida udah mandangka pemesai guna pengawa sida dikena ngangkatka proses pemansang. Nyambung ke dudi hari ila pengawa Kepala Trustee Ḥuqúqu’lláh, Jari Pengawa Petara ‘Alí-Muḥammad Varqá, International Board of Trustees ke Ḥuqúqu’lláh udah ditumbuhka dalam taun 2005; diatu ia ngatur kereja ba nadai kurang ari 33 Boards of Trustees ba tikas Bansa enggau Regional tang diatu udah mungkur dunya. lalu sida nya udah ngiring pengawa lebih 1,000 iku Wakil. Pemansang ke nyadi ba Pusat Dunya Bahá’í maya ti sama tu endang mayuh amat: penembu ngaga Teres endur Sungkup Nabi Bab enggau dua buah rumah besai ba Arc enggau ngepunka pengawa ti deka nirika Sungkup Abdu’l Bahá, tu enda nyengkaum mayuh projek dikena ngering sereta ngenanka Tempattempat Kudus ke Pengarap tu. Sungkup Bahá’u’lláh enggau Sungkup Nabi Báb, nya udah dikelala nyadika tempat ke Lanting Dunya, tempat ke enda ulih sukat pemesai reti ia ngagai mensia. Mensia mayuh nyau bebala nyentukka nyau beratus-ratus enggau beribu-ribu iku ngusung tempat suchi tu lalu diatu nyau semak sejuta setengah ba sekeda taun, lalu Pusat Dunya mega seruran ngelaluka beratus iku pilgrim ke datai serentak, lalu kekadang lebih 5,000 iku dalam kandang setaun, sama begulai enggau bala temuai Bahá’í ke bukai; kami gagit amat ati laban penambah enggau naka pemayuh mensia ari mayuh pupu bansa enggau menua ti diwakil bala ke bulih berekat pilgrimej. Teks Suchi ke udah disalin, dichelak sereta disadung mega balat bendar dilajakka, segembar enggau pemansang Bahá’í Reference Library, siti ari kaban ti nyengala dalam ruang bilik website ti bekaling enggau Bahai.org, ia kediatu bisi dalam sepuluh bansa jaku. Mayuh macham opis enggau agensi udah didudukka, bisi ba Pusat Dunya enggau bisi ba tempat bukai, diberi kereja nyukung proses belajar ti benung dikerembaika ba mayuh bengkah bidang pengawa di selampur dunya Bahá’í. Semua tu, bala menyadi dalam pengarap, nya semina mimit aja ke ulih dicherita kami bekaul enggau pengangkun kita ngagai Iya Siku Dipesalah ke Dunya udah dibai ke mua. Kami ulih tang nunda lekajaku sedu-sedan ti kala disebut Tuai ti dikerindu, lebuh, dialah laban penyinu, Iya manjung: “O Bahá’u’lláh! Nama ti udah dikereja Nuan?”

Ari panorama suku abad ke pemadu ia beguna, kami diatu nungaka pekuh kitai ngagai Pelen Lima Taun ti baru udah lalu, siti Pelen ke enda tentu sebaka dalam mayuh bengkah jalai enggau ia ke dulu ari nya. Dalam Pelen tu kami minta bala Bahá’í di dunya nguna semua utai ke udah dipelajar sida dalam kandang duapuluh taun ke udah lalu sereta bala Bahá’í nguna nya enggau penuh. Kami gaga ati laban pengandal kami dalam pekara tu udah ulih ngelui ari ke dijangka, tang taja kami nyadang pemujur besai ari bala penitih Pemajik Beberekat, gaya pemujur ke udah dijapai nengah kereja sida gawa penapat inat amat ngelantangka ati. Ia nyadika pugut penembu kereja duapuluh lima taun ke udah.

Pelen tu amat dikingatka ketegal dibagi tiga ulih dua pengerami suchi dua ratus taun, tiap tiap nya udah ngeringka komuniti menua di serata dunya. Raban bala ti taluk udah mandangka, ngagai tikas ti nadai kala disaksi enggau gaya ti mudah, siti kapasiti mai orang ari semua pupu raban ba society meri basa ngagai pengidup Seruan Petara. Tu nyadi penunjuk ti amat kuat ngagai utai ke lebih besai: pengulih ti deka manchurka penatai tenaga spiritual ti naka pemayuh dalam ngemajuka Pengawa Petara. Chukup manah meh penerima alai ba mayuh tempat Pengarap ti lindung udah dikebu pansut ba tikas bansa. Ba mayuh setting alai ia enda disadang, nyangka enda diperatika, nunjukka penerima ngagai Pengarap nyadi nyata. Beribu atas beribu atas beribu diangkatka nengah sida betunga enggau roh nyembah Petara ti nyadika penteba kediatu ba mayuh komuniti Bahá’í di tiap endur. Visyen tu ulih nyadi ari ti ngintu Hari Kudus Bahá’í udah dikerembai enggau naka pengeluas.

Semua pemujur Pelen tu, dikira dalam pemayuh ia, udah jampat ngelui semua pemujur ba Pelen ti dipejalai dulu agi kenyau ari taun 1996. Lebuh maya Pelen tu berengkah, kapasiti ke bisi semina ulih ngatur lebih mimit ari 100,000 aktiviti pugu ba siti siti maya, siti kapasiti ke diasil ari kereja duapuluh taun ba pengawa ti sama. Diatu, 300,000 aktiviti pugu ulih ditan ba sebarang maya. Bala ti enggau dalam aktiviti nya udah manggai lebih dua juta, ke betambah nyau semak tiga kali lipat. Bisi 329 institut pematih ba tikas bansa enggau bengkah menua ti benung dipejalaika, lalu kapasiti sida ditunjuk nengah tiga suku juta orang udah ulih nembuka abis kurang siti bup dalam rurun nya; raup sekali, penyampau kos ke udah ditembu orang siku siku diatu mega dua juta—niki lebih bagi tiga dalam lima taun.

Penerit ti betambah alai progrem pemansang dipejalai di serata dunya nyeritaka pemujur ia empu. Dalam pengelama lima taun tu, kami udah minta pemansang ia dilajakka dalam tiap tiap 5,000 klaster ke alai ia udah berengkah. Peminta naka ia beguna tu udah nyadika peransang gawa bebendar di serata dunya. Asil ia, penyampau progrem pemansang dedat udah betambah dua kali lipat lalu diatu bisi kira 4,000. Bisi penanggul muka tumpuk enggau tempat pendiau ti baru ngagai Pengarap ketegal ke benung dituntung krisis pengerai global, tauka ngerembaika aktiviti ke benung ba tikas baru tumbuh maya pandemik berengkah, ngenekul ngulihka penyampau ti lebih tinggi dijapai ba taun pengujung Pelen. Taja pia, agi mayuh ulih dicherita ari tu. Ba pun Pelen, kami udah madahka pengandal ianya penyampau klaster alai bala pangan udah mansa batu tanda ketiga dalam arus pemansang, asil ari belajar bakani ngelaluka penyampau ti mayuh ngagai serangkung aktiviti sida, deka mansang lebih beratus ratus. Penyampau maya nya bisi kira 200, dipejalai ba kira kira 40 menua. Lima taun udah nya, penyampau tu udah niki ngagai 1,000 ba kira kira 100 menua—sesuku ari semua progrem pemansang dedat di dunya siti pemujur ti ngelui ari sadang kami. Lalu taja pia penyampau tu enda ngayanka peninggi tuchung ke alai komuniti tu udah angkat. Lebih 30 klaster alai penyampau aktiviti pugu ke ulih ditan ngelui 1,000; ba mayuh tempat, penyampau bisi beberapa ribu, ke alai pemayuh orang enggau bisi lebih 20,000 iku orang ba siti klaster. Makin mayuh Raban Gelumu Sambiang Menua diatu ngemataka pengerembai progrem pelajar ti meri pelajar ngagai semua anakmit enggau nembiak lanjau ba siti tumpuk pendiau; realiti ti sama mega berengkah ayan ba sekeda kandang pendiau di bandar. Begunaka Revelasyen Bahá’u’lláh udah, nyata ba sekeda maya, ngilah orang siku siku, diri sebilik enggau kaban belayan ti jauh—utai ti benung disaksi ianya penginsit raban mensia nuju siti pusat. Bisi maya, laya lama antara raban diatu udah dilengka, lalu sekeda struktur enggau dinamik rama udah berubah nitihka penampak ajar kudus.

Kami enda ulih enda gaga meda pemansang ti amat manah tu. Kuasa nirika society ba Pengarap Bahá’u’lláh udah ayan enggau lebih terang, lalu tu meh nyadika pelasar ti tegap ke alai Pelen Sembilan Taun ke datai deka didirika. Semua klaster ke nyulut kuat, baka ti udah dikandalka, udah nyata nyadi lubuk penemu enggau sumber ngagai klaster ke besemak sida. Lalu bengkah menua ke ngembuan lebih ari siti klaster ti baka nya lebih mudah ngelajakka chara dikena ngenyampatka pemansang siti klaster ngagai siti klaster. Kami ngasai patut ngengkang madah sekali agi, taja pia, pemujur baka nya nyau deka selampur; bida pemujur ba siti tempat enggau siti tempat semina ba tikas. Gempung pemereti komuniti pasal proses masuk beraban mayuh sereta pengandal ia ba pengulih meransang proses tu ba sebarang gaya udah disungkak ngagai tikas ti enda ulih disadang dalam beberapa puluh taun ti lalu. Mayuh tanya ti nyemetak ke lama udah enda teputar, lalu dibai ngagai fokus ti tajam dalam taun 1996, udah mujur disaut ulih dunya Bahá’í. Bisi serebak bala orang ke arap ti nyerahka pengidup sida dalam ninggalka tukuh ba pemansang komuniti. Tang tikas pemesai bekaul enggau utai ti nyadi ba mayuh klaster alai pengerandang pelajar udah dikemanjaika agi udah nyadi pengangkat signifikan dalam proses masuk beraban mayuh nyadika pemujur besejarah ti chukup besai.

Mayuh bala endang teleba bakani Pengibun magi Rambau dalam Pengarap ngagai mayuh renggat ti betangkan tangkan; renggat kelima ba Rambau Formatif berengkah ba taun 2001. Kurang agi ditemu mega ianya Pengibun bisi ngenang beberapa renggat dalam Pelen Petara, lalu beberapa tikas didalam renggat nya. Bisi ditanguh pengelama duapuluh taun lebuh niri sereta ngeringka Atur Administratif raban menua enggau raban bansa, Pelen Petara ti dimun ulih ‘Abdu’l-Bahá mula dipejalai ba taun 1937 dia berengkah meh tikas keterubah ba renggat keterubah ia: Pelen Tujuh Taun ti diagih Pengibun ngagai komuniti Bahá’í di Amerika Utara. Renggat keterubah tembu pengudah pengujung Crusade Sepuluh Taun dalam taun 1963, ti mansutka asil alai menira Pengarap udah ditanam di serata dunya. Tikas pemuka renggat kedua ianya Pelen Sembilan Taun ti keterubah, lalu enda kurang sepuluh Pelen bisi nangkan nya, Pelen ke enda sebaka pengelama bisi nya duabelas bulan bisi mega tujuh taun. Ba pun renggat kedua tu, dunya Bahá’í udah berengkah besaksika pun tumu masuk beraban mayuh ngagai Pengarap ke udah dikenang ulih Pengarang Pelen Petara; dalam beberapa puluh taun nangkan nya, beberapa rebak orang ti arap ke angkun di dalam komuniti Nama Pemadu Tebangkar udah gawa dalam Kebun Anggur Petara ngeraduka gaya ti manah ti diguna kena ngetanka pemansang, ti besai. Lalu ba musim Riḍván ti mulia tu, naka meh pengelebat buah ari pengawa sida nya! Fenomena ti umbas ia pemesai udah nyegangka pemayuh aktivit ba komuniti, nerima perechi pengarap lalu jampat angkat gawa ba luan Pelen udah mindah ari tenung ti dikeringka ulih pengarap nyadi realiti ti betunda udi. Pemujur ti nyengala sereta segenda nya patut ditanda dalam sejarah Pengawa Petara. Enggau naka pengaga ati, kami ngerah ianya renggat ketiga dalam Pelen Petara ti dimun ulih Tuai udah berengkah. Tikas betangkan tikas, renggat betangkan renggat meh Pelen Iya deka dikerembai, nyentukka penampak Perintah Petara nerangka tiap tiap ati.

Bala pangan ti dikerindu, nadai sidi bekaul enggau enterprise lima taun ti udah nutup renggat kedua ba Pelen Petara dikira penuh enti nadai ngenang pasal penusah ti nyempulang taun penudi ia lalu diatu agi mengkang nyadi. Sekat ba kaul antara siku siku ti tengelam pansut ba mayuh menua ba kandang maya tu tau nasal ke gempung pengawa komuniti, ngeraika diri ari nya tau nguna pengelama beberapa taun, tang bisi dua kebuah ngasuh ia enda nyadi baka nya. Keterubah ianya pengeleda luas pasal ungkup-kereja ba bala Bahá’í dalam gawaka bansa mensia, lebih agi ba maya pemedis enggau penusah. Ia ke siti agi ianya tambah kapasiti ti ngelui ari selama ba dunya Bahá’í ti ngayanka pengeleda nya. Ngembuan peneleba bepuluh taun endur begunaka sidan kereja ti berurun, bala pangan ngena kreativiti sida sereta bisi tuju napi krisis ti enda disadang, pia mega nentuka langkah-rapat baru ti diguna sida sejantil enggau perambu kereja ke udah dikereja sida dalam beberapa Pelen ti betunda udi enggau naka pemetul.Tu ukai enda pedulika pemalat pemedis ke ditapi bala Bahá’í, sebaka enggau bala kaban sida ba tiap menua; taja pia sepemanjai penusah ti udu nya, bala orang ti arap seruran fokus. Mayuh sumber udah dipanchur ngagai mayuh komuniti ti begunaka ia, lalu ba semua maya semua institusyen Pengawa Petara terus bejalaika ungkup-kereja sida. Singkang ke mua ti berani bisi mega digaga. Raban Gelumu Sambiang Bansa ke São Tomé enggau Príncipe deka ditumbuh baru ba Riḍván tu, lalu dua tiang pemun baru ke Rumah Pengelurus Serata Dunya deka didirika: Raban Gelumu Sambiang Bansa ke Croatia, ke bepenuduk di Zagreb, enggau Raban Gelumu Sambiang Bansa ke Timor-Leste, ke bepenuduk di Dili.

Enggau nya meh Pelen Satu Taun berengkah. Tuju enggau semua guna ia udah dirintai dalam pesan kami ti dikirum maya Hari Sempekat; Pelen tu, taja pandak, tang chukup dikena nyendiaka dunya Bahá’í nuju Pelen Sembilan Taun ti entudi nya. Timpuh maya ti ngembuan pemisa ti spesial, ke dibuka seratus taun pengudah Papan Tulis Pelen Petara dipegarika, enda lama agi deka ditutup enggau seratus taun Peniki ‘Abdu’l-Bahá, nandaka penutup abad keterubah ba Rambau Formatif lalu ngepun ia ti kedua. Raban ti taluk masuk ngagai Pelen ti baru tu lebuh maya bansa mensia, diukum ketegal nyengala nadai daya, dipeda lebih ngeleda pasal guna bekereja sama dalam mutar mayuh chabar global. Taja pia, agi bisi perangai bepekit, ngira peneka diri, runding sangka enggau runding ti tutup seruran ngempang pejalai nuju penyerakup, taja pen makin mayuh orang ba society mandangka ba lekajaku enggau pengawa-badas bakani sida, mega, keran deka nerima penyatu ti sigi dikembuan bansa mensia. Kami besambiang awakka semua menua ti bediri sebilik tau mujur muai ke tisi semua penyerekang ia lalu ngambi utai ti pulaika pemanah semua. Enda kira utai ke enda ulih ditentu ti malut beberapa bulan ke deka datai, kami minta-kasih Bahá’u’lláh ngambi meri semua pengentap ke udah ngenanka bala penitih Iya ngelama tu makin mayuh semayuh, awakka kita tau diasur ke mua dalam misyen kita, pengelikun ati kita enda tejanggal laban dunya ke charut ti makin begunaka pesan pengerai Iya.

Pelen Petara masuk ngagai renggat baru enggau tikas baru. Lambar udah dikalih.

 

Windows / Mac