The Universal House of Justice
Ridván 2024
To the Bahá’ís of the World
Dearly loved Friends,
Dua taun ba pengawa sembilan taun ti berat udah deras bejalai. Bala pangan Petara sigi ngemeran teguh semua juluk ati nya ba ati sida. Di selampur dunya Bahá’í udah betambah penalam pemereti bekaul enggau nama ti diguna kena ngerembaika agi proses nirika komuniti sereta mai empas besai ba transformasyen sosial. Tang enggau pengelebus tiap hari, kami mega meda gaya dunya makin betambah jai, penyerekang ia betambah balat. Penyarut betambah ba dalam mayuh society enggau ba antara menua siti enggau ti bukai udah ngeruga mayuh mensia enggau tempat dalam mayuh chara.
Tu begunaka respon ari tiap-tiap semengat ti cheremat. Semua kitai sigi nemu ianya komuniti Nama Pemadu Tebangkar anang nyadang diri enda dipangka penusah balat ti nuntung society. Tang, taja ia kena pangka semua penusah balat tu, ia enda patut saru ketegal nya; ia sigi sinu ketegal semua pemedis mensia, tang ia enda bajung ketegal nya. Pengibuh ati mesti nganjakka pengawa ti tan nirika komuniti ke meri pengandal nganti pengasa, penyerakup nganti laya.
Shoghi Effendi udah terang ngading bakani proses “pengeruntuh ti mansang ba semua pekara pengidup mensia” sama sereta nyadi enggau siti agi proses, ianya proses bekaul-jaul, ke nengah nya “Bandung penyelamat mensia”, “pengujung pengenduh” ke society, benung didirika. Kami gaga ati meda, ba tiap-tiap menua enggau bengkah menua, orang ti amat gawaka pemaik bebendar nirika pengenduh tu.
Kami meda nya ba tiap-tiap berita ke alai ati ti ditungkun enggau pengerindu Petara, ruang bilik muka rumah sida ngagai bala pangan ti baru, bala kolaborator begunaka ajar Bahá’u’lláh dikena mutarka penanggul sosial, komuniti ngeringka budaya besaup pangan diri, genturung pendiau tauka tumpuk belajar ngepun sereta ngetanka semua kereja ti beguna ke pemansang spiritual enggau material sida empu, lokaliti diberekat enggau penumbuh Raban Gelumu Sambiang ti baru.
Semua chara enggau kereban Pelen ngemendarka tiap-tiap semengat ngenataika pemeri ngagai utai ti diguna mensia kemaya hari tu. Ukai meri ubat sementara aja ngagai semua penyakit ke bisi kemaya tu, bejalaika Pelen sigi proses konstruktif, ti bejalai lama, ti ngerembai sepemanjai beberapa generasyen, udah berengkah nyadi ba tiap-tiap society. Semua tu nunjuk ngagai pengujung ti diperumban, ti enda ulih dikelaung: Mesti bisi meruan, mayuh orang jampat betambah, ke deka nyerahka masa sida, tenaga sida, pengeran sida ngagai pemujur kereja tu.
Dini endur bukai enti enda ba prinsip Bahá’u’lláh pasal penyatu raban mensia endur dunya tau tetemuka visyen ti chukup luas dikena nyerakupka semua mayuh bengkah elemen ia? Bakani chara bukai enti enda nengah nyalin visyen nya nyadi siti atur ti bepelasar ba penyerakup dalam diversiti ke alai dunya ulih nyumanka penyerekang sosial ti magi ia? Sapa orang bukai ti ulih nyadi pengangkat ke nengah nya mensia di dunya tau tetemuka jalai baru pengidup, menasan nuju pemaik ti meruan? Nya alai panjaika jari bekaban ngagai tiap iku, sama pengawa, bekunsi servis, belajar kolektif, lalu sebaka bela mansang.
Kami nemu bakani pengeregas enggau pengering ke bisi ba siti-siti society ketegal bala nembiak dia ti sedar ngagai visyen Bahá’u’lláh lalu nyadi protagonis ba Pelen. Lalu ari nya, enggau naka pementas, pemerani, sereta bepanggai penuh ba Petara bala nembiak Bahá’í mesti mutus ati betesau ngagai orang ti serambau enggau sida lalu mai sida enggau kereja tu! Semua mesti angkat, tang bala nembiak mesti terebai.
Pengerumban jam kediatu mesti enda ngelindung pengaga spesiel ti datai ari servis. Kangau ngagai servis sigi saman ti ngelantangka ati, ti nyerangkung semua.
Ia narit tiap-tiap semengat ti taluk, nyentuk ke sida ti ditating mayuh kereja enggau tanggung pengawa. Laban dalam semua jalai endur bala semengat ti taluk kiruh gawa dia meh ulih tetemuka pengangkun ti beurat tegap sereta pengibuh sepemanjai umur ke pengelantang orang bukai. Semua kualiti ti baka nya meri koheren ngagai pengidup ti ngembuan mayuh peminta. Lalu maya pemadu manis ari semua ke sebarang semengat ti ditungkun ianya maya ti begulai enggau bala menyadi spiritual ti indu enggau lelaki, ngintu society ti begunaka pemakai spiritual.
Ba semua Sungkup Kudus, enggau ati ti melumpa, kami beterimakasih ngagai Bahá’u’lláh ketegal ke udah nirika kita enggau ngelatih kita dalam semua jalai Iya, lalu kami minta-kasih Iya ngenataika berekat Iya ngagai kita.
- The Universal House of Justice