The Universal House of Justice
Ridván 2003
To the Bahá’ís of the World
Dearly loved Friends,
Lebuh Lumpar Pengawa Lima Taun masuk taun ketiga, segang ia nyau majak kuat; rekod pemujur ti udah ulih ba taun ti baru abis udah jauh ngalah ka pemujur kandang duabelas bulan ti dulu ari ia. Teruju peneras segang tu endang ari ketegal tanggam ti betambah ti ulih ari batang pekara ti nyadika isi dalam Lumpar Pengawa enti dibanding enggau ketegal ari regu pengachau ti ngalun dunya.
Gaya utai ti nyadi ba pun taun atur pengawa ti baru tu chukup berat, bisi endar ditapi, sereta nyelai ari ke udah dalam pemesai reti ia. Sepemanjai taun ti dulu diregau penyarut ti betangkan-tangkan lalu ngujungka perang nyadi di Timur Tengah. Empa reti utai ti nyadi tu endang enda kurang pemesai reti ke pemansang raban Nama ti Pemadu Tinggi enti dibanding enggau ubah pemansang raban mensia ti nuju ngagai globalisasi ba pengawa ti napi pemedis penyarut lebuh maya dunya benung deka berubah. Beguna mega, tatak maya jam, tikas pemesai enggau kuing gaya penyadi maya benung deka berubah tu enda ulih disadang. Chukup jampat meh arus pasang berubah ba gaya utai ti nyadi ba dunya! Dalam laya ti nyadi, ti terang bendar nyerangkung menua alai pun cherita lama Pengarap tu nyadi, kitai mulaika pengingat jaku tangkan Baha’u’llah ti nyebut “pengerata dunya udah tebererak laban kuasa ti begegar ketegal penyadi Atur Dunya baru tu, ti pemadu besai”. Penyarut ti nyadi ba kandang menua ti kaya enggau cherita lama Baha’i baka di Iraq patut bendar diperati.
Pengerusak ti nyadi bepun ari penyarut tu enggau pekara bukai ti nyadi di dunya, ari sepiak, ia udah ngelanggurka pemuka rebak ti baru dalam cherita (sejarah) raban Baha’i ti chukup beguna tang balat bendar diperinsa ba menua ke bisi alai Seruan Petara ka Hari tu diau pengelama sepuluh taun. Lalu ari sepiak, ia udah muntan kereja nyendiaka Konvensen Antarabansa ti ke Sembilan kali ba Pusat Dunya Pengarap kitai. Taja, ia ngasaka ati, ia enda patut ngasuh kitai serabana. Lebuh Lumpar Besai ari Petara ngeruga Lumpar Iya ti Mit, endang nadai kakang ke jemah ila endang tentu udah ditetapka deka tebuka ari berekat Petara peluang ti besai dikena ngemansangka Pengarap Iya ti chukup bemulia.
Penusah, penakut enggau pengusut penemu ti nyadi ketegal penyarut ti baru udah nyadi dalam ngerembaika Pemaik ti Mit udah nambahka penusah asai ati sereta pengeringat laban penyarut ti be-ulang ti ngeruga dunya. Pengerawan ati mensia di serata dunya diatu ditunjuk nengah pengawa ti begelumu bebala mayuh mandangka diri ringat enda patut enda dikibuh. Batang pekara ti dikenggaika sida sereta pengeringat ati ti dipuput ari pengawa nya, selalu agi nambahka penyarut enggau pengachau lalu ngelipak ari ti dikarapka sida ulih mutarka penanggul. Ngagai bala pangan Petara, pekara ti nyadi chukup mudah diterang; sida semina ngingatka wawasan sereta batang ajar ti bisi ba Pengarap enti sida deka mujur nangkup tapi pengawa ti ngerembai bepun ari pemerinsa enggau serabana. Awakka sida nguji mereti enggau dalam Ajar Pengarap ti bekaul enggau pekara nya ari ti nyidi baru surat-surat Shoghi Effendi ti dichelak dalam bup The World Order of Baha’u’llah (Atur Dunya Baha’u’llah), lebih agi isi bup ti dikumbai “The Goal of a New World Order” (Juluk Ati Atur Dunya Baru), “America and the Most Great Peace”, (Amerika enggau Pemaik ti Pemadu Besai), sereta “The Unfoldment of World Civilization” (Pengerembai Tamadun Dunya)
Lebuh maya dunya tu agi majak bisi penyarut, Lumpar Pengawa Lima Taun udah manggai ba pengelandik ia bejalaika pengawa ke alai raban kitai ulih nyingkang besai nuju ngagai batang juluk ati ngemansangka proses masuk beraban mayuh. Penerang ti silik ti chukup meransangka ati ke Pengarap ba kelima-lima benua (continents) udah diterangka dalam surat kami kena 17hb. Satu; ti patut dipelajar kita dalam agi. Semina beberapa iti aja pekara ti chukup beguna patut dikelansa ditu: Magi menua (countries) ngagai pitak kandang menua (cluster) diatu udah tembu ba 179 iti menua; lalu diatu bisi 17,000 iti chemai ti deka ngerembai. Aum beperagam (reflection meeting) ba tikas pitak kandang menua nyadika chara ti chukup bekuasa dikena ngempung runding sereta kereja bala pugu-pengatur-pengawa enggau ba tumpuk; aum baka nya meri peransang ti ngasi dikena bala pugu-pengatur-pengawa enggau siku-siku ngepunka kereja ngena kaul ati ti besukungka pangan diri. Proses institiut udah mandangka pemujur ke lebih agi ari ti dulu bejalaika pengawa ia ti nyadika pusat kuasa dikena ngemansangka pengawa ngerembai enggau ngenegap. Tiga iti pugu pengawa ba Lumpar Pengawa udah manggai ba tikas ti jauh mayuh agi ari taun dulu. Asil ari nya, makin mayuh bala pangan diatu nyau regas ngereja pengawa ngajar sereta regas ba pengatur pengawa di serata dunya, nunjukka semangat pengandal ati ti berampit ti meransang kereja sida. Bala nembiak enggau anakmit diatu nyau lebih berurun agi masuk dalam program pemansang raban, lalu orang ti apin Baha’i nyau makin mayuh enggau belajar begulai (study circle), sambiang begulai sereta kelas anakmit. Chukup ngelantangka ati meda, ba maya ti singkat kenyau ari pun Lumpar Pengawa dipejalai, ke alai ba sekeda tumpuk ti jarang bendar ngereja tiga iti pugu aktiviti nya diatu nyau bejarit ngereja aktiviti nya sereta betambah mayuh agi. Tu meh sekeda gambar mimit ba raban dunya ti numpu ngagai kereja sereta nginsit lebih ari ti dulu.
Kandang taun ti udah lalu, lebuh rangkar pemansang tu semakin teguh dikena bejalaika Lumpar Pengawa, pemansang bukai ti beguna mega bisi nyadi. Dalam kereja kaul enggau orang luar, agensi ke Raban Baha’i Antarabansa ngereja aktiviti ti chukup mayuh sereta enda ulih dicherita enggau silik ditu, tang sekeda tugung asil nya tekelalu manah sereta enda patut enda dikenang ditu. Sekeda ari asil pengawa nya ianya pesan kami dalam bulan Empat taun siti tu kemari nuju bala ketuai pengarap di dunya. Tu udah meri kesuh baru ngagai chara dikena raban Baha’i minta dinga raban ti chukup bekuasa ba pengidup mensia ngagai pekara ti chukup beguna dikena nentuka pemaik dunya. Nengah atur ari Opis Pemadah ba Raban Baha’i Antarabansa sereta penyikar Raban Gelumu Sambiang Bansa, enda lama aja, pesan nya udah disadung ngagai orang ti tinggi pangkat sereta ketuai bukai ba raban agama di serata dunya. Tuju pengawa tu ianya ngambika semua ketuai-ketuai agama ti betanggung-jawab, beguai mutarka penanggul runding sangka ba antara pengarap, ti majak mai pengerusak ngagai bansa mensia. Saut ari orang ti nerima pesan nya nunjukka pesan nya benung diperati enggau silik lalu ba sekeda tempat ia mai perening ti baru ngagai aktiviti gerempung antara pengarap.
Dalam bidang pemansang rama enggau penatai pemisi rentak- pengelaju udah ti mandangka pemujur ti besai agi asil ari pengiruh pugu- pengaturpengawa enggau orang siku-siku dalam ngemansangka raban ba tumpuk diri sereta pemansang ba kaul raban enggau orang bukai. Reput ari Opis Pemansang Rama enggau Penatai Pemisi madahka kandang taun ti kedua ba Lumpar Pengawa, lapan iti agensi pemansang ti baru ti nguna penemu Baha’i udah ditumbuhka, bejalaika mayuh chabang pengawa baka dalam bidang ngemansangka orang indu, pengerai, betanam-betupi, pelajar anakmit sereta meri kuasa ngagai bala nembiak.
Di Tanah Kudus, surat Baha’u’llah ti dikumbai Javahiru’l-Asra udah disalin ari jaku Arab ngagai jaku English lalu dikeluar ngena gelar “Gems of Divine Mysteries” (Intan Penyelai Petara). Kereja nyeruri baru sel Baha’u’llah di rumah jel ‘Akka udah tembu, lalu kereja nyeruri tingkat atas ka sel rumah jel nya udah berengkah. Ba renggat penemuai ngagai tanah kudus ti deka datai, bepun ari bulan Sepuluh 2003, penyampau orang ti nemuai ngagai tanah kudus deka ditambah ari 150 ngagai 200 iku ba setiap grup.
Nambahka nya, kereja nyungkakka pemansang pugu-pengatur- pengawa ti gawa di Pusat Dunya chukup nyata lebih agi ubah ti seruran mansang ke pugu-pengatur-pengawa Huqu’qu’llah ti diketuaika Penyaga ti dipebasa, Jari Pengawa Petara ‘Ali-Muhammad Varqa. Nengah pemintar pengiruh sereta pengawa iya ti enda putus-putus, Dr. Varqa udah meransang bala pangan belajar ke adat ke bekaul enggau Huqu’qu’llah ba dini-dini endur. Dalam kandang sepuluh taun adat pasal Huqu’qu’llah udah dipejalai di serata dunya, tusun atur ti menyana (network) ka raban penyaga ba peringkat nasional (bansa) enggau bengkah menua udah ditumbuh, ti nusun kereja sereta meri lalau pengawa ke bala mandal enggau pengari ti majak mayuh. Pemereti pasal adat ti chukup besai tu udah ngerekai luas, lalu bala pangan ari semua genturung menua udah nyaut kangau ia enggau pengangkun ati, alai bala ti dikarap (trustee) deka negu sida ti empai enggau nerima berekat ti disemaya ari ti ngasika adat tu.
Nyau deka dua taun pengudah kami meri jaku tesau minta bantu wang ti amat beguna , dikena ngintu nitih ti tikas ti patut, rumah-rumah enggau kebun bungai ba Pusat Dunya, lalu Pan Agih (Endowment) ke Pusat Dunya udah ditumbuh. Pemeri naka kediatu empai datai ba tikas ti tetipakka guna belanja tiap taun. Taja pia, kami ngasaika patut naga lima juta dollar ari pemeri ti disimpan nyadika pan ti ditaga (earmarked) dikena ngumpul duit simpan tetap (corpus) ti meri penatai bunga wang ti deka dikena nitihka tuju asal ia. Kami ngerja tu ari ti ngeluarka Pan Baha’i Antarabansa dikena mayar sekeda belanja ti patut dibayar, ngetuka sekeda pengawa ti bukai ke selalu dikereja ngelama tu.
Kami gaga bendar ati ngelalau, nitihka pinta Raban Gelumu Sambiang Bansa ke menua Chile, 185 iti konsep pelen dikena ngaga Indu Rumah Sembah ke Amerika Selatan ti deka didiri di Santiago udah bisi diterima ari bala arkitek enggau bala tukang (designers) di serata dunya. Pelen ti dipilih deka dipadah ba maya jam ti patut.
Tabi bala Pangan: Gaga ketegal tanda ti nyengala ke pemansang ti udah jauh sereta mayuh, kami pechaya dalam penetap ti meruan ari Tuhan kitai ti Tinggi ba pengiruh pengawa ti dikereja kita dalam ruang perambu Lumpar Pengawa Lima Taun – Lumpar ti digaga ngipakka guna maya jam kediatu. Arapka pengeliat ati kita dalam ngereja pengawa ngeluarka kuasa ti dikembuan ia awak ka, nengah Bantu enggau pengasih Pemajik Abha, ulih ngemansang ngena alun ti kuat proses ngemasukka orang beraban mayuh ba tiap menua.
- The Universal House of Justice