Return   Facebook

The Universal House of Justice

Ridván 2018

To the Bahá’ís of the World

Dearly loved Friends,

Taugasoa pele

E fakatalofa atu i te taimi mai tua o te otiga fuifakapuli o fakatokaga gali ne fakamanatu iei a te luasenitenali (bicentenary - luaselau) tausaga o te Fanauga o te Matagofie Fakamanuiagina (Blessed Beauty). Kafai tatou e mafaufau ki mea ne tuputupu i taimi tena ke oko mai ki taimi nei, e matea ne tatou i te lalolagi Bahai i te vaaitaimi nei e se ‘pau mo taimi ne fakagalue iei a te ono tamilosaga muamua o te Palani tenei e galue kiei tatou. Ko lasi atu te maina i te misiona (mission) nei i loo taimi mua. Kooti foki ne molimaugina se gasuega ki mua seki matea mua te mafai o kau-mai taugasoa mo sokoga ke iloa ne latou a te olaga faka-Baha’i, ke fakamalosi a potukau tausi o tuakoi mo fakai ko te mea ke tasi loto i taumafaiga, ke mafai foki o faka- matala (fuli) a akoakoga faka-te-agaaga ki mea e mafai ne tatou o fakataunu; kae tafasili ei, ko tatou ke sautala, se ki akoakoga kola ka faka-fou ne latou te lalolagi, kae kia Ia foki tela ne tuku mai ne ia: Bahaullah. Tala euiga mo te olaga o Ia pela foki mo Tena fakasaunoaga kola e fakamatala i gana e uke ne tino matua, talavou mo tamaliki e pokotia iei a loto e se laufia. Nisi ne fakaasi te toka o latou o toe sukesuke ki Tena Fakatokaga. Sua vaega ne ofo o fesoasoani. Kae toko fia foki a loto toka ne gaasue o toe faka-paatonu a fakatuagaki o latou.

E tasi te molimau mautinoa tonu o te gasue ki mua ko te uke o koga kola ko iloa lei iei me ite Fakatokaga ko sae ake mai te seiloa i te levolo o te atufenua. E isi ne takitaki o malo mo takitaki o te mafaufau (faiakoga) kooti ne faipati ki potoga o tino – nisi ne fakataua ne latou – me ite lalolagi ko manakogina ne ia te visiona a Baha’u’llah kae ko taumafaiga a Baha’i e gali kola e ‘tau o fakalauefa. E fiafia matou o matea atu me se ko Baha’i fua e manako o fakamanatu a Bahaullah kae fakamanuia Tena olaga – e isi ne fakafiafiaga ne fakatoka ne tino se ne Baha’i. I koga kola e lasi te teeke ki te Fakatokaga, a taugasoa ne seki tuku ki tua. Kae fakaasi ne latou te loto fai ki mua, kae fakamalosi ne latou a tino ke sukesuke a te muna tonu, kae nisi tino ne fakatasi atu ki fakafiafiaga. Te fakamanatuga o te luasenituli tausaga ne fakamafua ake a fakatokaga se laufia i feitu tau taleni i mea tau sou (artistic expression), mo molimau gali euiga mo te puunaavai tela ne puuna mai iei te alofa. Te foliga o fakatokaga a fakapotopotoga Baha’i mo te taimi tenei e fakapatonu mai iei te tulaga o mea ne tauloto ne tatou iloto ite luaselau tupu tausaga mai taimi ne kamata iei a e uke Palani mo te lalolagi. A tino talitonu taki-tokotasi ne fakaaoga ne latou a avanoaga, te fakapotopotoga ne tuu kiluga i se taumafaiga e tasi, mo taugasoa ne fakaaoga a malosi o latou ki palani konei ne fakatoka ne foitino o te Fakatokaga. Se aso fakamanatu tela e fakapatino iei te katoaga o te luaselau tausaga, e maua mai iei se loto malosi ki te galuega/ fakatoka o potoga o tino i te selau tausaga mai mua nei. Ite taimi tenei koi sasale tatou ki te lua o luaselau tausaga, e talosia ne tatou ko fuataga ne toki ite luaselau tausaga muamua ke tausi fakalei ke fua mai lei.

Ite lua tausaga kiloto ite Palani tenei, e tonu e see ‘pau a gasuesuega o fenua takitasi, te aofaki o ‘polokalame fakapitoa ki te fakagasuega o te Fakatokaga (intensive programmes of growth) ite lalolagi ko pilipili nei ki te aafa o te lima afe tela e fakaataata ite taumafaiga nei ite lalolagi, kae ko te tulaga o te gasue kimua e matea lei loa te fanaka kiluga. Kae kilo tatou fakalei kiei, e matea atu a foliga tonu o masoli mo te mafai o taugasoa takitokatasi, fakapotopotoga, ke oko ki foitno o te Fakatokaga. Ki taugasoa i sose koga, te mea ne matea ne tatou mai fakafiafiaga o te luasenitenali (luaselau) tausaga me ite taulasiga o sokotakiga a latou mo tino i tafa o latou e mafai o pokotia ne te agaga ote talai. Kae kafai ko gasuesuega i afe o fakai mo koogakoga pili (neighborhoods) ko tele ki mua, ka matea ne tatou te ola lei o fakapotopotoga i koogakoga kona. Te aofaki o potukau (clusters) i kogaa-koga kola e fakagalue iei te fakatokaga o fakasoko atu a vaega galuega penei ko matea atu me ko ‘tuu lei loa – tela ko mafai ne taugasoa o fakataunu te tolu o tapula i te sasaelega o te atiakega- kae ko olaola lei foki. Kae tenei te koga, ite tuakoi/ gatago tualaga o taulotoga ote lalolagi Baha’i, maise ite gasuesuega o potoga tino ki te fakataunuga o te visiona a Bahaullah, tela ko matea iei, se ko te tokouke fua o tino ko kau mai kiloto i mea fai a te Baha’i, kae ko taugasoa foki ko kamata nei o fakaataata ne latou te tokouke o potukau ko kau fakatasi mai ki te fakapotopotoga a te Igoa Tafasili ite Lasi (Most Great Name). Ko matea ne tatou me i mea tau akoakoga a te Fakatokaga ko kamata nei o sopo ake ki se tulaga ko fakateletele fakalei loa, pela mo akoakoga o tamaliki ko mafai ne tamaliki o olo iloto mai vasega ki vasega iloto i tausaga e fia, kae ko talavou foliki ko mafai foki ne latou o fakasoko a akoakoga a latou i polokalame tau te fakamalosiga o te agaaga. I fakatokaga konei a inisituti o akoakoga ko iloa ne latou te taua ke fakatoka te aofaki o faiakoga ko te mea ke mafai ne latou o fai akoakoga faka-te-agaga pela foki mo te amio mo uiga lei ki ne aofaki e tele kiluga i tamaliki mo talavou foliki . Te kau kiloto i fakatokaga fakavae konei ko kamata nei o fai me ne fakatokaga tumau i faifaiga masani a potoga tela ko fakaataata me ne fakatokaga e tau loa o isi o te olaga o te fakapotopotoga. Se malosi fou tenei ko sae ake i tino/ potoga kola ko pule loatou i atiakega o latou, kae ko kamata foki latou o faite ‘pui o ‘teke atu a te gasuesue. Avanoaga mo te saele ki mua ite feitu o te maumea faka-tee-lalolagi fakatasi mo te feitu-faka-te-agaga ko foliga mai. Te mafuliga o te olaga o tino ko kamata o gasue ki mua.

Taugasoa fakapelepele, tenei te taimi tonu ke tuku a fakafetai a tatou ki te Akoi-Silisili (Best Beloved). E uke kii a pogai taua e ‘tau tatou o fakamalosi ‘tou loto. Kae e se lilo i manatu te lasi o te galuega tenei e toe i tou mua. Tafasili i te taua, pela mo te fakaasiga taluai a matou, e tau o fakasae ake mai i te fia o selau o potukau (clusters) se vasega o taugasoa kola e mafai ne latou o fakatumau ki tino pili i lotou tafa, ne polokalame o fakamalosi te gasue o atiake latou i feitu katoa, tela ko mafai o mateagofie i faiga fakaasi o latou te mafai o fai mea mo te amio tonu. Te tuu kiluga o kau atu kite vasega o taugasoa tela e fanaka loa o laso i koga kesekese – se i te levolo fua o potukau/ kilasita kae iloto foki i koga pili mo fakai – se tulaga faigata, kae se manakoga foki taua. Kae i koga e matea iei a te mea tenei, e matea foki ki mata a te mea mafai o ‘tupu.

E toka motou loto ite matea atu me i foitino a te Fakatokaga e fakataua ne latou te manakoga tenei i mafaufauga o latou, ke oko ki te faitega o ne fakatokaga ke mafai a mea ne tauloto mai te gasue ki mua ke mafai o fakaaoga. Ko kamata nei latou o kaukau atu latou ki tulaga kesekese o mea tau atiakega o te fakapotopotoga, kae ko isi foki se aia o latou ki te ola lei o tino katoa, kae se ko taugasoa fua. E tumau i manatu o latou te taua o fakatumau te taumafaiga a te fakapotopotoga euiga mo te fakataunuuga o manakoga o te Palani, kae fakamalosi foki te taua o te fakatasitasi i te potoga o taugasoa tela e gasolo loa o lauefa ki se tulaga maluga o te fakatasitasi. E fakamaoni latou o tausiusitai ki tiute fai o latou kiluga ite fakaleiga o galuega tau ofisa pela foki mo fakatoga tau tupe ko te mea ko manakoga o te galuega ki te fakalauefaga mo te fakamalosiga o te Fakatokaga e mafai o sapo fakalei. I tulaga katoa konei, e fakaaoga malosi te taimi o latou o toki/ fakaolaola iloto ite fakapotopotoga ne tulaga kola e mafai ei o fakasao a malosi faka-te-agaga.

I te famalosiga o taumafaiga o atiake fakapotopotoga, a taugasoa ko fakaaoga ne latou a iloa mo te mafai ne tauloto ne latou o fakalei a tulaga o fakapotootoga i tafa o latou, kae fakamalosi lotou loto mai te taulotoga o akoakoga faka-te-agaga. A polotieki foliki ko i te uke nei – te aofaki e fanaka loa, polokalame tumau ko gasolo o lasi atu, kae ko uke foki ite vaitau tenei a fakapotopotoga Baha’i ko iloto i fakapotopotoga atiake i mea tau akoakoga, ola-lei, toki-lakau mo te fagai manu, mo nisi feitu ake foki. Mai te mafuliga o olaga tenei ko matea nei i tini takitokatasi, mo th. e olaga o saukatoa o tino, e mafai o mafai o atafia te gasuesue mautinoa tonu o te malosi fakatoka sosaieti a te Fakatokaga a Bahaullah. Se tioala, me mai gsuesuega penei i tulaga tau olaga o tagata – me foliki me faigata, fakatokaga e faka-taimi io me tumau – e matea ne tatou te Ofisa o te Baha’i i te Malo Soko (Baha’i Internaional Community) ko gasolo loa nei o fakaaoga ne ia, i faipatiga mo titiga o manatu, a gausesuega konei. Se feitu taua e tasi tenei i taumafaiga iloto ite Fakatokaga tela ko gasolosolo lei. I tulaga o fenua/ atufenua (national), a tusaga ki manatu/ mataupu solo i te fakapotopotoga pela mo: te tasi o tagata mo te fafine, gasuesue o tino i vaasia o fenua mo te kau-tasi (integration), te tulaga o talavou i atiakega o te ola-lei o fakapotopotoga, nofo lei o lotu kesekese, i tafa o mataupu e uke – ko mafai nei o kau atu kiei mo se loto toka, atamai mo te kiloga fou. Kae i sose koga e nofo iei, io me galue me tauloto iei, a taugasoa mai tulaga kesekese o te olaga, tausaga, akoakoga mo nisi, e fai tusaga latou ki titiga o manatu, kae aofia iei a menatu fakavae ki te Folafolaga Lauefa a Bahaullah.

Te tulaga o te Fakatokaga i kogaakoga e fai titi iei a manatu i mataupu kesekese ite olaga o tagata koi lei fakafia nei i te mauaga o se avanoaga o ia ite World Wide Web, se avanoaga tela kooti ne toe fakalauefa gina ne te faitega o koga (websites) e uke a fakapotopotoga Baha’i ite Atufenua fakatasi mo nisi taumafaiga e uke of websites kola e soko ki te Bahai,org. Se feitu taua kii tenei euiga mo te fakalauefaga mo te puipuiga o te Fakatokaga. Iloto fua i se vasia o se fia o aso, ne tokouke a tino mai feitu keseke o te lalolagi ne fiafia o iloilo fakalei a mataupu euiga ki te Fakatokaga kola ne ‘fola i te website o te luaselau tausaga, kae toe fakafou ki se aofaki e iva gana i te taimi e tasi, kae ne toe fakalauefagina ne laupepa mo fenua taktasi kola e fakaasi iei te lasi mo te kesekese o fakamanatuga ne fakatoka. Ko isi nei ne fakatokaga ke faulu ki te Baha’i Reference Library website se fakatokaga ke faulu kiei a fakamunaga (pasages) mo Tapileta mai te Tusitusiga Tapu kola seki fuli kae seki lomi foki mua. I tafa o te fakatokaga tenei, e isi ne voliumu (volumes) mai te Tusitusiga a Bahaullah no Abdul-Baha kola ka fuli faka-palagi ka avaka foki ki konei i tausaga mai mua nei.

I Santiago, Chile, mo Battambang i Cambodia, a Fale Tapuaki (Houses of Worships) ite lalolagi kola ne toe oti ne fakamanuia, ko kamata nei o fai mo ne koga e futi mai a tino pela mo pikini ki sosaieti o latou, se fakavae e lauiloa iei a te Fakatokaga. Kae, ko te aofaki o latou ka gasolo o lasi. E fiafia lasi matou o fakasalalau atu me ite fakamanuiaga o te Temple i Norte del Cauca, Colombia, ka fai ia Iulai. I Vanuatu, kooti nei ne fakatagi ke kamata te fakatuga. I India mo te Democratic Republic o Congo, te fakamauaga o te laukele ne oko te fakatokaga ki se tulaga tai faigata kae fifi foki kae ko toka nei a te feitu tena. Te fiafia o te loto o kilo atu ki te ata o te Mashriqu’l-Adhkar ne fakaasi i taimi o te Naw-Ruz seki gata, kae ko toe fola foki te ata o te Fale Tapuaki (House of Worship) i Kenya. Tiiga iei, e talitonu foki matou me ite fakamatalaga (compilation) euiga mo te Mashriqul-Adhkar tela ne fakatoka ne te Research Department (Ofisa Sukesuke), ka toe fakamalosi te iloa mo te talitonu o taugasoa ki te taua o tapuakiga ite olaga o te fakapotopotoga. Me i te tusaga fai (service) maise i taimi o tapuakiga fakatasi (devotional gatherings), a Bahai i koga katoa e fakatoka ne latou a fakavae fakateagaga o Fale Tapuaki (House of Worships) i tausaga mai mua.

E toe tolu fua tausaga e toe nei mai te kuata-senituli tela ne kamata i te 1996 kae ne fakatino loa ki te tapula e tasi: se gasuega lasi i te ulu mai i kau tau. I gasologa o te sefulu-lua masina taua tenei, i te fakamanatuga ne te lalolagi Bahai te senituli o te Galo o Abdul-Baha ka aofia iei se maopopoga e fakatoka i te Baha’i World Center tela ka ka kami atu a sui mai Fakapotopotoga Fakateagaga i Atufenua (NSAs) fakatasi mo Regional Baha’i Council. Te fakatokaga la tenei se fakatokaga e tasi i fakatokaga e uke, tela ka fakatoka iei a taugasoa ki manakoga o tausaga mai mua nei. Ia Ianuali ma vau, ko katoa iei te selau tausaga mai taimi ne faitau muamua loa iei a Togi Mate (Will and Testament) a te Master, ka fakatoka se fonotaga i Holy Land (Isalaelu) kae kami kami kei a Continental Board of ounsellors fakatasi mo ABMs mo te Puipuiga mo te Talaiga. Te malosi fakateagaga tela ka fakasao i taimi e lua taua konei e tau o fakaoko atu ki taugasoa katoa a te Atua i sose kogae nofo iei latou. Mo te pogai tenei, e uke a fonotaga ka fakatoka i te lalolagi i masina mai mua nei, se fakagasuega ki taumafaiga e uke i te tausaga e tasi tela ka sui ne ia te Palani o Tausaga e Tasi tela ka maua mai mua nei.

Tela la, se taumafaiga fou tenei ki te fakatelega/ fakagaluegaga o te Palani Tapu a te Master (Master’s Divine Plan) ko pilipili mai. Te vaaitau tenei ko taimi tela e tau o fakamanatunatu te loto toa fakaofoofo a te Matulo/ Faifekau (Matyr/ Herald) o te Fakatokaga a tatou, tela ko Tena minisituli (galuega) ne fakaeke ake iei a te lalolagi o tagata mo fafine (humanity) ki se tulaga fou i tala fakasolo pito. E tonu me e mavae tatou i se lua senituli, te sosaieti tela ne sae mai kiei a te Bab pela loa me tusa mo aso nei i tulaga loa tau te se tokaga lei a olaga o tino mo manakoga o loto otino tokouke o sala ki tali o fakamalie a fakafesiliga e uke o ltou loto. I te iloiloga me fakamanatu pefea ne tatou a te lua-selau tausaga, e talitonu tatou me i fakafiafiaga konei ka isi loa iei ne kesekesega o latou. Tiiga iei, e fakamoemoe matou me ka uke a fakatokatokaga kola ka tafasili ite gali kae ka aofia foki ne latou tino pela loa mo mea ne fai i te luasenituli ko oti atu nei. Se pogai tela e tau mo fakapotopotoga, a kaiga katoa mo loto takitokatasi se taumate ka fakaataata ne latou mo loto fiafia.

A masina mai mua nei se avanoaga ke fakamasausau ne tatou a olaga soko ‘toa o te Bab – fafine toa mo tagata toa ko fakatuanaki o latou ne fakaasi i tulaga kesekese mo mea ne fai ne latou kola se fakatusagina, kae ne afaina foki iei lotou ola, ka lakei ne latou a tala fakasolopito o te Fakatokaga. A uiga mo loto se ai se poi, talitonu katoatoa, kae tuku katoa mea ki te Atua, ko fai mo tala e pokotia katoa tatou kola e tauloto ki mea a latou ne fai. E fakaofofogina foki, te iloa atume i tausaga o latou koi foliki kae ko tokoukega o toa konei ko fai maaka se mafai o toe fulu i tala fakasolopito. I tausaga mai mua nei, talosia ko uiga fakaasi o latou ke fakamalosi iei a potoga o te kau fakatuanaki – e aofia foki iei a talavou, kola ko kalagina foki i te taimi nei ke ‘taki ne latou a te taumafaiga o fuli te lalolagi.

Tenei, la, te fakamoemoega taulekaleka a matou. I te ono o tamilosaga i te vaasia o te Lisivani tenei mo te sua luasenitenali – e tonu loa, i loto i tausaga toe e tolu o te Palani nei – ke maua ne koutou a te alofa faka-otia loto, kae lauefa tela ne fakagasue a soko o te Baba o fakasalalau a te mainaga faka-te-lagi, ke fakamalosi koutou ki galuega lasi taua. Ko talosaga a matou i Kogaa-koga Tapu (Sacred Threshold) ko te mea ke maua ne koutou a fakamanuiaga mai te lagi.

 

Windows / Mac