The Universal House of Justice
Ridván 2015
To the Bahá’ís of the World
Dearly loved Friends,
Perenching musim Ridvan diatu udah datai, lalu ari atas peninggi ti udah diulih komuniti Nama ti Tebangkar, penampak peluang ti baru udah ayan ba bingkai langit. Naka pemesai mih rampa menua udah ditujah: program pemansang ti baru bisi udah ayan, lalu lebuh maya beratus-ratus da agi ti enda tau enda diulih dalam kandang duabelas bulan ti deka datai, dia pengawa ti dikena ngepunka langkar pengawa ti beguna udah berengkah ba nyau deka ke semua 5 000 klaster ti udah dirintai ba Pelen Lima Taun. Program pemansang ti bisi kediatu nyau majak nambahka pengering ia, ketebal agi sida nya udah terang bendar mandangka nama kebuah Pengarap Petara tu patut dikerembaika jauh agi ngagai pengawa rama dalam siti-siti klaster sereta enggau dalam genturung pendiau tauka ba tumpuk menua. Menasan ti nuju ngagai pengenan pengawa ngerembai enggau ngenegap ti naka iya pemesai udah dititih ngena singkang kaki ti tegap, lalu bala nembiak ti kempang ati selalu agi nentuka pejalai. Chara ti dikena kuasa-penempa raban ba Pengarap ti udah ulih dikena ba mayuh endur nyau majak nyengala, lalu gaya langkar pengawa ti enda tau enda nyadi dikena nanda pengerembai proses pemansang tu jauh ke agi dalam pemansang siti klaster diatu nyau makin nyengenda dipeda.
Tesau ti minta pengawa tu dikereja sereta disukung endang dituju terus ngagai tiap iku penitih Bahá’u’lláh, lalu ia deka ngeruga tiap ati sida ti sinu meda pemerinsa ti balat ba dunya, gaya pendiau ti ngenyinuka ati ti endur mayuh mensia enda ulih ngasaika penyenang. Laban, pengujung ia, semina pengawa ti berurun, pengeliat ati, enggau penunggang ati ti dikereja nitihka langkar Pelen ti patut nya nyadika saut ti pemadu semitan ke tiap iku bala ti arap dikena napi penyakit ti majak ba raban ti charut. Ba taun siti tu tadi, udah tampak bendar ditemu ia nya, ba siti-siti menua chara ti enda sebaka, penemu rama ti manah dulu kelia ke suah dikena nyerakup sereta ngempung mensia mayuh diatu udah majak luya sereta enda ulih dikena agi. Ia enda ulih agi nyadi ke terabai ti dikarap ulih ngelindung mensia ari bemacham penemu ti nguntungka diri empu, nadai penyabar, enggau ideologi ti udah bari ti beridup ari ati ti enda puas sereta ransi. Enggau penatai dunya ti beserekang tiap-tiap hari ti dipeda makin kurang pechaya ba diri-empu, orang ti nyukung penemu ti mai pengerusak tu majak berani sereta mangah. Kami teingatka jaku ti nyemetak ari Pen Ti Pemadu Bekuasa: “Sida berumban nuju Api Neraka, laban teperasa ngumbai nya penampak.” Bala ketuai perintah menua ti manah enggau bala mensia ti lurus nyau diteju kediri nyeruri pengerusak ti nyadi ba raban mensia mayuh tang nadai kuasa nagang pengerembai pengerusak nya. Empas ari semua utai tu ukai semina dipeda ayan ba laya ti enda betangguh tauka ba pengeruntuh atur. Ketegal ti enda ulih dipechaya udah ngasuh orang ti berimbai pendiau nyau belaya enggau pangan diri lalu mutuska kaul diri sebilik, ketegal dengki ti nyau kelalu udah masuk ba randau rama, ketegal chara ti enda nyata mejal mensia nerima pengawa ti enda beradat dikena ngulihka kuasa sereta nugungka pengaya – semua tu endang tanda ti nyengala ke alai kuasa moral ti dikena ngenanka raban mensia diatu nyau majak sabau.
Taja pia bisi bendar penetap laban nemu ia nya, beserak enggau pengeruntuh ti nyadi, sebansa daya pengidup beraban ti baru udah meruan tukuh ti mandangka semua gaya pengudus pendiau pengidup mensia. Kami udah berati bakani, kelebih agi ba endur pengawa ngajar terit dipejalai lalu pengawa nempa-komuniti udah ditanka, dia bala pangan ulih nyeliahka diri ari kuasa pengamu ke reta ti tau nabanka pengering sida gawa. Ukai semina nya aja, tang lebuh sida kiruh ngatur masa ngereja mayuh pekara bukai, sida enda kala nyeliah berumban ngereja pengawa kudus ti diungkup ke sida. Pengiruh ti bakatu ke guna Pengarap enggau ke penguntung mensia mayuh endang patut dikembuan ba tiap komuniti. Tempat ti endur program pemansang dipejalaika ba klaster ke nadai kala udah dibuka, kitai meda bakani penumbuh pengawa dia endang beduduk ari pengerindu ke Bahá’u’lláh ke bisi dikembuan dalam ati bala ti angkun. Enda pedulika tusun pengawa ti majak kompleks taja pen dudi ila tetap deka ditapi lebuh maya sais komuniti nyau majak besai, tang kediatu semua pengawa bepun ari selambar pengerindu tu. Nya endang ari tabu ubung ti beguna bendar dianyam nyadika sidan penyabar enggau pengeregas gawa, ari siti pusin ngagai siti pusin, ngemunka penemu pengudus ngagai bala anakmit, nembiak, enggau orang tuai; mantilka pengasai pengeran ati deka nyembah ari ke beserumpu sambiang enggau besampi; ngepunka randau ti ngerandang penemu; nambahka pemayuh orang ti baru mungkal belajar seumur idup pasal Jaku Petara lalu ngayanka penemu ti dipelajar nya ba pengawa; ngemansangka, beserebak enggau orang bukai, pengelandik gawa; enggau nyempulang pangan diri belatihka utai ti udah dipelajar. Pangan ti dikerindu, kita ti dikerindu Pemajik Abha: Kami besambiang bebendar ke kita tiap kali kami ngadap Pemetung Kudus Iya, awakka pengerindu kita ke Iya tau meri kita pengering nyerahka pengidup kita ke Pengarap Iya.
Peneleba ti mayuh diambi ari mayuh klaster, enggau ari pusat pengawa dedat dipejalai dalam klaster, ke endur penyeregas pengidup komuniti udah nyerakung mayuh mensia patut bendar dikenang ditu. Kami lantang bendar ati meda bakani daya idup bebantu-bantu, bepun ari kaul ti rapat enggau gawa ngemaruhka diri, udah numbuhka diri empu ba gaya ti bakanya, ngujungka mayuh semayuh semengat dibai enggau chara berurun masuk ke dalam pengawa komuniti. Endang amat bendar, ba mayuh bengkah endur ti makin nambah pejalai raban mensia nuju visyen Bahá’u’lláh ti deka nirika raban ti baru bisi dipeda ukai semina agi disadang aja deka ayan tang pengamat ti nyengala udah pegari.
Kami deka ngelalau nambahka sekeda jaku ngagai bala kita ke endur pemansang ti nyata apin nyadi tang lama udah keran deka berubah. Kembuanka pengandal ati. Ia enda deka baka nya belama. Kati enda ke cherita lama Pengarap kitai tu penuh laban cherita ti bepun ari pemerinsa tang asil ia naka pemujur? Berapa kali udah pengawa dikereja ulih seraban penitih ti mimit tubuh–biak tauka tuai – tauka semina sepintu bilik, tauka siku-iku ngati kediri, lebuh dibantu ulih kuasa ti kudus, udah mujur ngemansangka komuniti ti regas taja tempatnya endang agi siga? Anang saru penemu ngumbai tempat enggi kita enda sebaka enggau enggi orang bukai. Ubah pemansang ba siti-siti klaster, sekalika jampat tauka tusah diulih, nyadi ukai nengah chara gawa ti bisi bebatang atur lalu ukai mega ari pengawa nyeligau ngapa; ia mansang nitihka lanjan pengawa, beperagam, enggau bejurai, lalu diasur nengah pelen ti datai ari peneleba ti udah diulih. Lebih ari tu, lalu enggau sebarang empas ia ti tekala nya, gawa ke Iya ti Dikerindu retinya, ba nya aja, udah nyadi siti penatai pengaga ti meruan ngagai semengat. Peragam dalam ati, mega, sekeda chunto ari kaban belayan semengat kitai ba Dulang Pengarap, bakani pengelandik tinjau sida, pengeliat-ati sida nyadi siti komuniti, enggau penegap sida dalam ngerembaika Jaku Kudus udah mai ubah ngagai raban sida sekalika ba tikas runding tauka ba pengawa. Petara seruran enggau kita, enggau tiap iku bala kita. Dalam kandang duabelas bulan ti agi tinggal ba Pelen tu, awakka tiap komuniti mansang kering agi ari ia ti ke diatu.
Pengawa ngerembai enggau ngenegap ti pemadu beguna dikena nudukka pelasar ti tegap ke pengawa ba dunya Bahá’í diatu dipinta bejalaika mayuh pengawa bukai. Ba Pusat Dunya Bahá’í, pengawa ti deka betusunka sereta nanda undan beribu-ribu Papan Tulis, ti digelumu nyadika waris reta-pesaka ti pemadu beguna, Teks Kudus Pengarap kitai, diibun ngambika ulih pulai ke penguntung semua mensia – tu, ngambika mayuh Tulis tu ulih dichelak enggau jampat, serentak ba jaku asal enggau ti disalin ngagai jaku English. Bebendar deka nirika lapan buah Mashriqu‘l-Adhkars, Rumah Sembah ti suchi dikena muji pemulia Petara, sama bela lanchar dikereja. Pengawa External Affair ba tikas nasional udah majak semitan sereta berurun agi, lalu diperansang enggau dalam agi ulih siti dokumen ti dikeluar, nuju Raban Gelumu Sambiang Bansa enam bulan ke udah lalu, ti dikarang ari peneleba ti manah dipejalai lebih dua puluh taun tu tadi lalu ia mega nambahka langkar pengawa dikena ngemansangka pengawa ia jemah ila. Naka ke diatu, dua iti opis Komuniti Bahá’í Antarabangsa ti baru, ti nyau deka sebaka enggau Opis ia ba Gerempung
Bansa ti bepengkalan di New York enggau ba Geneva lalu pia mega opis ia di Brussels, udah dibuka ba Addis Ababa enggau Jakarta, nambahka pemesai agi peluang alai endur ngemansangka penemu Pengarap ba tikas antarabansa di Africa enggau di Tenggara Asia. Laban peminta ti majak dikena napi pemansang, mayuh Raban Gelumu Sambiang Bansa benung nyungkakka pengelandik diri ngatur pengawa, bisi bendar dipeda ba gaya sida ngintu guna sumber ti dikemisi sida, pengiruh sida deka meretika enggau dalam agi gaya ba komuniti sida, seruran betatika dikena nentuka operasyen Opis Bansa sida majak kering sekering; dikena berurunka semua penemu ti mayuh bendar udah digumpul dalam bidang tu udah ngujungka Opis Pemansang Sistem Atur Pengawa didirika ba Pusat Dunya din. Pengemun mungkal mayuh macham pengawa rama majak betambah ba mayuh menua, ngujungka mayuh pekara ti deka dipelajar pasal bakani gaya penemu ti bisi dalam Ajar Pengarap ulih dikena nambahka pemanah pekara rama enggau ekonomi; naka meh pemesai peluang ba pekara tu ke alai kami udah nudukka Raban Penasihat Antarabansa ti betubuh tujuh iku ba Opis Pemansang Rama enggau Ekonomi, muka tikas pemansang ti baru dalam pengerembai pengawa Opis nya. Tiga iku kaban Raban nya gawa nyadika kaban penyelaras lalu diau ba Tanah Kudus.
Ba Ridvan tu, ia nya, kami meda mayuh pengawa ti agi patut dikereja, kami mega meda mayuh orang besedia deka gawa. Ba beribu-ribu klaster, genturung-genturung pendiau, enggau tumpuk pendiau, panchur pengandal enggau penetap ti baru majak manjah, meransang semengat sida ti ulih nyepi ai pengidup. Ba sekeda tempat, penganyut ai baka anak sungai, ba endur bukai, udah nyadi batang sungai. Diatu ukai maya endur sebarang semengat bediri tegir-tegir ba tebing sungai – uji semua sama bela terejun ngagai segang pemansang nya.
- The Universal House of Justice