The Universal House of Justice
Ridván 2007
To the Bahá’ís of the World
Dearly loved Friends,
Taun keterubah Lumpar Pengawa Lima Taun besaksi ke tanda ti nyata bendar ba pengering semengat bala penitih Bahá’u’lláh nerima langkar pengawa ti patut dikereja baka ke dipadah dalam surat kami kenaka 27 Disember 2005 enggau pengeran ati sida deka nyungkakka proses masuk beraban mayuh. Ba tempat ti endur langkar pengawa tu udah dikena enggau chara ti betul ba semua aspek pemansang siti-siti klaster, dia pemujur ti menyana bisi udah ulih, baikanya ba pengawa bala Bahá’í enggau kaban belayan sida sama sama ngereja pengawa ba pengidup raban lalu pia mega ba pemayuh orang ke masuk Pengarap, ti endur sekeda klaster bisi meri ripot madahka beratus-ratus iku orang bisi masuk dalam kandang beberapa bulan lalu ba klaster bukai mega bisi bepuluh-puluh orang masuk. Utai ti beguna bendar ba pemansang ti bakatu ianya mayuh bendar bala pangan udah ngeleda pasal gaya pengudus kereja tu, lalu pia mega udah mereti dalam agi ke gaya kereban ti dikena ngaga pemutus runding ti udah ditetapka ba batang pekara dalam Lumpar Pengawa.
Sebedau kami ngelancharka ripih Lumpar Pengawa global kediatu ti befokus ngagai siti tuju dikena nyungkakka proses masuk beraban mayuh , raban Bahá’í endang udah neresa tikas pengerembai ti besai ba sekeda tempat di dunya tu - siti pengerembai besai ti ngujungka pengawa enda ulih ditanka. Nya alai, tapi pengawa ukai tentu deka nambahka pemayuh orang ke baru masuk Pengarap, baka ba sekeda menua ke udah ditemu mayuh orang bisi pengerindu, tang ngaul sida ngagai daya idup raban lalu ngangkatka mayuh ari sida nya tadi nyadi orang ti angkun deka ngerembaika Pengarap. Naka ia pemesai reti dunya Bahá’í nangkup tapi pengawa tu ti endur kami udah ngambi nya nyadika kah ba juluk ba Lumpar Pengawa Empat Taun lalu minta Raban Gelumu Sambiang Bansa lebih agi numpuka pengawa sida dikena ngangkatka pengulih institusyen, ngena chara Institiut pematih dikena nambahka "sumber mensia". Kami ngasaika orang ke majak mayuh masuk Pengarap patut nerima penguntung ari latih ti menyana ti ditukuh dikena nyikap sida ngena penemu enggau pengelansik pengudus, lalu pia mega ngena pengelandik enggau pemandai, ti diguna dikena bejalaika pengawa ti ulih dikena ngenanka pengawa ngerembai enggau ngenegap ti besai.
Diatu lebuh kami beratika pengawa sekeda klaster ke benung galak mansang , dia kami meda ba tiap-tiap klaster nya bala pangan terus ngenegapka proses institiut, sereta belajarka chara ngangkatka bala ti majak mayuh chakah nyukung pemansang Pengarap, dikena numbuhka skem ti semitan dikena ngeluruska pengawa sida, dikena ngerakitka initiatif siku-siku enggau pengawa bebala mayuh awakka nyadi siti bungai (pattern) pengawa begempung ti bisa, lalu pia mega begunaka maklumat ti bekait dikena ngaga pelen pusin pengawa sida. Sida ke udah tetemuka chara dikena neruska pengawa ngerembai enggau ngenegap ke sama serentak -- kunchi dikena ngenanka pemansang -- udah nyengala dipeda. Tanda ti bakatu tentu deka meransang tiap-tiap iku Bahá’í ke angkun awakka terus terit belajarka chara ti sistematik ti udah ditetapka.
Pemenang ti enda disadang beberapa taun ti udah tu ukai semina dipejalaika ba klaster ti endur pengawa ngerembai enggau ngenegap ti benung dipejalaika enggau naka pemesai. Chara ti dikena lebuh bejalaika Lumpar Pengawa Empat Tahun, lalu udah nya ditangkanka Lumpar Pengawa Dua Belas Bulan enggau Lumpar Pengawa Lima Taun ti dulu ari tu, udah mandang ke tanda ti semitan ba pekara ti nyendiaka pelasar ti manah endur bala Bahá’í ngelekaika pengawa sida ngagai raban ke lebih mayuh agi sereta mai sida sama sama nitihka daya idup raban. Penguntung ari proses ti ngangkatka pengelandik ketiga-tiga raban ba Lumpar Pengawa global dalam pengalama sepuluh taun tu ke udah, diatu udah nyata bendar. Dini-dini tempat semua begunaka pengulih pemereti pasal pengering ngemansangka sumber mensia. Ba semua tempat bala pangan enda tau enda belajarka kereban ti diguna kena neruska pemansang - dikena meransang pengawa ke lebih sistematik sereta ngenyauhka diri ari utai ti nekul, mai semua bala pangan sama-sama ngaga pemutus runding sereta nukuh raban ti bisi ngemuan juluk ati, meransang semua ngereja pengawa sereta meri peluang ngagai setiap iku raban ulih ngereja pengawa ungkup diri, kelebih agi bala anakmit enggau nembiak papak perenggang, orang ke deka negika Pengarap Petara sereta nyadi tukang atur dunya Iya ke jemah ila.
Ngena pelasar ke udah chukup tegap, diatu tiap-tiap bala pangan patut dulu berundingka pengawa ngajar ari pengawa bukai. Baikanya sida ngati kediri sida ngajar bala pangan sida lebuh maya bisi begempuru lalu udah nya mai sida nya sama-sama enggau ngereja pugu-pugu pengawa tauka begunaka peluang pengawa nya nyadika pekakas lumur satu dikena ngajar, baikanya ba raban sida, sida ngepunka kelas anak mit enggau kelas nembiak papak perenggang ba klaster tauka dulu numpuka pengawa ngagai orang ke tuai agi, baikanya sida sama-sama sampal dalam team-team nemuai ngusung kaban belayan sida nyadika sebagi ari kempen dedat tauka selalu ngusung bala orang ke bisi ati rinduka Pengarap - semua tu tadi nya pemutus runding nitihka gaya pengulih enggau peluang bala pangan enggau gaya penerima orang bukai ke sependiau enggau sida. Utai ke enda tau enda ditemu bala pangan, enda ngira ni gaya, ianya sabak sedan raban mensia ti, dikemelu ari kuasa pengudus, karam dalam ba pengasa ati sida enggau pemesai tanggung-jawab kitai ngajar, ianya pengawa ke endang udah diungkup ba kitai laban kitai ke udah nyadi kaban raban Nama Ti Pemadu Besai.
Bahá’u’lláh udah nangkan orang ke nitihka Iya ngajar Pengarap. Diatu beribu-ribu iku orang udah angkat chakah bejalaika Lumpar Pengawa muka jalai dikena sida ngiring semengat ngagai Tasik Pegari Penemu Iya. Kami enggau sadang ti besai nganti maya hari ti endur pengawa ngajar nyadika batang pengawa tiap iku bala pangan lalu lebuh maya bala raban begempung enggau naka penegap awakka sida udah chukup besedia enggau ngesaika bulu siga diri empu ba pengawa ngajar. Tu meh ke diandal kami ba kita lalu tuju sampi ati kami ba Pemetung Suchi.
- The Universal House of Justice