The Universal House of Justice
Ridván 2018
To the Bahá’ís of the World
Dearly loved Friends,
Kami nabi kita dalam penampak bara ti teguh pengudah pengerami ti dikingat nanda dua ratus Pengada Pemajik Beberekat. Lebuh kami ngerunding pekara ti nyadi pengudah pengerami nya, kami nemu ianya komuniti Bahá’í serata dunya kediatu enda sebaka enggau ia lebuh ia belabuh ngereja enam putar keterubah ba Pelen kediatu. Ia makin ngelala ari ti udah tentang misyen diri. Ia udah bulih segang ti enda disadang dalam pengulih ia mai bala pangan sereta orang ti beteleba enggau ia ngasaika pengidup komuniti ia; meransang orang ti besemak pendiau sereta genturung ngereja pengawa begempung; nguna baka ni pengamat pemansang semengat tau dikena dalam ngetanka pengawa ti ulih dikereja; lalu, ngelui ari semua, ulih berandau ukai semina pasal ajar ti diguna nirika dunya ti baru, tang pasal Siku ti Mai ajar nya: Bahá’u’lláh. Jerita pasal pengidup Iya enggau pemerinsa Iya dicherita dalam mayuh bengkah jaku ulih orang besai tuai, bala nembiak, enggau bala anakmit udah negu mayuh bendar ati. Sekeda sida nya udah mandangka diri empu besedia deka mansik dalam agi Pengawa Iya. Sekeda udah besemaya deka bekereja sama. Lalu mayuh semengat ti deka nerima udah tetarit nyambut enggau pengarap ati.
Siti tanda pemansang ti nyemetak ianya ba mayuh tempat nyata bendar Pengarap udah pansut ari pengelindung ba tikas bansa. Sekeda ketuai perintah enggau ketuai penemu udah nyengala madah —lalu kadang kadang nyemetak madah maya berandau kediri—ianya dunya begunaka visyen Bahá’u’lláh lalu pengawa bala Bahá’í sigi dikerindu lalu patut dikerembai. Chukup ngelantangka ati kami meda ukai semina bala Bahá’í ti deka bebasaka Bahá’u’lláh lalu ngerami pengidup Iya—sekeda pengerami bisi diatur ulih orang ari luar komuniti Bahá’í. Ba endur alai Pengarap bisi dibantah, bala pangan enda rawan; nunjukka pengeliat ati ti chukup tinggi, sida meransang bala kaban sida mansik pengamat kediri empu, lalu mayuh lantang ati enggau dalam pengerami. Pengerami dua ratus taun udah mega mansutka pengelandik artistik ti nadai sekat, mandangka tanda sungai pengerindu alai ia bepun. Chara komuniti Bahá’í ngintu pengerami tu netapka naka pemayuh ti udah dipelajar dalam kandang lebih dua puluh taun diatu, kenyau ari rintai Pelen serata dunya kediatu udah berengkah. Orang siku siku ti arap udah ngambi inisiatif kediri empu, komuniti udah angkat ngereja pengawa begempung, lalu bala pangan udah ngiri pengering kreatif sida ngagai pelen ti disedia ulih institusyen. Pengerami ti besai reti, nanda dua ratus taun udah lalu, meri peransang ti chukup kuat ngagai pengawa nirika komuniti dalam beratus taun ti deka datai. Dalam renggat maya nuju ngagai pengerami dua ratus taun ti kedua, beri genap iti leka ti udah ditanam enggau chukup pengerindu ba pengerami ti keterubah diintu enggau naka pengeliat ati nyentukka ia bebuah.
Dua taun masuk ngagai Pelen kediatu, taja pemansang sigi enda sebaka ba menua siti enggau menua siti, penyampau program pemansang dedat di dunya nyau deka mangai setengah ari lima ribu ti disadang ba pun pengiruh gawa kediatu, lalu peneras penyampau tu niki makin mansang. Diperati silik agi, endang bisi tanda pengandal baka ni kuasa enggau pengulih siku siku, komuniti, enggau institusyen deka ayan. Ba bala orang ti arap dini dini endur, peneleba ti ulih ari pengerami dua ratus taun nunjukka dalam mayuh kaul sida besari sari enggau orang bukai ti ngelingi sida tau disempulang enggau semengat ngajar. Lalu lebuh pengawa ba beribu iti genturung sereta tempat besemak pendiau makin bulih peneras, pengidup komuniti ti regas makin tumbuh ba tiap endur nya. Penyampau klaster alai sistem ngerembaika rangkar aktiviti tu ngagai makin mayuh tempat nyau betambah tegap—ari nya, mai, bala pangan ulih mansa tanda batu ketiga dalam kontinum pejalai pemansang—udah nyengala dipeda. Lalu ba tu, di luan pelajar dunya Bahá’í, kelebih agi dalam pejalai mensia mayuh nuju visyen Bahá’u’lláh, ukai semina makin mayuh masuk ngagai berap besai aktiviti Bahá’í tang bala pangan diatu nyau belajar baka ni grup ti betambah tetemuka chara ngelala diri empu enggau komuniti Nama ti Pemadu Tebangkar. Kitai diatu meda pengawa pelajar ba Pengarap nyau nitih rangkar ti makin formal ba sekeda tempat, lebuh bala anakmit mansang nadai tejangal niki gred ari taun siti ngagai taun siti lalu tikas program empowermen pemansang semengat nembiak lanjau mansang betunda udi. Ba tempat ti baka nya, institut pematih bisi belajar nentuka sumber mensia ti chukup bisi disediaka dikena napi nyendiaka pelajar pemansang semengat enggau moral ngagai bala anakmit enggau nembiak lanjau ti makin betambah pemayuh ia. Enggau dalam aktiviti pugu tu nyau makin dititih ba perangai mensia mayuh lalu dipeda nyadika siti aspek pengidup ti enda tau enda ba komuniti. Siti pengeregas ti baru nyau ayan ba raban ti nentuka pemansang diri sida empu, lalu sida nirika pengebal ngelaban kuasa raban ti nginang nadai pengibuh. Pengulih nempa pemansang material enggau pemansang semengat nyau makin dipeda. Realiti rama berengkah berubah.
Bala pangan ti dikesayau, amat bendar tu meh maya alai meri terima kasih ngagai Siku ti Pemadu Dikerindu. Sigi mayuh kebuah ti besai alai teperansang. Taja pia kitai mega nemu pemesai pengawa ti agi empai dikereja. Kebendar, baka ti udah dipadah kami dulu ari tu, mesti ayan ba beratus iti klaster alai makin mayuh raban orang ti arap ke ulih ngetan, enggau orang ti ngelingi sida, fokas ti teguh dalam nginang pemansang lalu nirika kapasiti, ti dikelala ketegal pengulih sida sereta disiplin sida dalam ninjau ngagai pengawa sereta belajar ari peneleba. Nirika sereta nyempulang nukleus siku siku ti makin besai ba tiap tempat—ukai semina ba tikas klaster tang ba genturung pendiau enggau tempat ti besemak—siti tangkup pengawa ti chukup berat sereta chukup diguna. Tang dini pekara baka tu nyadi, asil ia nyerita pasal diri empu.
Kami tetap deka meda semua institusyen Pengarap ngembuan guna ti tinggi tu ba mua runding sida, ngaga jalai ti engkeman dikena ngulihka seling penemu ti datai ari pemansang ngambika diguna enggau luas. Ba maya ti sama, peneleba ti besai agi deka nyikap raban bansa, bengkah menua, sereta menua sama bela ngembuan visyen ti lebih luas. Sida makin enggau dalam semua aspek pemansang komuniti lalu lebih ibuhka pengelantang pengidup mensia ukai semina ngagai kaban ia aja. Ngelala pemesai empas proses institut ti pulaika pemansang mensia, sida mega meri perati ti tinggi ngagai baka ni ngeringka institut pematih. Sida seruran ingatka guna alai ngetanka fokas komuniti ngagai utai ti diguna Pelen lalu minta segala bala pangan ti makin besai ngagai penyerakup ba tikas ti makin tinggi setinggi. Sida taluk bepegai ba tangkup pengawa sida dalam ngemanahka agi sistem atur pengawa enggau sistem pejalai wang ngambika pengawa ngerembai enggau ngenegap tau bulih sukung enggau manah. Dalam semua pekara tu, sida sigi tetap kiruh enggau nanam ba komuniti utai ti diguna kena ngelepaska penguat pengering kuasa pemansang semengat.
Lebuh pengawa nirika komuniti makin terit, bala pangan nguna kapasiti ti baru ti udah dikemansang sida dikena ngemanahka agi gaya pengidup mensia ngelingi sida, pengeransing sida ditungkun ketegal sida belajarka ajar Petara. Projek renggat pandak udah betambah naka pemayuh, program formal udah ngerembaika jengkau ia, lalu diatu makin mayuh gerempung pemansang ti beperansang Bahá’í enggau dalam pengawa pelajar, pengerai, betanam betupi, sereta bidang bukai. Ari pemansut ubah ti dipeda ba siku siku enggau pengidup begempung ba mensia mayuh ulih dikelala kesuh ti enda salah ke datai ari kuasa nirika raban ti dikembuan Pengawa Bahá’u’lláh. Nya alai, nadai kakang, ari teladan pengawa rama baka nya meh—sekalika ia mudah tauka komplex, ba maya ti tetap tauka dipejalai dalam maya ti lama—dia Upis ke Komuniti Bahá’í Antarabansa betambah bulih peransang dalam pengawa sida enggau dalam randau pasal pekara pengidup mensia kemaya haritu. Tu siti agi bidang ti beguna ba Pengarap ti udah mansang enggau manah. Ba tikas bansa, pemeri ngagai randau ti bisi reti ngagai pengidup mensia—pengerata kuasa ba lelaki enggau indu, bepindah menua enggau begempung, ungkup bala nembiak dalam ubah rama, enggau penyerakup ba pengarap, nya sekeda ari ia—bisi dikereja enggau lebih bepengandal, bepengelandik, sereta bepenemu. Lalu ba dini dini sida diau, gawa, tauka belajar, bala orang ti arap ari mayuh bengkah renggat umur enggau pupu raban bansa endang ngenataika pemeri ti chukup beguna ngagai siti siti randau, mai perati orang ngelingi sida ngagai batang penemu ke ditempa ulih Revelasyen Bahá’u’lláh ti luas.
Penuduk Pengarap dalam mayuh bengkah ruang alai randau bisi tebuka balat bendar disungkak ketegal ia bisi palan rasmi ba World Wide Web, palan nya makin ngerembai ari tambah beberapa iti Bahá’í website bansa enggau pemansang bukai ti bisi betangkai enggau palan bukai ke bisi kaul enggau Bahai.org. Tu meri reti ti chukup berega ngagai pengawa ngerembai enggau nyaga Pengarap. Dalam pengelama beberapa hari aja bala audien ti besai di serata dunya udah tetarit ngagai undan ke silik digaga ngenang Pengarap ti bisi dikenatai dalam website pengerami dua ratus taun lalu seruran dikemetul seretai dalam sembilan bengkah jaku, lalu diatu udah ditambah enggau lambar siti siti menua nunjukka pemayuh pupu bansa alai pengerami nya bisi diintu. Pelen mega udah nyulut dalam muka palan Bahá’í Reference Library siti endur ngenataika genteran tauka Papan tulis ari Tulis Kudus ti empai kala disalin enggau dichelak dikenatai enggau chara online tekala nya. Serimbai enggau tu, volume ti baru ke Tulis Bahá’u’lláh enggau ‘Abdu’l-Bahá’ dalam jaku English deka diayan dalam beberapa taun ti deka datai.
Di Santiago, Chile, enggau Battambang, Cambodia, Rumah Sembah pemadu baru di dunya ti udah dipejadi diatu nyadi pusat penarit ati ti tetap, nyadi tengau penampak ngagai raban sida nuju semua alai Pengarap bediri. Lalu pemayuh nya deka betambah. Kami enggau pengaga ati ngerah ianya pengerami bejadi Rumah Sembah di Norte del Cauca, Colombia, deka diatur dalam bulan Tujuh. Nambahka nya, pengawa nirika makin mayuh Rumah Sembah udah bisi ba tisi bingkai perening. Di Vanuatu, kemendar udah diterima alai deka belabuh nirika rumah. Di India enggau di the Democratic Republic of the Congo, proses ti chukup komplek sereta tusah udah mai ngagai pemujur ngulihka tanah. Gaga ati meda ukir Mashriqu’l-Adhkár bansa ti keterubah udah dibuka di Papua New Guinea maya Naw-Rúz empai tentu jauh surut dia ukir Rumah Sembah menua di Kenya mega bisi dikerembai. Kediatu, kami nyadang penerang enggau tibang penemu ngenang institusyen Mashriqu’l-Adhkár ti baru udah dikeluarka, disedia ulih Research Department kami, deka meransang penerima bala pangan ngagai pemesai reti nyembah Petara ba pengidup komuniti. Laban lebuh sida gawa, kelebih agi dalam bejarit serumpu sambiang, bala Bahá’í ba dini dini endur nanam pelasar pemansang semengat ngagai penumbuh Rumah Sembah ke jemah ila.
Semina tiga taun agi tinggal dalam pengawa sesuku abad ke berengkah dalam taun 1996 ke nyelinting ngagai siti tuju: pemansang ti besai dalam proses masuk beraban mayuh. Ba Ridván 2021, bala penitih Bahá’u’lláh deka berengkah enggau siti Pelen ti bejalai pengelama setaun aja. Pandak, tang ngandung enggau tangkan, pengawa satu taun tu deka ngepunka umbak baru ba Pelen ti mai bandung Pengawa Petara ngagai abad ketiga dalam Bahá’í Era. Dalam sepemanjai dua belas bulan ti besai reti tu, dunya Bahá’í deka ngintu pengerami seratus taun Peniki ‘Abdu’l-Bahá ke nyengkaum siti gempuru ti special ba Pusat Dunya Bahá’í alai pengari ari tiap iti Raban Gelumu Sambiang Bansa enggau tiap iti Regional Bahá’í Council deka dikangau datai. Tu, taja pia, nyadika ia ti keterubah ba rintai pengawa dikena nyendiaka bala penitih tentang utai ti diguna dalam bepuluh taun ti deka datai. Bulan Satu pengudah nya, saka seratus taun kenyau ari keterubah ia dibacha ngagai orang mayuh Will enggau Testament Tuai deka diatur aum di Tanah Kudus alai ngempuruka semua Bala Pengelalau Bengkah Menua enggau semua kaban Bala Penyanding ke Penyaga enggau Pengerembai. Penguat pemansang semengat ti dilepas ari dua iti gempuru historik tu mesti dibai pengudah nya ngagai semua bala pangan Petara ba tiap tiap menua alai sida diau. Ka tuju tu, beberapa rintai aum deka diatur di serata dunya ba beberapa bulan nangkan nya, nyadika katalis pengawa beberapa taun ti nangkanka Pelen Satu Taun ti deka datai.
Ari nya, renggat baru dalam pengerembai Pelen Petara Tuai nyau semak. Tang prospek ti ngelantang sereta lebih semak bediri ba mua. Pengerami dua ratus taun Pengada Báb diatu semina tinggal setaun setengah agi.
Tu meh maya ngingatka pemerani ti ngelui sadang ditunjukka GenselanPengerandang jalai Pengarap kitai, alai ministri Iya ti dramatik ngasulka bansa mensia masuk ngagai rambau baru ba cherita lama. Taja diserara dua ratus taun enggau maya kitai diatu, raban mensia maya Báb ayan sebaka enggau gaya dunya kediatu alai asai ditekan enggau pengingin deka ngemuaska pengaus semengat deka tetemuka saut nyau tendur. Dalam ngerunding baka ni pengerami dua ratus taun tu ngakun diintu, kami ngelala ianya pengerami tu ngembuan gaya ti special ba diri empu. Taja pia, kami nyadang aktiviti ti galak ke enda kurang kaya sereta enda kurang nyerangkung baka ti nyempulang pengerami dua ratus taun ti baru udah ngelebus. Tu meh pengerami alai tiap tiap komuniti, tiap tiap ruang bilik, tiap tiap ati enda kakang deka nyambut ia enggau penuh sadang.
Beberapa bulan ti deka datai mega maya alai kitai mulaika pengingat ngagai pengidup bala penitih Báb ti chukup kempang—bala dara enggau bujang berani ke ngembuan pengarap ati ke ditunjuk ba pengawa ti nadai ulih banding, berantu kediri ti deka ngias selama ia jerita lama Pengawa Petara. Kualiti sida ti ngembuan pemerani, angkun nyembah Petara, lalu ngingkas kediri ari semua utai kelimpah ari Petara ngentapka ati tiap iku orang bukai ti ngelala pengawa dikereja sida. Chukup nyengala, mega, maya umur sida agi biak ngembuan ati ti amat berani udah ngukir tanda sida ti enda ulih dipadam ba cherita lama. Dalam renggat ti deka datai, arapka teladan sida meri peransang ngagai serata raban ti arap—enda kurang ngagai bala nembiak, sekali agi dikangau ngeluan pejalai ti ngembuan tuju ke enda kurang ari ngubah dunya.
Tu, meh, pengandal ba kami ti tampak, ti tampak. Dalam enam pusin ti nyelepak antara Ridván tu enggau pengerami dua ratus ti deka datai—kebendar, sepemanjai tiga taun ti agi bisi ba Pelen kediatu—uji beri pengerindu ti ngulam semua, ti ngelui semua ke ngasulka bala penitih Báb nganchauka penampak kudus meransang kita ngereja pengawa ti chukup besai. Ngarapka kita nyadi penerima bantu serega nya ti dipinta sampi kami ba Pemetung Suchi.
- The Universal House of Justice