The Universal House of Justice
Ridván 2008
To the Bahá’ís of the World
Dearly loved Friends,
Beribu beribu nyengkaum semua raban mensia ari pupu bansa, ngulu begulai belajar ke Jaku Engkebang dalam gaya ti bebendar sereta ngelantangka ati lebuh sida mekuh begunaka penalam pemereti ti udah dipelajarka dalam siti proses ngereja pengawa, pengawa peninjau sereta bejurai, sida meda pengulih gawa ke Pengawa nyungkakka ngagai tikas pengelandik ti baru. Nyaut penalam pengelengau setiap ati deka berandau enggau Penempa iya, sida ngepunka pengawa serumpu sambiang nitihka gaya ba siti-siti tempat , berakup enggau bala bukai dalam sambiang, ngenanika pengingin pengudus, sereta nukuhka pendiau pengidup ti pegari ketegal perangai ti angkun besambiang. Lebuh sida ngelalu bala pangan ngagai rumah sida sereta ngusung pintu bilik ke bukai, bala pangan sereta bala dikelala, sida berengkah enggau randau ti ngenang pemesai guna pengudus, ngenalamka penemu sida ba Pengarap tu, bekongsika pesan Baha'u'llah, lalu nyambut bala ti betambah mayuh nitihka sida gawa dalam pengawa kudus ti besai. Ngeleda pasal pengingin bala anakmit di dunya sereta peminta sida ti deka begunaka pelajar pengudus, sida nambahka lebih besai agi pengiruh sida ngambika lebih besai agi raban ngulu belajar kelas tu ti deka nyadi pusat penarit ati sida ti biak lalu ngeringka tanggam Pengarap dalam raban mensia. Sida mantu nembiak lanjau ngambika dimalin nengah panggau penguji ba pengidup sida lalu dikepan ngena kuasa ti numpuka penguat sida nuju pemansang pengidup ti menyana. Ari ti betambah mayuh agi orang ti landik gawa, dia mayuh agi sida mansang landik mandangka pengarap ati sida, ngena chara ti ulih mutarka guna mensia dalam pengidup semengat enggau pengidup ba dunya tu. Tu meh asil pemanah gaya pengidup dipeda kitai lebuh ngintu Ridvan tu, lebuh kitai meratika pemansang raban Bahá'í serata dunya.
Suah ba mayuh pengerami kami udah netapka juluk ati Lumpar Pengawa Sedunya ti beturut-turut deka nyangkaika dunya Bahá'í ngagai pengerami nyambut seratus taun Rambau Pengemun Pengarap ba taun 2021 nengah pemansang nyengala ba pengawa sereta pemansang ba siku-siku bala ti arap, nengah sesuku abad penyungkak pengawa ti meruan sereta betumpu, tanda pengulih ti dipeda di semua tempat. Naka pemesai guna pengerembai kuasa penunggang gawa ti nurun ari kaul antara tiga pengereja (orang siku-siku, raban, institusyen) dalam Lumpar Pengawa tu. Pugu pengawa, ari gelumu bangsa ngagai tikas menua, meda enggau lebih terang bakani nyediaka pemanah gaya dikena ngayanka penguat pengudus ari bala ti arap ti betambah ngulihka juluk ati ti sama. Raban tu gawaka mayuh semayuh orang ke alai pengeransing siku-siku gawa enggau pengawa bebala mayuh, digempung ulih pengawa institiut, ulih nyukung pangan diri ngambika bulih pemansang. Pengeregas diayan ia lalu penyerakup tuju ti dipansut nengah pemekuh gawa narit mayuh-mayuh mensia ari semua ikas jalai pengidup ti gagit begunaka masa enggau pengulih diri ngulihka pengelantang pengidup mensia mayuh. Tentu raban tu lebih tebuka luas ngagai semengat ti sedia nerima masuk lalu nerima pemakai ari Pegari Penemu Baha'u'llah endang nyata. Nadai ayan penetap ti lebih besai ari pengasil kaul antara tiga pengereja Lumpar Pengawa tu bebanding enggau peneras pejalai pengawa ngajar ngatika diri ti disaksi ba taun ti baru ngelebus. Sungkak asil pemansang dalam proses(pejalai) beraban mayuh endang nyengala.
Dalam kandang kaul betambah manah, pengeransing siku-siku gawa ngati diri endang mansang beguna. Dalam beberapa pesan ti dulu kami ngenang pasal kejut kuasa dipansut ari proses institiut ketegal pengawa dikerja ari pengeransing gawa ngati diri siku-siku bala ti arap. Bala pangan ba tiap benua udah ampit belajarka Tulis Kudus ngambika nyemetak ngulih juluk ati neladanka ajar nya dikena pemansang Pengarap tu. Pemayuh orang ti nyengala benung napi ungkup gawa dikena meri pengering pengudus ke raban sida, ngembuan penuh penguat ,sida gawa ngipakka suran pemansang ti bepengerai. Lebuh sida mekuh dalam adan gawaka Pengawa tu, tetap nyadi siku dalam pemaruh benung belajar, pemerani enggau pemintar sida, pengagit gawa enggau penyikar sida, pengeransing enggau akal runding sida, pemekuh enggau pengandal sida ba Petara udah disegulai nyukung penguat siti-siti tu enggau ke bukai. Dalam nerantangka pesan Baha'u'llah sereta nusui batang ajar, sida udah "enda kakang" sereta nadai mega "takut", enda mega "belebih" sereta nadai mega "dipuntang" pengamat ti dikemesaika sida. Nadai meh sida "kelalu" sereta enda mega "lebih ngelansa". Ari pemekuh sida dalam pengawa ngajar, sida udah dikepan pengelandik nentuka sekalika bala ti ninga sida, gaya penerima sida ti ninga begunaka "nganti dulu" tauka "terus berani", ngambika "jampat ngelalu" tauka "nganti penentu maya" ngambika "beterus terang tauka "bekelawung" dalam chara ngajar ti diguna sida.
Nama ti mengkang ditemu kami nya bakani amat berurun beradat meh pengeransing gawa siku-siku tu. Semua raban ba dini-dini endur benung mansang nyikap diri enggau pelajar ti diulih sida nengah pengawa berurun lalu dalam garis pengawa ditentuka lurun Lumpar Pengawa kediatu muka ngagai pemeruan sereta mudah-ubah ba pemekuh gawa bala pangan. Jauh ari nyekat sida, garis pengawa tu ngemudahka sida nurun gawa ngulih peluang, numbuhka kaul, lalu nyalinka nya nyadi siti peningkila ba pemansang belurun. Dalam batang jaku, tu meri chuan ngagai kuasa sida begulai gawa.
Lebuh kami survei nama ti udah dikulih ngelingi dunya, ati kami dipenuh pengading ti nyengala ba bala ti arap ari Iran, sida tu, dalam gaya amat diperinsa, udah berani angkat gawa ke menua sida lalu ngambuh semua penguat ngadap penambah kuasa tu, taja ruang dibuka ngagai sida endang besekat. Lalu disekat dituju ngagai atur-pengawa Pengarap tu, sida udah angkat gawa ngati diri ngambika bekongsika enggau rayat semenua pasal ajar Baha'u'llah, lalu enggau nyemetak berandau pasal pesan penyuman tu. Ukai semina sida nerima sukung ari semengat ti beakal tu lebuh sida berengkah gawa, tang sida udah tetemu tikas penerima jauh ari anggap dikandal sida.
Semua penitih Baha'u'llah ngeleda pasal kuasa nyerakup enggau kuasa tebererak benung bejalaika pengawa ba raban mensia kediatu meda kaul antara penyungkak mudah-nerima Pengarap tu di semua tempat di dunya lalu pengeruntuh sistem dunya. Mudah-nerima ti baka nya endang deka betambah lebuh pemedis mensia mayuh lebih dalam. Awakka nadai agi salah: Numbuhka pengulih ti udah berengkah didiri kena napi bala mudah-nerima betambah endang agi ba rengat pengepun. Tikas peminta dunya dalam tebererak deka ngunaka pengulih tu ngagai garis pengabis dalam beberapa taun ti deka datai. Mensia mayuh diterekam kuasa penerekam, sekalika dipansut nengah ati ti begedika agama tauka penyakit ti kelalu angkunka reta dunya. Bala Bahá'í endang ngadang pun penatai pemerinsa tu. "Nama meh penerekam" "lebih bisa", tanya Baha'u'llah,
"kelimpah ari siku semengat ti deka mansik pengamat, lalu ngajihka tetemuka Penemu Petara, deka enda tetemuka kini penunga ngiga ia lalu nengah sapa tegigaka ia?" Nadai maya dibasau. Pemansang meruan mesti dikulih dalam pengawa sereta pemaju ketiga-tiga pengereja pengawa ba Lumpar Pengawa tu.
`Abdu`l-Baha' udah nyebut "dua kangau" ngulihka "pemujur enggau pengaya" ti ulih didinga ari "peninggi pengelantang mensia mayuh". Siti nya kangau "pendiau menyana" ari pemujur ba pengeraja dunya". Ia nyengkaum "undang-undang", "tusun-atur" pengelandik(art) enggau sains" nengah nya mensia mayuh mansang. Ia ke siti nya "kangau ngeransing semengat", ba tu bepanggai pengelantang meruan mensia mayuh. "Kangau kedua' Master(Tuan) tu udah nerang, nya bepelasar atas perintah asuh enggau lalau ari Tuhan sereta tagang penti enggau pengasai pengasih dipenggi dunya basa, ke nyadi perenching penampak, nerang sereta mancharka lampu asal pengamat mensia mayuh. Kuasa penisup ia nya jaku Petara". Lebuh ngemeranka pengering gawa dalam klaster nuan, nuan deka tetarit luas agi ngagai pengidup raban ke endur nuan gawa nyerangkung rampa pengawa mensia ti lebih besai. Dalam singkang pengawa diguna nuan, chara gawa dipilih nuan, lalu pekakas diguna nuan, nuan deka ngulihka pemujur sama timbang ti meri suran ngagai pemansang benung diputar.
Ngemeranka pemansang dalam klaster deka bepanggai ba kualiti ti ngayanka rita pengawa ngagai bala mensia di dunya. Amat lepas lenyau meh runding enggau pengawa dikereja nuan ba sebarang pengedika – bansa, agama, ekonomi, gelumu bangsa, pupu bansa, kelas tauka adat pendiau – kealai temuai pen nemu meda ba nuan pengerindu ke bala pangan. Naka peninggi mesti meh tikas tebilang lalu naka penuchi enggau kudus pengidup nuan ba kaul basa dipansut nisup ngagai pengeleda raban ti lebih luas. Mina semina nuan mandangka pemanah basa perangai ngipak pinta tulis Pengarap tu, genap semengat ulih ngelaban pemayuh gaya korupsi(salah pengawa), terang sereta belalai, ngunyah penguat raban. Mina semina nuan ngelala basa enggau pengeraja dalam setiap bansa mensia – enda bepanggai ba pengaya tauka penyeranta – baru nuan ulih temegah niri ka pengawa pengelurus, lalu ngagai kualiti tikas batang ajar ba pengawa bejurai Bahá'í. Lalu nitihka peniki tikas proses tusun pengawa ari pugu pengawa nuan diperintah ngena batang ajar ba jurai Bahá'í nakanya mega pemayuh raban mayuh ari bansa mensia deka ngiga pengenduh ba raban Bahá'í.
Lebuh nuan mansang bebendar ke mua, bepengandal meh ba Raban kudus di atas ti deka nurun semua kuasa lalu besedia datai mantu nuan. Serarih sambiang kami deka ngelinggi nuan.
- The Universal House of Justice