The Universal House of Justice
Ridván 2016
To the Bahá’ís of the World
Dearly loved Friends,
Enggau penatai Raja Pengerami, maya endur nyendiaka Pelen selampur dunya ti deka datai udah ambis: kami diatu nesau bala pangan Petara berengkah baru dalam kandang lima taun enggau naka ia pemendar meri pemerani, pengeran ati, sereta pemisi kita.
Raban ti angkunka Bahá’u’lláh udah tegap nyendiaka diri. Gelumu institusyen ti udah diatur di serata dunya dalam beberapa bulan ti udah lalu bisi bendar nunjukka tangkan tanda pengeran deka berengkah ngereja enterprise ti besai tu. Pekara ti enda tau enda dikereja ti dipadahka dalam pesan nuju Aum Bala Pengelalau udah diambi nyadika pelen kereja ti nyemetak. Bepuluh taun udah bebendar ngereja pengawa ti berani udah nempa komuniti lalu udah ngasuh ia bulih sekeda pengulih ti nyengala dikena nirika pemansang, ngenegap sereta ngeringka ia ba maya diatu. Dua dekad ti lalu, kelebih agi, udah nyata bendar deras dalam pengangkat ti dikingin ba pengelandik tu.
Kandang maya tu, begunaka langkar ngereja pengawa ti seruran mansang udah ngasuh bala pangan nginang sereta ngaluska pengulih ti beguna enggau regas agi, lalu ngepunka pengawa ti mudah dikereja dulu, ngasilka langkar pengawa ti lebih silik, lalu tu begunaka pemansang pengulih ti makin kompleks. Ngena chara tu, proses ti berurun ke pemansang sumber mensia enggau nempa komuniti udah berengkah ba beribu-ribu iti klaster--lalu, ba mayuh klaster nya, udah jauh amat mansang. Fokus ukai semina ba orang ti arap siku-siku, tauka komuniti, tauka institusyen Pengarap; semua ketiga-tiga nya ti enda ulih diserara dalam ubah pemansang Atur Dunya baru endang diperansang ulih daya pengudus ti pansut nengah pengerembai Pelen Petara. Tanda pemansang sida nyau makin berupai bendar: laban ti amat bisi bendar pengarap ati ke mayuh bendar bala ti arap udah ulih bekunsika cherita pengidup Bahá’u’lláh sereta berandauka empas Revelasyen Iya enggau Sempekat ti nadai banding; ba raban semengat ti majak betambah, ketegal ti, udah tetarit ngagai Pengawa Iya lalu nyurungka pemeri dalam ngulihka penyerakup ba visyen Iya; ba pengulih bala Bahá’í enggau bala pangan sida, ba dini-dini endur sida dalam komuniti, ulih nerangka enggau naka pemanah tentang peneleba sida ba proses ti tau ngubah penteba sereta nukuh pengidup rama; ba makin mayuh orang bansa asal di menua nya, nyadi kaban ba institusyen Bahá’í enggau agensi ia, lalu diatu ngiring atur pengawa ba raban sida; tau dikarap, mentas, sereta betunggang-lupung meri ngagai Pan, ti chukup beguna dikena ngeringka pemansang Pengarap; ba pengayan penumbuh ti enda kala dipeda ba inisiatif siku-siku sereta pengawa bebala mayuh nyukung pengawa nempakomuniti; ba pengeransing bala semengat ti nadai ngira diri ba nembiak ti benung umur udah mai pengeregas ti chukup kuat ngagai kereja tu, kelebih agi dalam meri pelajar pemansang semengat ngagai rambau ti biak agi; dalam ngemansangka gaya pengudus komuniti ari ti bejarit beserumpu sambiang; dalam ngangkatka pengulih ba semua tikas pengatur pengawa Bahá’í; dalam nyendiaka institusyen, agensi, enggau siku-siku berunding pasal proses ia, beratika realiti sida ti dia lalu ngira sumber ti bisi ba tempat endur sida diau, lalu ngaga pelen ti bepelasar ba nya; ke alai diatu nyau teleba pasal dinamik belajar, bejurai, aksyen enggau refleksyen, sereta ti udah ngeradu penumbuh gaya belajar ti betul ; dalam nambahka pengerindu pemereti orang ti deka meri asil ngagai pengawa Ngajar ti semitan nengah kaul pengawa rama; dalam nambahka peluang ti digiga sereta diguna dalam meri perspektif Bahá’í dalam randau ti nyadi ba raban; dalam pengeleda ke raban serata dunya ianya, dalam semua pemendar pengawa ia, deka ngenyampatka penatai pengayan tamadun suchi ari ti mansutka kuasa penempa-komuniti ti dikembuan Pengarap; ke bendar, pengeleda bala pangan ti makin betambah tentang pemendar sida ngubah pendiau diri, ngemesaika agi sengkilung penyerakup, bekereja-sama enggau orang bukai ngereja pengawa, nulung mensia mayuh dalam nentuka pemansang semengat diri, rama, enggau pemansang ekonomi--lalu, nengah semua pengiruh nya, deka mai pengelantang ngagai dunya—ti mandangka batang tuju pengarap tu empu.
Nadai siti aja chara ulih nerang enggau penuh pemansang komuniti Bahá’í, tang mayuh ulih diperati nengah penyampau klaster di selampur dunya ke alai program pemansang udah didudukka, alai, enggau pengaga bantu pengasih diturunka Pemajik Abha, kami netapka udah ngelui ari 5,000. Naka pemesai mih pelasar laban tu mih ti nyadika pekara ti dulu diguna dikena napi pengawa ti nempuh dunya Bahá’í—ngeringka proses pemansang ba tetiap klaster ti endur ia udah berengkah sereta ngerembaika besai agi pengaya gaya tukuh pengidup komuniti. Pengering mekuh ti diguna sigi amat berat. Tang asil ia bisi ngembuan pengulih ti chukup nyengala, ulih ngepunka rambau. Singkang ti mit, enti ia bejarit sereta deras, deka nambahka penyauh pejalai. Ari ti majakka pemansang ti mesti dipenyadika ba klaster ba renggat ti keterubah—ambi ke banding, dalam enam kali pusin ti diatur sebedau pengerami ti keterubah ba pengerami dua ratus taun sekali tu, —bala pangan tentu deka ngereja mayuh pengawa ti ngujungka juluk ati sida nyau deka ulih jengkau dalam kandang lima taun. Ba tiap pusin sigi ngembuan peluang ti laju mansa ti dikena mansang ke mua, pengulih ti berega ti nadai nikal agi.
Ba raban mensia diluar dia, akai rai, tanda-tanda pemerinsa semengat ti makin pedis nyau majak betambah sereta balat. Nyengala bendar mih bida ianya, lebuh mensia di dunya ngasaika penusah ngiga tipang ti betul sereta engkuda nguing ari siti pengasa ngagai siti pengasa, kita begempung ngaluska kereban ti dikena nyantilka ati enggau Leka-jaku Petara ti meruan selama ia. Nyengala bendar mih bida ianya, ba tengah-tengah rauh penemu ti enggai alah sereta peneka ti beserekang ti makin balat nyadi dini-dini endur, kita befokus mai mensia begempung deka nirika komuniti ti nyadi pengenduh ke penyerakup. Anang ke ngasuh ati kita leju, awakka runding sangka enggau pemangah ba dunya nyadika tangkan ti nunjukka semengat ti ngelingi kita begunaka ubat pengerai enggau naka penyampat ti semina kita aja ulih meri sida.
Tu meh pengambis rintai Pelen Lima Taun ti betangkan-tangkan. Ba penutup ia, renggat ti baru dalam evolusyen Pelen Petara deka tebuka, sedia dikena ngenyung komuniti Bahá’u’lláh nuju abad ti ketiga dalam Bahá’í Era. Arapka bala pangan Petara ba tiap-tiap menua beterimakasih ke semaya ti dikembuan beberapa taun ti dulu, ti regas agi nyendiaka diri napi pengawa ti lebih berat ti deka datai. Pelen ti kediatu ti ngembuan rampa pengawa ti besai meri peluang ngagai tiap iku nyukung pengawa tu, enda ngira pengemit ungkup iya. Kami minta kita, bala kaban sekereja ti dikesayau, ti rinduka Iya Siku ti Pemadu Dikerinduka dunya, anang ngalau diri begunaka semua utai ti udah dipelajar kita lalu ngena semua pengulih enggau pengelandik ti udah diberi Petara ti dikemisi kita nyungkakka pemansang Pelen Petara ngagai tikas ti enda tau enda nangkanka tu. Ngagai pengeran sampi kita minta bantu kudus kami nambahka enggau enggi kami, disampi ba Sungkup Kudus, ngarika semua ti gawaka Pengawa ti nyerangkap semua.
- The Universal House of Justice