The Universal House of Justice
Ridván 2017
To the Bahá’ís of the World
Dearly loved Friends,
Peda bakani raban Nama ti Pemadu Tebangkar angkat! Enggau semina setaun aja udah ngelebus ke alai Pelen ti baru udah dipun, riput ti diterima nunjukka kelai pemesai kereja ti udah digaga lalu udah berengkah bulih pemujur. Neritka agi 5,000 iti program pemansang begunaka tikas pengiruh ti empai kala udah diasai. Ngembuan pemereti ti tegap ba batang Pelen, mayuh bala pangan ngereja nitihka utai ti diguna ia, nunjukka pengeran sereta berantu dalam kualiti respon sida. Baka ti disadang, sekeda program pemansang dedat ti lama udah meruan diatu nyadi lubuk penemu enggau sumber, meri sukung ngagai sitak menua ti besemak lalu ngemudahka penyampat pengerembai peneleba enggau seling penemu. Pusat ke aktiviti dedat—ianya genturung pendiau enggau tumpuk menua ke alai kereja nirika raban nyau chukup terit— udah nyadi tempat ti galak endur mayuh bansa ubah bisi nyadi. Raban kaban Bala Penyanding ti udah betambah sereta dikeringka enggau pemantu sida udah ngansakka pengiruh bala orang ti arap, nulung sida tulihka visyen bakani nganjakka proses pemansang dalam mayuh bengkah gaya lalu ngiga jalai ti engkeman dikena napi penyadi ba siti-siti klaster. Disukung Raban Gelumu Sambiang Bansa sida, Regional Baha'i Council belajar bakani pejalai Pelen ulih sama-sama didirika ba klaster bukai, lalu ba sekeda menua bukai ti mit ti nadai Regional Baha'i Council, entiti ti baru ba tikas nasional berengkah ngereja pekara ti sama. Taja, baka ti disadang ba proses pemansang organik, pemansang deras ti nyadi ba sekeda tempat empai ayan ba tempat ti bukai, penyampau program pemansang dedat di dunya udah mansang mayuh. Nambahka nya, kami gaga ati meda pemayuh orang ti enggau dalam aktiviti Pelen udah nyata bendar betambah dalam empat pusin ti keterubah.
Ari nya, bisi bendar tanda pengandal ke pemujur deka nyadi ba taun ti deka datai. Nya alai nama utai ti lebih ngakun agi diberi ngagai Pemajik Beberekat ba pengerami kedua ratus taun Pengada Iya kelimpah ari orang ti dikerindu Iya bebendar ngenataika enggau naka penyauh Pengarap Iya? Keterubah ari dua iti Pengerami dua ratus taun tu diintu dunya Baha'i ianya pengerami ti ngembuan tinjau ti chukup manah. Diperening enggau betul, taun tu mih meri siti peluang nyerangkap dunya ti pemadu besai endur nyambung ati ngagai Baha'u'llah. Dalam beberapa bulan ti deka datai, uji semua bela ngerunding tentang pemerega peluang tu lalu ngelala semua pengulih ti bisi ayan ba tiap endur alai nelebaka orang bukai pasal pengidup Iya enggau pemesai reti misyen Iya. Laban peluang ngajar ianya ti kediatu udah ba mua dunya Baha'i patut dirampas enggau pengambis ia, runding ti kreatif patut diguna ba randau ti tau nyadi enggau mayuh macham bansa mensia. Lebuh maya randau ti bebatang baka nya, pengelansik deka betambah lalu ati deka tebuka—kadang-kadang tekala nya. Dalam pengawa ti besai reti tu semua bisi ungkup, lalu pengaga ti datai ari ngereja pengawa tu nadai siku patut ngemeluka kediri-empu. Kami minta ari Iya siku ti Dikerindu meri sepemanjai taun ti kedua ratus tu tau diisi enggau pengaga tu ti pemadu tulin sereta pemadu manis: nyerita ngagai semengat bukai pasal penatai Hari Petara.
Pengawa ti mesti enda tau enda ditapi raban ti angkun majak diperumbanka laban penyarut, enda pechaya, enggau kerurau ti nyadi ba dunya. Kebendar, bala pangan patut nguna tiap-tiap peluang dikena mancharka penampak ti ulih nerangka jalai sereta meri pengentap ati ngagai ati sida ti kesit-kesit, meri pengandal ngagai sida ti nadai pengarap ati agi. Kitai dikingatka enggau lalau ti diberi Pengibun ngagai siti raban Bahá'i dalam jaku munyi ti dituju ngagai rambau kitai diatu: "Lebuh maya anyam masyarakat kemaya haritu ensepung sereta merekah ketegal penerit enggau pemerat jeretan pekara ti nyadi enggau rabat besai, lebuh rekah, ngemesaika agi serekang ti nyerara menua siti enggau menua siti, kelas siti enggau kelas siti, bansa siti enggau bansa siti, pengarap siti enggau pengarap siti, makin nambah, bala ti bejalaika Pelen mesti ngayanka tanggam ti lebih rapit dalam pengidup pemansang semengat sida enggau dalam aktiviti atur pengawa, sereta nunjukka tikas ti lebih rapat agi dalam gempung pengawa, besaup betulung, sereta sejalai ngemansangka enterprise kolektif sida." Selalu ngemanaka pemesai reti pemansang semengat ba pengawa Pengarap lalu pengeran ti tinggi ti dikembuan orang ti arap lebuh sida bejalaika ungkup pengawa suchi sida, Shoghi Effendi mega nangkan anang sekali-kali ngambi ungkup ba penyerekang, penyarut, enggau laya politik. "Uji sida angkat ngelui ari atas semua macham bepitak enggau bepiak," ba maya siti iya nyebut, "ngelui ari atas laya ti nadai tuju, bekiraka utai ti mit-mit, pengagit sementara ti benung ngeruga mua, lalu narit perati ke, dunya ti berubah." Tu mih pupu enggau sembur ari umbak ti ngalun betangkan tangkan ngejarka raban ti charut sereta bepechah-belah. Kelalu besai mih entaruh endur kiruh limpang ketegal utai baka nya. Baka ke udah ditemu tiap iku penitih Baha'u'llah enggau bendar, pengujung pemanah pengidup bansa mensia sigi bepanggai ba ngelaungka ari bida lalu penyerakup ia ditumbuhka enggau teguh. Tetiap pemeri ari Baha'i ngagai pengidup masyarakat endang ngembuan tuju ti nanggam penyerakup; genap iti pengawa nirika raban ngembuan tuju ti sama. Ngagai sida ti udah ikak belaya, raban ti mansang di baruh kelemayang Nama ti Pemadu Tebangkar ulih meri teladan ti ngasi mandangka utai ti ulih dijapai ketegal penyerakup.
Kami meri puji ngagai Tuhan ke Tuhan ti meda amat mayuh bala ti dikerindu Iya, dalam mayuh bengkah jalai, meri semua ti dikembuan sida ngambika tambai penyerakup bansa mensia tau didegika tinggi. Bala pangan ti pemadu dikesayau: Lebuh taun ti sarat enggau pemujur diatu udah belabuh, enda ke genap iku kitai ngerunding ni bagi pengawa kudus ti dibantu penelap Iya ulih dikereja kitai?
- The Universal House of Justice