The Universal House of Justice
Ridván 2012
To the Bahá’ís of the World
Dearly loved Friends,
Maya tengan ngalihari ba hari ti kesebelas maya gawai Ridván seratus taun ke dulu suba, ‘Abdu’l-Bahá, bediri ba mua beberapa ratus iku orang, enggau naka penguat Iya ngangkatka kapak lalu mechah tanah ti nyadika tapak Rumah Sembah ba Grosse Pointe, utara Chicago. Orang ti dikangau maya ti nasih tanah enggau Iya ba musim bungai nya datai ari mayuh pupu raban bansa—orang Norway, orang India, orang Peranchis, orang Jepun, orang Persia, orang bansa asal Amerika, tnya sekeda ti ulih dirintai. Nya indah enda baka Rumah Sembah, ti empai digaga nya, mantupka pengingin Tuai, ti disebut Iya ba lemai empai pengerami nya, ke tiap iti edifis baka nya: “ngambika bansa mensia bisi tempat endur begempuru” lalu “nerantangka penyerakup mensia pansut ari gelanggang pengudus ia ti tebuka”.
Orang ti mendingka Iya ba pengerami nya, lalu semua ti ningaka Iya dalam sepemanjai pejalai Iya ke Egypt enggau ke Barat, mesti semina ulih apas-apas meretika empas reti leka-jaku Iya ngagai raban mensia, ke pemesai guna empa reti ia. Dataika saritu, bisi ke enda orang ngambu diri ningaka jaku tesau tu, jauh sereta rapas, gaya pendiau raban mensia ke jemah ila ke alai Revelasyen Bahá’u’lláh ditaga ngangkatka ia? Laban nadai siku ulih nyangka baka ni temadun ti dibai ajar Petara nganjakka bansa mensia semina ari ti ngubah mimit atur kemaya haritu. Jauh pawi ari nya. Ba siti jaku licha ti dikenatai Iya beberapa hari pengudah Iya nanam batu pemun ke Indu Rumah Sembah di Barat, ‘Abdu’l-Bahá nyebut ianya “ari sekeda asil pengayan kuasa pemansang semengat ianya dunya mensia deka ngubah diri nitihka atur rama ti baru,” alai “pengelurus atur Petara deka ayan ba semua pengawa mensia”. Jaku tu, enggau mayuh ti bukai ti dipansutka Tuai ti seruran nyadika lalau raban Bahá’í dalam kandang renggat seratus taun tu, nyungkakka pemereti ti nyerara raban mensia baka kediatu ari pemesai visyen Apai Iya ti nyadi pemeri Iya ngagai dunya.
Tang tusah mih, laban nadai ngira pemalat pengiruh, bala orang siku-siku ti ngembuan tuju ti manah, ba tiap-tiap menua, ti gawa deka ngemanahka gaya pendiau raban mensia, penangul ti nekul ngambika tulih visyen nya baka ti kelalu berat diputar ba sekeda orang. Pengandal ati sida tepuruk ba peragam ti enda betul bekaul enggau gaya pengidup mensia ti nyelikap ba tusun pendiau enggau gaya pengidup kemaya haritu ke alai ia diaku nyadi gaya pendiau ti betul. Peragam tu dipeda nadai meri peluang ngagai pengulih pemansang semengat ti mayuh ti apin dikena ti dikembuan semengat ti bepenampak ti bulih peransang ari nya; nyadika ganti, sida bepangai ba timbang pengurang mensia, teladan tiap hari ti ngeringka asai ati ti semina asa aja. Lapis penemu ti bepelasar ba pemula udah ngelindung batang penemu ti amat: Gaya pekara ti nyadi di dunya mandangka penemu ti enda betul bekaul enggau ruh mensia, ukai gaya ia ti bendar. Tuju tiap iku Pegari Petara ianya mai ubah ba pengidup dalam enggau gaya luar bansa mensia. Lalu ubah tu nyadi lebuh makin mayuh mensia, digempung ulih ajar Petara, begempung deka ngemansangka pengulih pemansang semengat ti mai ngagai proses ngubah raban mensia. Sebaka enggau tanah kusi ti ditutuk Tuai seratus taun lalu, teori ti dititih kemaya haritu, nyangka keterubah baka ti enda enda ulih dipasuk ubah, nadai jerih ia tetap deka lesap, lalu nengah “panjah tengkujuh bantu-penelap Petara”, bungai pemereti ti bendar” deka pansut galak sereta manah.
Kami meri terima kasih ngagai Petara, laban nengah pengering kuasa Lekajaku Iya, kita—raban Nama Pemadu Tebangkar—udah nanam ba endur ke alai pemereti ti bendar deka ngerembai. Sampai ke bala sida ti ngetat kediri dijel ketegal Pengarap, nengah penegap sereta pemerantu ti enda ulih kira, sida ngasuh “kayu penemu enggau pemintar” bebungai ba ati sida ti bisi pengasih. Di serata dunya, semengat ti ransing benung ngereja pengawa nirika dunya baru ari ti bejalaika atur ti berurun nitihka dipadah dalam Pelen Lima Taun. Gaya tukuh ia endang udah ditemu enggau nenak nya alai diasaika enda ibuh kami ngenang ia ditu. Sambiang kami, disebut ba Pemetung Pemeri ti SemuaPenyayau, minta bantu ari Raban Malikat ti Pemadu Tinggi dikenataika ba tiap iku kita ti ngambi ungkup dalam ngemansangka Pelen. Pengingin kami ti dalam, dikeringka ari ti meda penguat pengiruh kita dalam kandang taun ti lalu, ianya udah neritka agi singkang tetap kita lebuh bejalaika penemu ti dikembuan ari ti nengah peneleba kita. Diatu ukai maya endur belelak; kelalu mayuh orang ti agi empai nemu tentang pagi hari ti baru. Sapa enti ukai kita ulih ngenataika pesan Petara? “Nengah Petara,” Bahá’u’lláh, ngenang pasal Pengawa Petara, netapka, “tu meh kelang pengelansik enggau ngingkas diri, ngembuan visyen enggau pengaga, ke alai nadai orang bukai ulih nichik kuda perang kelimpah ari bala soldadu Iya ti Bepengasih, sida ti udah ngingkas diri ari semua tanggam dunya pengidup tu.”
Meratika dunya Bahá’í benung gawa nya baka ti tepedaka rampa ti chukup terang. Dalam pengidup siku-siku orang ti arap ti deka, ngelui ari utai bukai, mai orang bukai berandau enggau Penempa iya lalu gawaka bansa mensia ulih dipeda tanda ari ubah pemansang semengat ti diungkupka ngagai genap iku semengat ulih Tuhan ke Rambau Jeman. Dalam pengeras ati ngerja aktiviti ba dini-dini raban Bahá’í dikena nyungkakka pengulih kaban baika nya biak tauka tuai, pia mega bala pangan tauka bala ti sama gawa, ngereja pengawa ti pulaika pemanah semua tau diaku nyadika kelai raban tumbuh belalauka ajar kudus tau mansang. Lalu ba klaster ti udah nyulut ke alai aktiviti dikereja nitihka rangkar Pelen endang mayuh lalu beguna bendar nentuka rintai pengawa ti dikerja sejantil, rangkar atur pengawa ti seruran mansang meri senaya, taja pen mimit, baka ni institusyen Pengarap deka majak nambah mangku tanggungjawab ti makin mayuh dikena ngangkatka pengelantang enggau pemansang mensia. Nya alai, terang bendar, pemansang siku-siku, raban, enggau institusyen deka ngamatka danji ti besai. Tang ngelui ari nya, kami meda enggau ati ti gaga baka ni kaul ti nanggam sida tiga tu ditanda enggau pengerindu ti liut enggau sukung semua.
Jauh bebida, kaul antara tiga pelakun ba dunya luar—rayat, raban politik, sereta institusyen raban—mandangka penyerekang ti ngelai penusut pengidup bansa mensia ba tikas ti benung berubah. Enggai gawa begulai bepangai enggau pangan diri, sida disintak dalam berebutka kuasa ti nadai pulaika penguntung. Naka jauh meh bida raban mensia ti dikenang ‘Abdu’l-Bahá, dalam mayuh Papantulis enggau jaku licha, nunjuk—alai kaul tiap hari, pia mega kaul antara menua, ditempa belalauka nemu reti penyerakup bansa mensia. Kaul ti diperansang enggau pemereti tu benung ditanam bala Bahá’í serta bala pangan sida ba tumpuk menua enggau tempat serimbai pendiau di serata dunya; ari sida ulih disium penulin bau rengut penyerakup enggau bekerjasama, besetuju enggau pengerindu. Dalam rampa ti sedang-sedang, makin ayan gantika pengidup bansa mensia ti teleba enggau penyarut. Nya alai nyata bendar sebarang sapa ti deka mansutka penemu diri enggau betanggungjawab enggau dalam jurai penuh berunding ti pulaika pengelantang bala mayuh lalu muai pengingin ti deka ngeringka penemu diri; institusyen Bahá’í, ngelala guna kereja ti berurun ditumpu ngagai pengujung ti mansutka asil, ngembuan tuju ukai deka nagang (control) tang ngidup sereta meransang; raban ti nentuka pemansang diri ngelala pemerega aset beserakup lalu tunggang ati enggau ngereja pengawa ti udah dilanggur ulih institusyen. Nengah kuasa Revelasyen Bahá’u’lláh, kaul antara tiga bengkah tu disikap enggau pengerindu ti baru, pengidup ti baru; dichampur sekali, deka nyadika anyam alai temadun dunya pemansang semengat, ngembuan turai peransang Petara, beseranyat mansang.
Panchar Revelasyen sigi ditaga nerangka tiap begkah pengawa; ba tiap iti, kaul ti nanggam pengidup raban mensia ditempa baru; ba tiap iti,dunya deka ngiga teladan baka ni mensia patut begulai enggau pangan diri. Kami minta kita berunding, laban tebal agi ia ngasuh pengidup ti bari nyadi ba mayuh mensia, ba pengidup ekonomi mensia, alai pemingkuk dikemendar lalu penguntung ti kelalu mayuh diaku nyadi tanda pemujur. Udah betatam dalam meh perangai ti ngerusak tu udah nyadi alai tusah deka mikir baka ni siku-siku tauka ulih ngubah standard kediatu ti dikena dalam atur pengidup mensia. Taja baka nya, sekeda perangai patut dikelaung ulih orang Bahá’í, baka enda lurus dalam pengawa dagang tauka ngambi ulih ari pengidup orang bukai ba ekonomi. Bepegai teguh ba ajar Petara begunaka kitai nadai limpang ari utai ti dikarap kitai nyadi Bahá’í lebuh kitai bejalaika pengawa ngulihka penatai pemisi diri. Ari ti nguna batang ajar Pengarap dalam pengidup diri bekaul enggau pengelurus enggau nadai pemingkuk, siku semengat ulih ngetanka standard ti jauh tinggi ari ia ti diguna dunya nyukat diri. Mensia nyau lelak ngiga chunto pengidup ti dikinginka; kami ngarapka kita nirika raban ke alai jalai ia meri pengandal ngagai dunya.
Dalam pesan Ridván 2001, kami bisi madahka dini endur menua alai proses masuk beraban mayuh belinsur nyulut lalu gaya ba raban bansa dia ngakun, kami deka ngemendar nudukka Rumah Sembah ba tikas bansa, alai penumbuh ia deka nyadika rangkar ba Renggat Kelima dalam Rambau Formative Pengarap. Enggau chukup pengaga diatu kami ngerah ianya Mashriqu’l-Adhkár tikas bansa deka didiri ba dua menua: the Democratic Republic of the Congo enggau Papua New Guinea. Ba menua tu, semua kriteria ti diguna sigi udah bisi, lalu gaya penerima mensia dia bekaul enggau peluang ti ditempa ulih rintai Pelen kediatu chukup manah. Pengawa nirika Rumah Sembah kontinental ti pengabis ia di Santiago benung bejalai, ngemunka projek deka ngaga Rumah Sembah tikas bansa ngayanka siti agi tanda ti ngelantangka ati nunjukka Pengarap Petara masuk ke dalam tanah pengidup mensia mayuh.
Siti agi singkang ulih nyadi. Mashriqu’l-Adhkár, baka diterangka ‘Abdu’lBahá nyadika “siti institusyen ti pemadu beguna ngagai dunya”, ngempung dua pengawa, ti enda ulih diserara dalam pengidup Bahá’í: nyembah Petara enggau gawa. Gempung dua pengawa tu dipeda ba jantil ti nyadi dalam rangkar nirika raban ti dikembuan Pelen, lebih agi pengayan pengeran ati ti ditunjuk ba serumpu sambiang enggau proses belajar ti nukuh pengulih siku-siku gawaka bansa mensia. Kait antara nyembah Petara enggau gawa sama bekampi nyata dipeda bisi nyadi ba sekeda klaster di serata dunya alai raban Bahá’í dia berupai betambah mayuh tubuh sereta ba pengeregas, alai ngereja pengawa rama nyau nyata. Sekeda ari genturung pendiau tu udah ditaga nyadika palan endur belajar dikena ngangkatka pengelandik bala pangan dalam ngemansangka program nembiak lanjau di bengkah menua nya. Pengulih ngetanka program tu, baka ti dipadah dulu ari tu, deka ngeringka pemansang study circle enggau kelas anakmit. Nya alai, kelimpah ari batang tuju asal ia, palan endur belajar tu deka ngeringka pengawa ngerembai enggau ngenegap. Lalu dalam klaster ti baka tu, dalam taun-taun ti deka datai, pengayan Mashriqu’l-Adhkár tau diperati. Ati kami chukup beterima kasih ngagai Pemajik Jeman, kami gaga ati madah ngagai kita ianya kami benung bejurai enggau sekeda Raban Gelumu Sambiang
Bansa pasal nirika Rumah Sembah tikas menua ti keterubah ba tiap iti klaster tu:
Battambang, Cambodia; Bihar Sharif, India; Matunda Soy, Kenya; Norte del Cauca, Colombia; enggau Tanna, Vanuatu.
Dikena nyukung pengawa ngaga dua iti Mashriqu’l-Adhkár tikas bansa enggau lima tikas menua, kami udah ngaga pemutus penemu numbuhka Pan Rumah Sembah ba Pusat Dunya Bahá’í ke guna semua projek nya. Bala pangan ba dini-dini endur dipinta berantu meri ngagai tabung tu, naka ni pemisi diri.
Bala pangan ti sama gawa ti dikerindu: Pengawa nasih tanah ulih jari ‘Abdu’l-Bahá empu seratus taun ti udah lalu diatu dikereja baru ba tujuh buah menua, tu semina pengerandangka hari alai ba tiap nengeri enggau tumpuk, ketegal ngasika pinta Bahá’u’lláh, rumah deka didirika endur nyembah Tuhan. Ari Tempat Pemansut Ngingatka Petara tu deka dipanchar penampak Iya lalu nyadaka nyawa muji Iya.
- The Universal House of Justice